Ölkə futbolu
12 ildə… 2 addım geri
Avro-2020-nin seçmə mərhələsinin bitməsinə 2 tur qalıb. …
Avro-2020-nin seçmə mərhələsinin bitməsinə 2 tur qalıb. Milli komandamız yarışdığı qrupda 6 oyundan topladığı 1 xalla conuncudu. 5 komandalı qrupda yarışan Nikola Yurçeviçin yetirmələri indidən sonuncu pilləni “özəlləşdirib”.
Yenilik deyil. İndiyə qədər yarışdığımız bütün seçmə mərhələlərdə son 2 pillədən birinə sahib olmuşuq. Lüksemburq, Lixtenşteyn, hətta Andorra kimi “cırtdanlar”ın daha yaxşı nəticə göstərdiyi cari tsikldə yarışöncəsi başqa avazlar eşidirdik. Final mərhələsinə yüksəlməklə bağlı vəzifə/hədəf hara, indiki nəticə hara?
Qitə çempionatında 7-ci dəfədi seşmə mərhələdə yarışırıq. Və ən pis nəticə ilə məhz indi üzləşmişik. İlk seçmə mərhələdə də cəmi 1 xal qazanmışdıq, lakin o zaman debütant olduğumuzu, ev oyunlarını Türkiyədə keçirdiyimizi unutmayaq.
Düzdü, Uelslə ev, Slovakiya ilə səfər oyunumuz var, xal ehtiyatını artırmaq olar. Lakin etiraf edək ki, indiki potensialla heç nə mümkün deyil. Daha 1 və ya 3 xal ola bilər – bu isə heç nəyi dəyişməyəcək. Acından öldüyünü dediyimiz mənfur qonşularımız 2-ci pillə uğrunda yarışdığı bir zamanda yoxlama oyunundakı heç-heçəyə görə üzvləri böyük mükafat alan millimiz son pillədə sürünür.
Turnir O Q H M T X Yer Qrupda say
AÇ-96 10 0 1 9 2-29 1 6-cı 6 komanda
AÇ-2000 10 1 1 8 6-26 4 5-ci 6 komanda
AÇ-2004 8 1 1 6 5-20 4 5-ci 5 komanda
AÇ-2008 12 1 2 9 6-28 5 8-ci 8 komanda
AÇ-2012 10 2 1 7 10-26 7 5-ci 6 komanda
AÇ-2016 10 1 3 6 7-18 6 5-ci 6 komanda
AÇ-2020 6 0 1 5 5-14 1 5 komanda
Əslində, xüsusilə son 10 ildə futbolumuzda ciddi irəliləyiş olmalı, ən azı ildən-ilə nəticələr yaxşılaşmalıydı. Yüksək dövlət qayğısının qarşılığında heç olmasa, ortabab Avropa komandasına çevrilməli idik. Lakin futbol təsərrüfatımız o qədər bərbad idarə olunub ki, hətta sabaha ümid yoxdu. Strategiya düzgün seçilməyib, uşaq futboluna qayğı göstərilməyib və nəticəyə yönəlik iş ortaya qoyulmayıb.
Və bütün bunlar yalnız AFFA-yla bağlı belədi. 2-3 milyard manatın xərcləndiyi bu illər ərzində klublar müəyyən nəticələr göstəriblər. Baş katib Elxan Məmmədovun hələ hər şeyi əlində cəmləşdirmədiyi zamanlar “Neftçi” Avropa Liqasında qrupa vəsiqə qazanmış, sonralar bu şəxsin əlinin çatmadığı müstəqil klublar – “Qəbələ” ardıcıl 2 il eyni uğuru göstərmişdi, “Qarabağ” isə 6 ildi ölkəmizi beynəlxalq arenada şərəflə təmsil edir, hətta Çempionlar Liqasinda da qrup üzü görmüşük.
AFFA-nın indiki rəhbərliyi iş başına gələrkən Avropada klub reytinqində 44-cü olan ölkəmiz məhz bu uğurlar sayəsində hazırda 24-cüdü, bir ara 22-ci pilləyə kimi yüksəlmişdi. Məmmədovun birbaşa cavabdeh olduğu milli komandamız isə yalnız geriləyib. Elxan bəyin baş katib təyin olunduğu 2007-ci ilin iyulunda dünya reytinqində 109-cu olan yığmamız 12 il yarım sonra, yəni bu ayın nəticələrinə görə 111-cidi.
Mənzərə ortadadı. Halbuki bu qədər dövlət qayğısının, futbola axan maliyyənin qarşılığında ən azı 60-70-ci yerlərdə olmalıydıq. Çünki klublarımız işin doğru qurulduğu halda hər şeyin mümkünlüyünü sübut ediblər. Problem başda, idarəçilikdə, yönətimdədi. Və təəssüf ki, Azərbaycan futbol təsərrüfatında bütün strategiyanı Elxan Məmmədov kimi futbola yad adamlar cızır. Onun qarışa bilmədiyi klublar nəticə qazandığı halda, ələ keçirdiyi bütün kollektivlərdə eniş, böhran özünü göstərir. O da maraqlıdı ki, həmin klublar yenə də AFFA-dan və ya dövlətin təhkim etdiyi qurumlardan maddi qida alır. Deməli, baş katib dövlətin pulunu havaya sovurmaqla məşğuldu.
Ən maraqlısı isə odur ki, hazırda Məmmədov ən yüksək dairələrdə öz reklamı ilə məşğuldu. O, yeni AFFA prezidenti olmaq üçün iş aparır. Ən azı yeni prezidentə də katiblik etmək üçün dəridən-qabıqdan çıxan bu şəxs futbolda bir nömrəli günahkar olduğunu, ictimaiyyətin narazılığını pərdələməyə çalışır.
AĞA
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…
- Premyer-liqa2024-04-20 20:55
“Zirə” “Neftçi”yə qalib gəldi