Milli komanda
AFFA təkzib edir, amma Sağlam da yalan danışmaz…
Türkiyəli tanınmış məşqçi Ərtuğrul Sağlam yenə Azərbaycanı yada salıb. Bu dəfə o, sosial şəbəkədə etdiyi paylaşımda millimizdən dəvət almasından bəhs edib.
Futbolinfo.az xəbər verir ki, təcrübəli mütəxəssis iki həftə əvvəl AFFA-dan təklif aldığını qeyd edib: “Beşiktaş”ın könlümüzdəki yeri hər zaman özəl və ayrı olsa da, hazırda “Kocaelispor”la inandığımız, müəyyənləşdirdiyimiz hədəfə doğru yürüyürük. İki həftə öncə Azərbaycan milli komandası üçün də eyni proses baş vermişdi. Diqqət, nəzakət və gözəl mesajlar üçün təşəkkür edirəm. Yeganə düşüncəmiz “Kocaelispor”dur”.
“Kayserispor”, “Beşiktaş”, “Bursaspor”, “Yeni Malatyaspor”, “Samsunspor”, “Traktor Sazi” kimi komandalarda çalışan Sağlam 2023-cü ilin yayından “Kocaelispor”a rəhbərlik edir. O, bursalıları tarixndəki yeganə çempionluğa qovuşdurmaqla məşhurlaşmışdı.
Ümumiyyətlə, Sağlamın adı uzun müddətdir milli komandamızla yanaşı hallanır. Vaxtilə Canni de Byazi də bir neçə il millimizdən təklif gözləmiş, sonda arzusuna çatmışdı. Bəlkə Ərtuğrul da günlərin birində yığmamızda görünəcək. O, bir dəfə hətta xüsusi dəvətlə Bakı Olimpiya Stadionunda yığmamızın matçını izləmişdi.
Maraqlıdır ki, Sağlamın açıqlamasına münasibət bildirmələrini istədiyimiz AFFA-nın mətbuat katibi Elnur Məmmədli məşqçinin dediklərini təkzib etdi. O, assosiasiya rəhbərliyinin adından belə bir hadisənin baş vermədiyini əminliklə söylədi: “Nə Sağlama, nə də başqa kiməsə təklif göndərilməyib, danışıq aparılmayıb”.
Lakin Sağlamın yalan danışması da inandırıcı deyil. Yəqin ki, hansısa menecer AFFA adından onunla müzakirələr aparıb. Adətən belə işləri “Sumqayıt”ın menecer-prezidenti Riad Rəfiyev görür, ona qurum adından danışmaq ixtiyarını da vitse-prezident olan daydayı Elşad Nəsrov verir. Nəsirovun milli komandaya məşqçi axtarışıyla bağlı yaradılan İşçi Qrupun rəhbəri olduğunu nəzərə alsaq, Robert Prosineçki, Nikola Yurçeviç, Canni de Byazi kimi əcnəbiləri milliyə gətirib faizini qazanmış Rəfiyevin yenidən fəaliyyətə keçməsi təsadüf sayılmamalıdır.