Layihə
İcraiyyə Komitəsi üçün yeni gündəlik
(əvvəli bu linkdə)
Beləliklə, İcraiyyə Komitəsini…
Beləliklə, İcraiyyə Komitəsinin sabahkı iclasında müzakirəyə çıxacaq məsələlərə göz atdıq, hansı bəndin əslində, necə təsnif olunması lazım gəldiyini qeyd etdik. Maddə-maddə izah edərkən gündəlikdəki məsələlərin müzakirəsinin fərqli yönlərini də göstərdik. Lakin elə məsələlər var ki, ümumiyyətlə, nəzərdə tutulmayıb. Halbuki 2019-un yekun iclasında müzakirəsi daha vacib idi.
1. Əvvəla, ilə yekun vurulmalı idi. Təkcə ayrı-ayrı milli komandalar müzakirə olunmamalı, ümumilikdə bütün sahələrdəki işlərə qiymət verilməliydi. Futzaldan çimərlik futboluna, klublardan uşaq futboluna, infrastrukturdan kadrlara, qadın futbolundan kütləviliyə kimi. Düzdü, Konfransda bu ediləcək. Lakin elə həmin tədbir üçün konturlar müəyyənləşməlidi.
2. 2005-2015-ci illəri əhatə edən Dövlət Proqramının yekunuyla bağlı rəsmi hesabat bugünədək verilməyib. Nəhayət, cavabdehlərdən bunun hesabatı istənməli, yeni proqramın qəbulunu əngəl törədən səbəblər araşdırılmalıdı.
3. İK Elxan Məmmədovdan hesabat istəməlidi. İl boyunca bütün qərarların icrasına o nəzarət edib, hətta əksər hallarda qərarverən şəxs olub. Milli komandalara məşqçi seçimindən tutmuş inkişaf strategiyasına kimi hər şeyi baş katib müəyyənləşdirib. Və bu gün nəticəsizlikdi, üstəlik, futbolumuz uçuruma yuvarlanıb. Bəlkə artıq məmurların özü haqda ölçü götürülsün?
Komitənin belə bir səlahiyyəti var. Bu posta təyin etdikləri adamı indi postundan uzaqlaşdırmaq səlahiyyəti də onlardadı. İctimaiyyətdə bütün haqlı tənqidlər baş katibə yönəlibsə, qurum üzvləri ictimaiyyətin fikrinə qarşı çıxmamalıdı, araşdırıb, lazımi qərarı verməlidi. Əks halda, özləri birbaşa günahkara çevriləcəklər.
4. İcraiyyə Komitəsi bir sıra qərarlarının sonrakı taleyi ilə maraqlanmır, qərarlar havadan asılı qalır. Məsələn, 2017-ci il martın 7-dəki iclasda qərar qəbul olunmuşdu: “AFFA yanında Media Komitəsinin yeni formatda fəaliyyəti ilə bağlı müzakirələrin aparılması katibliyə həvalə olunsun və İcraiyyə Komitəsinin növbəti iclasına təkliflər təqdim olunsun”. Bu qərardan sonra İK dəfələrlə toplaşıb, amma heç birində məsələ müzakirə olunmayıb. Ya katiblik İK-nın qərarlarını vecinə almır, ya da komitə özü işin icrasında maraqlı deyil. Ləğvi haqda qərar çıxarılması problem deyil, ancaq dəqiq olsun, qərar verilsin.
Əvəzində AFFA-nın Media Komitəsinə ayrılan büdcəni fərdi, gizli müqavilələrlə payladığı haqda söhbətlər var. Ən azı bu barədə açıqlama verilməsi lazımdı. Bəlkə assosiasiya “yeni format” deyərkən bunu nəzərdə tuturmuş? İstənilən halda, İK üzvləri verdikləri qərarın davamını gətirməlidi.
5. Klublar Komitəsinin, Məşqçilər Komitəsinin fəaliyyəti müzakirə olunmalıdı. Bu qurumlar futbolumuza nə verir? Riad Rəfiyev sədr seçildikdən sonra KK bir az fəallaşmışdı, amma artıq onun da səsi kəsilib, tədbirlər formal xarakter daşıyır, ölkə futbolunda bu qurumun heç bir rolu yoxdu. MK isə daha çox günahlandırılmaq üçün mövcuddu. Milli komandaların məşqçiləri ilə bağlı seçimlər səhvdisə, baş katib bütün təyinatlarda onların rəyininin nəzərə alındığını dilə gətirirsə, o zaman buyurub cavab versinlər. Həm də İK üzvü olan MK sədri Vaqif Sadıqovu eşitmək maraqlı olar. Ən azından Ulu Öndərin şərəfinə təşkil olunması planlaşdırılan Prezident Kuboku ideyasının reallaşmasına kimin əngəl törətdiyini açıqlasın.
6. Region Liqasının statusu, bu yarışın nə PFL, nə Həvəskarlar Federasiyası, nə də Regional Futbol Federasiyalarının bayrağı altında keçirilməməsinin səbəbləri maraqlıdı. Uşaq liqalarına rəhbərlik edən biri 7-dən 77-yə hamının oynaya bildiyi bir yarışın rəhbəri necə ola bilər? Ümumiyyətlə, Peşəkar Futbol Liqasının lazım olub-olmadığı da müzakirəyə çıxarılmalıdı. Artıq formal quruma çevrilmiş RFL bəlkə heç lazım deyil?
7. Divizionda oyunların nəticələrinin manipulyasiyası niyə unudulur? Yaxınlarda cəzalanmış 2 futbolçunun taleyi ilə bağlı məlumat verilməlidi. Eyni zamanda bu qədər söz-söhbəti “Ağsu”nun 2 futbolçusunu qurban verərək bağlamaq olarmı? Nəyə görə U-21 yığmamızın üzvlərinin adı ətrafında gəzən söz-söhbət müzakirəyə çıxarılmır? Axı, adları bəlli olan 5 futbolçu (biri legionerdi, qalanları yerli klubların üzvləridi – red.) Fransayla matçın nəticəsinə təsir etməkdə şübhəli bilinir, Lixtenşteynlə, Gürcüstanla matçların nəticələri şübhəlidi.
8. Divizion yarışlarının səviyyəsi də araşdırılmalıdı. Əvəzedicilərin çempionatının ləğvi bizə nə verdi? Divizionda səviyyə niyə qalxmadı?
9. Tovuz akademiyasında tikinti işlərinin gedişatı ilə bağlı məlumat lazımdı. Niyə tikinti işləri yubanır? Ümumiyyətlə, şəhər stadionu ətrafında akademiya yaratmaq nə dərəcədə məntiqlidi? Bir meydança ilə akademiya görüntüsü yaratmaqla kimi aldadırıq?
10. Avro-2020 ilə bağlı vəzifə yerinə yetirilməyib, futbol təsərrüfatı dağınıq vəziyyətdədi. Və bütün bunların günahkarı elə həm də İcraiyyə Komitəsidi. Bəlkə komitənin ölkədə gedən islahatlara uyğun olaraq özünü buraxması daha məntiqli olar? Bütün qərarlar İK-da verilirsə və nəticələr faiciəvidisə, dirənib qalmağın mənası nədi?
11. Gündəlikdə mütləq “Digər məsələlər” bəndi olmalıdı. Yəni gündəliyi tərtib edən katiblik müzakirələrin gedişində kiminsə məsələ qaldırmayacağına, təklif verməyəcəyinə bu qədər əmindi?
Cənab İcraiyyə Komitəsinin üzvləri, sizin gündəliyiniz bəllidi, bu da bizim əlavə təkliflərimizdi. Əlinizi ürəyinizin üstünə qoyaraq, vicdanınızın səsinə qulaq asaraq deyin: hansı ölkə futbolunun problemləri baxımından daha aktualdı. Hələ iclasa kimi bir neçə saatınız var. Yatmamış, sabah iclas başlayana kimi düşünün…
VÜSAL MAHMUDOV
P.S.: Davamı İK-nın iclasından sonra olacaq.
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Müsahibə2024-04-10 11:44
Subaşiç “Neftçi” və “Qəbələ”yə görə məyusdur: “Rəhbərlik heyət və məşqçi ilə bağlı qərar verməlidir”
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…