Ölkə futbolu
AFFA-da başqa bir Elxan dönəmi: Məmmədov ABŞ-dan bəd xəbər gözləyir
AFFA daxilində icraçı vitse-prezident Elxan Məmmədovu əvəz etməyə çalışanların sayı artır. İllərdi qurum daxilində “mehriban düşmən” rolu oynayan Elxan Tağızadə səhnəyə çıxmaq üçün uyğun məqamın çatdığını düşünənlərdəndi.
Futbolinfo.az xəbər verir ki, bu şəxs onsuz da illərdi AFFA-dadı. Müxtəlif vəzifələrdə çalışan, heç vaxt üzə çıxmayan, ortada yeyib qıraqda gəzənlərdən olan Tağızadə tənqidlərdən yayına bilib. Daim baş rolda olsa da, vacib qərarların verilməsində önəmli rol oynasa da, məsuliyyətdən qaçmağı bacarıb. 14 ildi Azərbaycanda futbolun kökünə balta çalanların komandasının sadiq üzvü kölgədə gizlənməklə məşğul olub.
Millinin bütün səfərlərinə yollanan, kabinetlərdə strateyaların müəyyənləşməsində söz sahibi olan bu şəxs treyderdi. O, AFFA-nın əsas sponsoru olan SOCAR-ın neft tacirlərindən biridi, müəyyən miqdarda neft məhsullarının satışını təşkil edir. Xüsusi qabiliyyət yiyəsi deyil, sadəcə, hamilərinin sayəsində özünü sistemə pərçim edib.
Tağızadə AFFA-da kiçik vəzifə tutur. İllərdi fəaliyyətinin nədən ibarət olduğu bilinməyən İctimai Futbol Təşkilatları İctimai Birliyinin rəhbəridi. Bu qurumun hər hansı ciddi layihəsi, ortaya qoyulası işi yoxdu. Sadəcə, yüksək maaşa və əlavə qazanclara sahib olan Elxan bəy Konfranslarda lazım olan səs sayını düzəltmək üçün idarədici komandanın etibar etdiyi fiqurlardandı.
İndi Tağızadə nəhayət, üzə çıxmağı lazım bilib. Himayədarlarının birinci adamı olan Elxan Məmmədovun nüfuzdan düşməsi, tapşırılan işlərdə uğursuz olması səbəbindən gözdən çıxarılması bu adamı həvəsləndirib. Yayda – AVRO-2020-nin Bakıda keçiriləcək oyunlarından sonra mümkün islahatlar zamanı Tağızadənin önə şıxmaq niyyəti var. Məmmədov “vurulmayacaq”, başqa vəzifəyə göndərilməlidi, belədə onun postuna ikinci Elxan iddialıdı.
AFFA-nı idarə edənlər yalançı islahat aparmaqla sistemi, strategiyanı yox, yalnız adları dəyişmək niyyətindədi. Belədə Tağızadə adaşının postunu tutub, himayədarlarının yeni “əl uşağı” olmağa çalışır.Təbii ki, bir Elxanı digərinin əvəz etməsi heç nəyi dəyişməyəcək. Amma bu kartdan istifadə edənlər ictimaiyyəti aldatmaq niyyətindədi.
İndiki halda, bu plan Tağızadənin işinə yarayır. O, əməli fəaliyyətə başlayıb, özünü Məmmədova layiqli əvəzedici görür. İctimai birliyin rəhbəri dəstələrinin başındakıları onların maraqlarını təmin edəcəyinə inandırmaqla məşğuldu.
Elxan Məmmədova gəlincə, icraçı vitse-prezident çox narahatdı və perspektivinin parlaq olmadığını bilir. Futbolda yaratdığı üfunət artıq onun özünü də boğur, uzun müddət davam gətirməyəcəyini bilir. AFFA-da səlahiyyətlərini kifayət qədər artırıb, faktiki qurumun əsas idarəedicisidi. İşlər bərbad getdiyindən bütün tənqidlər ona yönəlib, illərdi görülən yanlış işlər üzündən çıxış yolu görünmür.
Bu səbəbdən Məmmədov öz təbliğatı ilə məşğuldu və daha yüksək vəzifəyə getməyə çalışır. ABŞ-da ağır xəstəlikdən müalicə olunan və sağalması, normal fəaliyyətə dönüşü gözlənilməyən gənclər və idman naziri Azad Rəhimovun yerinə göz dikən Elxan bəy özü üçün şad xəbər olacaq bəd xəbəri gözləməkdədi. Düzdü, Məmmədov nazir getdikdən sonra da futboldan əl çəkmək niyyətində deyil, buranı əlaltılarından birinə tapşırmaq istəyir. Tağızadə isə əlaltı olmağı yox, eyni olan himayədarlarından dəstək alaraq, müstəqil fəaliyyət göstərməyə çalışır.
AĞA
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-17 10:49
12 komandalı çempionat: necə etməli?
- Ölkə futbolu2024-04-16 09:10
Lunyov “Qarabağ”dan ayrıla bilər
- Ölkə futbolu2024-04-17 09:23
Mirzov “Neftçi”dən ayrılır: Premyer Liqadan təklifləri var