Braziliya Futbol Konfederasiyasının (CBF) prezidenti Samir Xaudun hərəkəti qalmaqala səbəb olub. O, məşuqələrinin dəbdəbəli səyahət xərclərini federasiya büdcəsindən ödəməkdə ittiham olunur. Bu barədə “Portal LeoDias” nəşri məlumat yayıb.
Ötən ilin mayında bu vəzifəyə seçilən Xaud hazırda dünya çempionatı çərçivəsində ABŞ-dədir. Xaud fitnes sahəsində sahibkar Kamila Kristina Andradeni ABŞ-yə gətirib — qadın iyunun 2-dən 10-na kimi Nyu-Yorkdakı “Hyatt Regency Grand Central” otelində qalıb. Onun oteldə qalmasının ümumi dəyəri 11 534 dollar təşkil edib. Otaq federasiya rəhbərinin adına bron edilib.
Kamila Nyu-Yorkda qaldığı müddətdə Samir iyunun 8-i Fortalezada qadınlardan ibarət milli komandanın ABŞ-yə qarşı matçını izləmək üçün Braziliyaya qayıdıb. 20 ildir evli olan Xaud Braziliyadan Mexiko şəhərinə yollanıb və orada iyunun 11-i DÇ-2026-nın açılışında birlikdə iştirak etmək üçün həyat yoldaşı Nataliya ilə görüşüb. Bir gün əvvəl isə Kamila Andrade Nyu-Yorku tərk edib.
Diqqətçəkən məqam odur ki, bu, Xaudun ətrafındakı qadınların iştirak etdiyi beynəlxalq səfərlər üçün təşkilatın resurslarından istifadə etdiyi ilk hal deyil — ötən ilin dekabrında bloger və əczaçı Tamires Fernandes Barsellos “Flamenqo” və PSJ arasında keçirilən Klublararası Dünya Çempionatının finalını izləmək üçün Rio-de-Janeyrodan Qətərə yollanıb. Səfərə biznes-klass təyyarə biletləri və “The Ritz-Carlton Doha” otelində gecələmə daxil olub. CBF bunun üçün 3 382 dollar məbləğində hesabları ödəyib.
Federasiya rəsmi bəyanat yayaraq bütün ittihamları rədd edib və bildirib ki, rəhbərlik “etik dürüstlük” prinsiplərinə sadiqdir, bütün xərclər isə müstəsna olaraq institusional və işgüzar xarakter daşıyır.
