Müsahibə
“Onlara hörmət edirik, lakin heç nədən qorxmuruq”
“Zirə”nin malavili hücumçusu Robin Nqalandeni…
“Zirə”nin malavili hücumçusu Robin Nqalandenin futbolinfo.az-a müsahibəsi
– Kubokda “Səbail”ə evdə qalib gələ bilmədiniz. Oyunu necə şərh edərsən?
– “Səbail” yaxşı komandadır. Onlarla oyuna ciddi şəkildə hazırlaşmalıyıq. Yaxşı motivasiya olmaq lazımdır və psixioloji olaraq üstün şəkildə cavab matçına çıxmaq lazımdır.
– Çempionatda “Səbail” üzərində böyükhesablı qalibiyyət əldə etdiniz, lakin kubokda vacib olsa da, bir qol vura bilmədiniz…
– Mənim üçün kubok və çempionat oyunları fərqlidir. Kubok matçları daha ağır oyunlardır. Belə qarşılaşmalarda komandaların əsas istəyi qol buraxmamaq olur. Düşünürəm ki, “Səbail” kubok matçına çempionatdakından daha yaxşı hazırlaşmışdı. Meydanda da daha yaxşı görünürdülər.
– “Səbail”in şanslarını sizdən daha yüksək qiymətləndirə bilərik?
– Biz onlara hörmət edirik, lakin heç nədən qorxmuruq. Komandada hər kəs yüksək əhval-ruhiyyədədir. Çox ciddi məşq etmişik. Öz şansımızı gözləyəcəyik və Allah bizim qalib olmağımıza kömək edəcək.
– Mərhələ keçsəniz, “Qəbələ”, yoxsa “Sabah”la üz-üzə gəlmək istəyərsiz?
– Düşünürəm ki, indi qarşıdakı matça köklənməliyik. Dekabrın 19-da çox ağır qarşılaşma bizi gözləyir. Sona qədər döyüşməliyik. Düşüncəmizdə hələlik, yalnız bu oyundur və yaxşı dincəlib meydana çıxmalıyıq.
– “Qəbələ”nin “Sabah” üzərində 3:0 hesablı qələbəsini gözləyirdiniz?
– “Qəbələ” son zamanlar çox yaxşı oyunlar keçirir. Bütün komandalara ciddi problemlər yaradırlar. Lakin hər iki komanda güclüdür.
– Rəqib meydanın süni ot örtüyündən ibarətdir…
– Sözsüz ki, süni ot örtüyündə oynamaq çətin olacaq. Təbii meydançada məşq etdikdən sonra belə oyun keçirmək çətin olur. Lakin bunları bəhanə kimi göstərməməliyik. Meydana çıxıb qalib gəlməli, mərhələ adlamalıyıq.
– Demək olar ki, son oyunlarda meydana çıxmırsan. Qorxmursan ki, qış fasiləsində gedənlərdən biri də sən olacaqsan?
– Yox, mən qorxmuram. Mənim üçün çox pis situasiyadır. İstənilən futbolçu kimi mən də oynamaq istəyərəm, meydana çıxmayanda xoşbəxt olmuram. Lakin meydana çıxan komanda yoldaşlarımı dəstəkləməliyəm və onları həvəsləndirməliyəm. Çünki mən də meydanda olanda onlar məni dəstəkləyəcəklər. Biz bir komandayıq və hədəflərimiz var. Mən də uğurumuzun bir hissəsi olmaq istəyirəm. Buna görə skamyada da komandanı dəstəkləyirəm.
– Burada qalsan, qışdan sonra daha çox oynayacağını düşünürsən?
– Mən oynamaq, kluba töhfə vermək istəyirəm. Baş verənlərin hamısının bir hissəsi olmaq niyyətindəyəm. Daha çox işləyəcəm. Buradakı hər kəslə yaxşı münasibətim var.
CAVAD