Ölkə futbolu
AFFA – “Qarabağ” müqayisəsində… Hər şey “Ortalık”da!
Son 10 il futbolumuz adına çox önəmli nəticələr qazanılıb. Əvvəlki rəhbərliyi ilə ilk dəfə avrokubok qruplarına qalan “Neftçi”, bunu 2 dəfə bacaran “Qəbələ”, qitə arenasını öz çempionatına çevirən, Çempionlar Liqası, Avropa Liqası və Konfrans Liqasının hamısında qruplara düşən, indi də ilk dəfə qrup səddini adlayan “Qarabağ”…
Bütün uğurlarda klubların imzası var – vicdanlı, səriştəli, peşəkar idarəçiləri olan klubların. Adlarını çəkdiklərimizi bir kənara qoysaq, son 10 ildə Azərbaycan futbolunun yerində bomboz bir boşluq qalar. AFFA-nın 14 ildi hakimiyyətdə olan, hər il 50 milyon manatdan çox vəsaiti havaya sovuran, onu vecsiz əcnəbilərə yedirdən, mənasız layihələrə dağıdan rəhbərliyinin bizi nə qədər geri saldığını elə bu mənzərə sübut edir.
Bu gün az qala hər fürsətdə dövlətdən mükafat, imtiyaz gözləyən veteranlar var. Onların oynadığı, işlədiyi yeganə klubumuz “Neftçi” SSRİ çempionatları ərzində bir dəfə də olsun Qazaxıstandan qələbəylə dönməmişdi. Çünki o komanda indiki milli komandamıza bənzəyirdi – Azərbaycan ruhu yox idi, beynəlmiləl komanda idi, pulyemə maşınıydı. “Qarabağ” isə bu ölkəyə ilk səfərindəcə tarixi uğura imza atdı, Azərbaycan klubları üçün hədəfləri bir qədər də böyütdü. Artıq bu yay olduğu kimi, bir mərhələ keçməyin, hətta onu da bacarmamağın bəraəti olmayacaq, hamı “Qarabağ” kimi olmağa borcludu.
“Qarabağ” qrupunun lideridi, evdə “Omoniya” ilə, səfərdə əsas rəqibi “Bazel”lə matçı qalıb. Hətta qrup liderliyi, deməli, 1/8 finala vəsiqə şansı həddindən artıq çoxdu. Hələliksə, ağdamlıların qrupdan pley-offa – 1/16 finala yüksələcəyi dəqiqləşib, ilk dəfə avrokubokda mübarizəyə yazda davam edəcəyik. Dünən -14 dərəcədə nəfəsləri donduran qələbəni təmin edən “Qarabağ” daha yaxşısını bacarsa, təəccüblənməyəcəyik, bu komanda illərdi bizi məhz böyük hədəflərə öyrədib.
“Kayrat”la səfər matçının stenoqramına varmaq, oyunu şərrh etmək, analtik yazı hazırlamaq olar. Lakin bütün bunlar nəticəni dəyişməyəcək, əksinə, hamını xoş hisslərdən məhrum qoyacaq, uzaqlaşdıracaq. Səhvləri analiz etmək, üstünlükləri daha da yaxşılaşdırmaq məşqçilərin işidi, bunun peşəkarı olan Qurban Qurbanov və komandası boş dayanmayacaq. Bəlkə də kiprlilər üzərində növbəti ev oyununda qələbəyə sevinəcəyimiz an Qazaxıstandan daha bir xoş xəbər alacaq, daha böyük uğuru daha tez qazanacağıq…
Noyabr qələbələr ayıdı, bayramlarımız sıralanır, “Qarabağ”sa yenilərini əlavə edir.
4 noyabrda
44 günlük Vətən müharibəsində zəfərimizin elan olunmasının ildönümünə
44 gün qalarkən
4-cü turda
44-cü avrokubok matçında…
“Qarabağ” tarixi uğura “Ortalık”da imza atdı. Qazaxıstanın bu stadionun adı, qardaş xalqlar olduğumuzdan, bizdə də yaxşı başa düşülür. Amma bu söz bizdə başqa məqsədlə, bir az fərqli mənada da da işlədilir. Nəticə var, hər şey Ortalıqdadı. Kimin bu illər ərzində nələr etdiyi, hansı inkişaf yolu keçdiyi, nəyə nail olduğu apaçıq Ortalıqdadı.
Hər ay əcnəbi sükançısı, səriştəsiz idarəçiləri ilə reytinq sıralamasında geriləyən milli komandamız, hər ay Azərbaycanı klub reytinqində təkbaşına yüksəklərə qaldıran “Qarabağ” fərqi var. Top yumru, meydan düz – o zaman fərq nədi ki, klubda uğur qazanmaq olur, milli komanda ilə yox? Legionerlər? STOP! Milli komandada xorvat, fars, ukraynalı, rus daha çoxdu, nəinki “Qarabağ”da.
AFFA ömrümüzdən daha 3-4 ili oğurlamaq üçün yeni layihəyə start verir. Milli komandaya türkiyəli məşqçi gətirməklə guya vəziyyəti düzəldəcəklərinə ümid edirlər. Halbuki bizə türkiyəli məşqçi yox, “Qarabağ”da olduğu kimi, türkiyəli idarəçilər lazımdı.
Yeni model axtarırsızsa, gözünüzün önündədi. Elxan Məmmədov, Vaqif Sadıqov və başqa vecsizləri atın bir kənara. Abdulbari Gözəl, Tahir Gözəl, Fevzihan Aras, Əmrah Çəlikəl kimi işini vicdanla görən, bəlli strategiyası olan, onun uğurlu alınması üçün hər şey edən türkiyəli idarəçilər, Asif Əsgərov kimi sıfırdan yetişdirilən yerli kadrlar və hər zaman dəstək verilən, bunun qarşılığını yubatmayan, artıqlamasıyla qaytaran Qurban Qurbanov kimi məşqçi var. Onların etdiklərini yamsılayın, yetər.
Qarabağ işğalda ikən bu bölgənin adını daşıyan komanda çox əziyyətlər gördü, sınaqlardan çıxdı. Lakin bu xalq kimi nəfəsi kəsilmədi, qüruru əyilmədi, dik dayandı. Və işğal bitincə uğurları daha da artdı, klub böyüdü, Avropaya meydan oxuyur…
…Azərbaycan futbolundakı işğal da davam edir, bütün məhrumiyyətlərə rəğmən, “Qarabağ” nəfəs alır, nəfəs aldırır. AFFA-nın işğaldan azad olacağı günləri bir özünüz düşünün…
Hər şey ORTALIQdadı…
VÜSAL MAHMUDOV