Aqressiya bir nəfərə görədi – Şamaxıya sürgün, yoxsa bölgəyə qayıdış?

Dərd klubun adını dəyişməsi deyil, bu, nə ilkdi, nə son. Əsas olan futbolun özünün Şamaxı batan kimi batmasıdı. Bəlkə də rəmzi mənadı, simvolik sonluqdu – inkişafını təmin edə bilmədikləri futbolu Şamaxıda batırmaq, dəfn etmək istəyirlər.

“Keşlə”nin Şamaxıya sürgünü, yoxsa futbolun bölgələrə qayıdışı – olayı hamı istəyinə, niyyətinə, şəxsi düşüncəsinə görə şərh edə, ona ad qoya bilər. Hamının fikrinə hörmət etmək lazımdı.

Məncə, “Keşlə”nin “Şamaxı”laşması süngüylə qarşılanmamalıdı. Bunu etsək, özümüz özümüzü “vuracağıq”, axı, illərdi paytaxtdakı qondarma klubları rayonlara köçürməyin vacibliyini biz təbliğ edirik. O zaman AFFA başı daşa dəyəndən, illəri boşa verəndən sonra yekunda bu qərara gə(tiri)libsə, “Niyə?” deməməliyik, “Dediyimizə gəldiniz!” söyləməliyik. “Zirə”, “Sabah” kimi öz sposoru olan klublarla işimiz yox, birbaşa SOCAR-ın/AFFA-nın əlinə baxan “Səbail” də Bakıdan qovulmalıdı – Mingəçevirə, Bərdəyə, Qaxa, Qusara…

Sosial şəbəkədə, mətbuatda olaya fərqli münasibətin bircə səbəbi var – AFFA-ya, konkret olaraq, icraçı vitse-prezident Elxan Məmmədova qarşı aqressiya. Bu adamın hiyləgərliyi, məkri, niyyəti hamıya bəllidi və hamı onun istənilən addımının arxasında səbəb axtarır. Hamı yaxşı bilir ki, onun heç bir addımı səmimi ola bilməz, mütləq küncə qısdırılıb, özünü qorumaq üçün futbolun xeyrinə addım atmaq qərarına gəlib. Futbolu düşünən olsaydı, hakimiyyətdə olduğu 14 il ərzində bölgələrdə futbolun inkişafı üçün mütləq nələrsə edərdi.

Düzdü, bir az qəribədi, dünənə kimi klubu olmayan rayonun indi ölkə çempionu olmuş, kuboka sahib çıxmış titullu təmsilçisi var. Rayonun vaxtilə güclülər arasında çıxış etmiş “Şirvan”ını dirçəltmək əvəzinə “Keşlə”ni bura calaq edirlərsə, deməli, niyyət görüntü yaratmaqdı.

Dövlət rəhbərliyi ictimaiyyətin reaksiyalarına diqqətlidi, sosial şəbəkəni izləməyə məcburdular və qərarlar buna görə verilir. Yəqin, Şamaxıdakı açılışdan sonra fərqinə varıblar ki, hətta Region Liqasında həvəskar komandası olmayan bir rayonda müasir stadionun lentini kəsiblər. Sual yaranıb, səbəb soruşulub və Elxan Məmmədovun dəstəsi dərhal variant tapıblar. Yekunda tapşırıq, razılıq alınıb və “yuxarıların göstərişidi” adıyla “Keşlə”nin qısa müddətdə sürgün edilməsi lazım bilinib. Qərar qəfil verildiyindən mətbuata ilkin informasiyanın ötürülməsinə, ictimai rəyin öyrənilməsinə imkan olmayıb.

Vətənimizin dilbər guşələrindən biri olan Şamaxıda süni örtüklü stadion – ürək ağrıdan, təəssüf doğuran faktdı, lakin reallıqdı. “Keşlə” Bakıda da illərdi sintetik qazonda oynayırdı, süni rəhbərliyini götürüb bölgəyə də eynilə davam etməyə gedəcək. Və idarəçilik yenə eyni adamların əlində olacaq, büdcəni yenə eyni simalar dağıdacaq, futbolun inkişafıyla bağlı nəyəsə ümid etməyin. Sadəcə, dünən Bakıda qaz vurub qazan dolduranlar indi bölgələrlə bağlı narazılığın üstündən keçərək eyni işi görəcək. Halbuki ölkədə futbola münasibət dəyişməyincə, marketoloqlar mütəxəssislərlə əvəzlənməyincə, düzgün inkişaf planı seçilməyincə dəyişən yalnız klubların adı, “səhnədəki dekorasiyalar” olacaq.

“Keşlə”nin “Şamaxı”ya çevrilməsinə münasibətdəki təzad, fikir haçalanması bundan ibarətdi. İnsanlar mahiyyətin dəyişməsini istəyir, formanın yox. Həm də yuxarıda qeyd etdiyim kimi, əsas aqressiya Elxan Məmmədovun şəxsinə qarşıdı. Aid olduğu mütəşəkkil dəstə ilə hətta dövlətin özünə təhlükə olan bu adamı ictimaiyyət qəbul etmir. Dünən addəyişmə ilə bağlı yazılanlara gələn şərhlərin mütləq əksəriyyətində məhz bu amil aşkar görünür.

Ən pisi odur ki, Məmmədovu qoruyan qüvvələr onu dövlət rəhbərliyinin  himayəsindəymiş kimi göstərir, bunun təbliğatını aparır. Belədə məqsədli şəkildə AFFA rəhbərliyinə qarşı olan tənqidi dövlətin özünə yönəldirlər, onları öz çirkablarına çəkirlər. Sabah heç kim AFFA rəhbərliyini tənqid etməyəcək, hamı onlara dəstək verib səriştəsiz idarəçiliyinə göz yumanları hədəfə alacaq və haqlı olacaqlar.

VÜSAL MAHMUDOV

P.S.: Rövnəq Abdullayev futbola qayıtdığını demişdi. Futbol bir yana, görəsən, prezident heç olmasa, AFFA-ya qayıdıb işğal edilmiş kabinetinə qayıda bilibmi?