Müsahibə
Axundov böyük futbola qayıtmayacaq: “De Byazi nəticə çıxarmalıdır”
“Canni De Byazi AVRO-2024-ün ilk seçmə oyunlarından nəticə çıxarmalıdır” – bunu AFFA İcraiyyə Komitəsinin üzvü Zaur Axundov deyib.
O, İK-nın bugünkü iclasında italiyalı mütəxəssisin hesabatına qulaq asdıqlarını bildirib: “O, öz fikirlərini dedi. Biz də mövqeyimizi bildirdik. İtaliyalı mütəxəssisin işini davam etdirməsini qərara aldıq”.
Axundov baş məşqçi ilə vidalaşmaq və yığmanın yerli mütəxəssislərdən birinə tapşırılması iddiasına da toxunub: “Elə müzakirə olmayıb. Bunun haradan yayıldığını bilmirəm. Gündəmdə bu cür məsələ yoxdur”.
İK üzvü həmçinin vurğulayıb ki, qeyd edilən oyunlardakı uğursuzluqlarda təkcə baş məşqçi deyil, həmçinin futbolçular da məsuliyyət daşıyırlar (Report).
Bundan əlavə, Axundov iclasda futzal üzrə dünya çempionatının elit-raundu, uşaq futbolu və klublardakı akademiyalarla bağlı məsələlərə də baxıldığını diqqətə çatdırıb. O, özünün böyük futbola qayıtmaq fikrinin olmadığını, bütün diqqətini futzala yönəltdiyini bildirib: “Bu növün inkişafı üçün regionlarda, olimpiya komplekslərində bütün şərait var. İK-nın toplantısında da mövzu müzakirə edildi. Növbəti iclasda komanda sayının 8 və ya 10-a çatdırılması ilə bağlı işlər görmək istəyirik. Regionlardan 3-4 komandanın olması da planda var”.
O, Yüksək Liqada legioner limitinin dəyişə biləcəyini vurğulayıb: “Bu gün belə müzakirə olmadı. Mayda yenidən iclas olsa, məsələyə baxılacaq. Legionerlərə ciddi limit qoymaq istəyirik”.
Axundov U-19 yığmasının Avropa çempionatının əsas seçmə mərhələsindəki uğursuz çıxışı ilə bağlı da danışıb: “Baş məşqçi ilə görüşümüz olacaq. Hələlik hesabat hazırlanır. Futzalda gənclərin inkişafı lazımdır. Milli komandanın oyunçularının əksəriyyəti 30 yaşına çatıb, bu yaş həddini keçənlər də var. Hazırda U-17 və U-19 bizim üçün prioritetdir. Yığmanın baş məşqçisi Joze Alesio U-21-in də təşkil olunması ilə bağlı təklif irəli sürüb. Biz buna baxıb AFFA ilə müzakirə etməliyik”.
Federasiya rəhbəri böyük futbolda olduğu kimi futzalda da klublara maliyyə yardımının nəzərdə tutula biləcəyini diqqətə çatdırıb: “AFFA prezidenti baş katibə göstəriş verdi ki, təklif hazırlansın. Ümid edirəm ki, yeni mövsümdən klublara böyük futboldakı kimi maliyyə ayrılacaq. Onlar da maliyyəni klubun və gənclərin inkişafı üçün yönəldəcəklər”.
Axundov son olaraq “Araz Naxçıvan” klubu haqqında fikirlərini bölüşüb: “Bir neçə il əvvəl komanda dördlər finalında oynadı, bürünc medal qazandı. Son illərdə nəticələrimiz mənfidir. Belə olmasını istəmirdik. Avropada ilk “altılıq”da idik. Bu da bizim səhvimizdir. Böyük futbolda olduğum vaxt futzala lazım olan diqqəti ayıra bilmədim. Yeni mövsümdən komandanı gücləndirmək və yenidən Avropada sözümüzü demək fikrindəyik”.
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…
- Digər idman növləri2024-04-12 00:29
“Anadolu Efes” növbəti mərhələdə