Misli Premyer Liqasının 2-ci turunun dünənə nəzərdə tutlan yeganə oyununda gözlənilən nəticə qeydə alındı. Bəlkə də hesab bir qədər fərqli ola blərdi, amma “Qarabağ” layiqli qələbəsini qazandı.
İlk turda “Zirə”yə ev məğlubiyyəti onsuza da təzyiq altında olan “Qarabağ”da durumu bir qədər də gərginləşdirmişdi. “Turan Tovuz”la matçda növbəti büdrəmə vacib avrokubok oyunu öncəsi əhvalı tamamilə korlaya bilərdi. Lakin ağdamlılar rəqibə ciddi yanaşıb vacib qollar vurdular və qələbə təmin edildi.
Qələbə hər nə qədər vacib olsa da, baş məşqçi Qurban Qurbanov Avropa Liqasındakı cavab oyununu düşünüb əsas heyəti qorumuşdu. Amma ağdamlıların ikinci heyəti də “Turan Tovuz”u məğlub yola salmağa kifayət etdi. Meydan sahiblərinin təzyiqi rəqibin fərdi səhvinə səbəb oldu və hesab açıldı. Qalan vaxtda əks-hücumlarla fərqi böyütmək artıq “Qarabağ” üçün problem deyildi.
Juninyo və Adama Diakabinin qol hesabını açması da Qurbanovu sevindirməlidir. HJK ilə cavab matçında onun daha çox alternativi olacaq. Komandanın oyununda irəliləyişi də qeyd etmək lazımdır. Yeni transferlər ümumi ansambla daha çox uyğunlaşır və “Qarabağ” hədəflərinə doğru cəsarətli hərəkət edə bilər. Bəlkə də avrokubokda hər şey çox yaxşı alınmayacaq, amma Premyer Liqada çətin ki, kimsə əsas heyətlə oynayan çempiona badalaq vura bilsin.
Nə qədər qəribə səslənsə də, dünən “Turan Tovuz” 3:0 hesabı ilə qalib gəldiyi ilk tur qarşılaşmasından daha yaxşı təsir bağışladı. “Araz-Naxçıvan”ın darmadağın edilməsində rəqib qapıçının səhvi, müəyyən qədər də bəxt rol oynamışdı. Dünən isə komanda daha yaxşı təsir bağışladı. Müdafiədəki kobud fərdi səhv olmasaydı, ikinci hissədə “Qarabağ” çox əziyyət çəkəcəkdi.
Tovuzlular səfərdə iki oyuna qazanılan üç xalı qənimət saymalıdır. Qərblilər demək olar, yenidən qurulan heyəti tez toparlaya bilsə, bu mövsüm daha irəli getməlidir. Ancaq nəticələrdə sabitlik vacibdir. Darmadağınla qələbənin ardınca eynihesablı məğlubiyyət yalnız rəqibin “Qarabağ” olmasına görə bağışlana bilər. Növbəti turdakı Gəncə səfəri “Turan Tovuz”un potensialına daha çox aydınlıq gətirəcək.
FƏRİD