Ölkə futbolu
Toşakın uşaqları
Nə “Neftçi” tərəfi qürrələnsin, nə lənk…
Nə “Neftçi” tərəfi qürrələnsin, nə lənkəranlılar haray qoparsın. Noyabrın 2-də baş tutan “Böyük oyun”un qalibini hazırkı şərait məüyyənləşdirdi. Bu səbəbdən də bakılıların özlərini böyük müharibənin həlledici döyüşünü udmuş kimi göstərmələrinə ehtiyac yoxdu. Heç “Xəzər Lənkəran” da haqsız yerə uduzduqlarını, uduzdurulduqlarını iddia etməsin.
Əslində, məğlubiyyətlərinin səbəbini “Xəzər Lənkəran”ın baş məşqçisi Con Toşak özü tapıb. Onun oyunsonrası mətbuat konfransında dedikləri cənubluların çıxışının real qiymətidi: “Bu gün kişilər yeniyetmələrə qarşı oynadılar, hesabın ədalətli olduğunu düşünürəm. Qapımızdan ilk qolu buraxdıqdan sonra Zohair Benuahinin qol imkanı oldu, lakin qapıya zərbə endirmək əvəzinə nə üçün ötürmə verdiyini anlamıram. Qapıçı ilə təkbətək çıxırsa, özü qol vurmalıdı. Mənə “Neftçi”nin ilk qolu oyundankənar vəziyyətdən vurduğunu dedilər. Bu cür nəticələrlə I diviziona düşməsək, yaxşıdı. Belə oynamağımızın səbəbini yeniyetmə futbolçularımızdan soruşmaq lazımdı. Komanda çox bərbad oynadı. Qapıçı ilə təkbətək epizodda qol vura bilmiriksə, nə deyim? Rasim Ramaldanov milli komanda üzvüdü, 11 metrlik cərimə zərbəsi epizodunda uşaq səhvi etdi. Milli komandanın oyunçusu gülməli vəziyyətdə qayda pozuntusuna yol verdi”.
Uelsli mütəxəssis hər şeyə real qiymət verib. Onun dediyi kimi, hesab 1:0 olarkən Benuahinin əldən verdiyi qol epizodu reallaşsaydı, indi bəlkə də başqa nəticəni müzakirə edirdik. Amma yarımmüdafiəşi sanki futbolun əlifbasını bilmirmiş kimi elə hərəkət etdi ki, bunun savadsızlıqdan başqa adı yoxdu. Ramaldanovun səhvi isə həm də Toşakın günahlarını üzə çıxardı. Çünki bu hoqqaları məhz onun etdiyi transferlər reallaşdırdı. Halbuki bu iki futbolşu, eləcə də Qliqorov, Mbilla, Edu kimilər “Xəzər Lənkəran”ın səviyyəsinə heç cür uyğun gəlmirlər. Toşakın aşağı diviziona düşmək qorxusundan danışması isə tam təbiidi. Çünki məşqçi lazımi transferlərə şərait yaratmamaqla, Junior Nildonun timsalında böyük pullaras kiçik oyunçular almaqla “Xəzər Lənkəran”ı qapazaltı bir kollektivə çevirib. Bivaxtların iddialı komandası hətta “sumqayıt” üçün də sıradan bir rəqibdi.
Toşakın uşaqların kişilərə uduzması haqda dedikləri isə cəfəngiyyatdı. Lənkəranlı futbolçulara “çoxbilmiş uşaqlar” ifadəsi daha yaxşı yaraşır. Çünki bu çoxbilmişlər 10 gün öncə Superkubok matçında həmin kişiləri sadəcə, meydandan silmiş, matç boyunca üstün olub 10 nəfərlə layiq olduqları qələbəni qazanmışdı. Bilirsiz niyə? Çünki ortada yarım milyon manat mükafat var idi. Bu isə onu göstərir ki, “Xəzər Lənkəran”da oynayanlar üçün nə prinsipial rəqib, nə azarkeş sevgisi, nə də futbolçu qüruru var. Ortaya böyük mükafat qoyulubsa, onun üçün (“Xəzər Lənkəran” üçün yox ha) döyüşəcəklər, bu yoxdusa, matçı yola vermək lazımdı.
Amma “Xəzər Lənkəran” üçün pis günündə belə can qoyan futbolçular var ki, rəhbərlik məhz onların qədrini bilməlidi. Doğrusu, oyunu izlədiyim zaman Rahid Əmirquliyevin göstərdiyi futbol məni təsirləndirdi. Meydanda ayağını basmadığı nöqtə qalmayan bu futbolçu əsl lider, mübarizlik etalonu idi. Nə yazıq ki, o, tək idi. Kapitanın təkbaşına döyüşməsi isə heç nəyi həll etmədi. Məhz fədakarlığına görə onun yan xətt hakimi, ilk qolda kobud səhvə yol verən Elman Musayevi söyməsinə belə göz yummaq olardı.
Beləliklə, daha bir “Böyük oyun” tarixin yaddaşına köçdü. Yalnız bir klubun azarkeşlərinin izlədiyi matçın zövqsüz olduğunu qeyd etməkdə fayda var. Yüksək təhlükəsizlik tədbirləri nəticəsində hər hansı insidentin baş vermədiyi matç qonaq tərəfdarların yoxluğunda natamam tamaşa təsiri bağışladı.
Toşakın “uşaqlar”dan gileyləndiyi qarşılaşmada rəqib baç məşqçi Nazim Süleymanovun da rolunu vurğulamaq lazımdı. Uelsli çalışdırıcı şənbə gününə kimi uduzmadığı bütün “Böyük oyun”larda rəqib həmkarlarına taktika dərsi keçmişdisə, bu dəfə Nazim bəy ondan geri qalmadı. Düzdü, ortada oyunçuların səviyyə fərqi var idi, ancaq Süleymanovun Bahodir Nasimovu daha dinamik Ernest Nforla əvəz etməsi qarşılaşmanın gedişində həlledici rol oynadı. Məhz həmin andan etibarən “kişilər və uşaqlar”ın bacarığı üzə çıxdı.
- Premyer-liqa2024-04-28 21:55
“Sumqayıt” “Qarabağ”a qalib gəldi
- Premyer-liqa2024-04-28 19:37
“Neftçi” “Turan Tovuz”a böyük hesabla qalib gəldi
- Ölkə futbolu2024-04-27 23:05
Samir Abasov Xavi ilə görüşdü
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi