Premyer-liqa
“Bakcell Arena” yüklənməyə dözmədi
Bakıda azsaylı təbii ot örtüklü meydanlardan olan &l…
Bakıda azsaylı təbii ot örtüklü meydanlardan olan “Bakcell Arena” da “yaman” günə düşüb. Futbolinfo.az xəbər verir ki, “Neftçi”nin ev oyunlarını keçirdiyi stadionun qazonu bərbad vəziyyətdədi.
Hətta Premyer Liqanın 12-ci turu çərçivəsində keçirilən “Böyük oyun” – “Neftçi” – “Xəzər Lənkəran” oyunu da bu cür pis şəraitdə baş tutdu.
İnşa olunduqdan bu yana ölkənin əsas arenası olan Tofiq Bəhramov adına Respublika stadionuna qənim kəsilən, avrokubok matçlarını və yığmanın əsas görüşlərini qəbul edən “Bakcell Arena”nın niyə bu günə düşdüyünü araşdırmaq istədik. Düzdü, dünən baş çəkdiyimiz stadionun ot örtüyünün vəziyyəti ilə yerində tanış ola bilmədik. Belə ki, başqa bir tədbir səbəbindən qazona qulluq edən şəxsləri və cavabdehləri tapa bilmədik.
Bununla belə, arenanın direktoru Kənan Məmmədovla danışa bildik. O, stadionun qazonunun pis vəziyyətdə olduğunu etiraf etdi: “Bəli, stadionun ot örtüyü elə də yaxşı vəziyyətdə deyil. Oyunlarda da bilinirdi. Bunun da səbəbi son vaxtlar oyunların çox olmasıdı. Özünüz də gördüyünüz kimi, ardəcəl oyunlar olur. Matçlar da çox olduğu təqdirdə ot zədələnir və pis vəziyyətə qalır. Ancaq biz çalışırıq ki, bu problemi aradan qaldıraq. Qazona yüksək səviyyədə qulluq göstərilir. Bunlar müvəqqəti problemlərdi”.
Qazonun yüklənməyə, sıx matç qrafikinə görə sıradan çıxması aydındı. Amma görünür bu işə məsul olan bolqar mütəxəssislər yalnız pul qazanmaq, bizimkilər isə onların başını sığallamaqla məşğuldu. Qazon həftədə bir oyuna dözmursə, Avropada hər həftə 2-3 oyunla yüklənən arenalar neyləsin?
Hər halda, belə bərbad durumda olan ot örtüyünü daha bir matçda görəcəyik. Həftəsonu baş tutacaq “Neftçi” – “Bakı” oyunundan sonra isə yığmanın toplanışı olacaq və “Bakcell Arena” nəfəs dərmək imkanı qazanacaq.
RÖYA KƏRİMLİ