“Azərbaycan evim kimidir, burada həm yaxşı, həm pis günlərim olub”

“Zirə”nin müdafiəçisi Donald Geryenin futbolinfo.az-a müsahibəsi

• Çətin Tovuz səfərindən qələbə ilə qayıdırsız. Oyun barədə düşüncələrin nədir?
• Çox sevinirik ki, 3 xal qazandıq. Meydanda yaxşı iş gördük. Çətin oyun oldu, çünki meydança amilini hamınız bilirsiz. Son həftəni tamamilə bu oyunun hazırlığına həsr eləmişdik. Çox gərgin şəkildə hazırlaşırdıq. Ümumiyyətlə, çempionatın elə vaxtıdır ki, hər xal vacibdir. Nəticə əlbəttə ki, biz istəyən kimidir və razıyıq.
• “Turan Tovuz” son turda iddialı “Sabah”ı məğlub etmişdi. Matçdan əvvəl bu sizi narahat etmirdi?
• Biz komandamıza inanırıq və güvənirik. Səfərə 3 xal üçün yollanmışdıq. Həqiqətən “Turan Tovuz”un “Sabah” üzərində qələbəsi onların gücündən xəbər verirdi. Futbolda qələbə və məğlubiyyət mütləq olacaq. Amma indiki halda bizə qələbə lazımdır. Bu cür çıxışımızı davam etdirməliyik. Məşqçinin tapşırıqlarını yerinə yetirməliyik. Bizim çoxlu qələbəyə ehtiyacımız var.
• Rəqib düşündüyünüz kimi oynadı?
• Dediyim kimi, onların son turda “Sabah”ı 2:0 məğlub etməsini heç kim unutmayıb. Amma bu, bizim üçün əsas deyildi. Öz oyunumuzu göstərməyə getmişdik. Yaxşı hazırlıq keçmişdik və bu da bizi qalibiyyətə aparacaqdı. Hər oyun artıq vacibdir və çox ciddi yanaşırıq.
• Özünü yenidən Azərbaycan Premyer Liqasında necə hiss edirsən?
• Bu çempionat mənim üçün tanışdır. Burda “Qarabağ”da, “Neftçi”də yaxşı günlər keçirmişəm. Özümü əla hiss edirəm. Məşqçimiz Rəşad Sadıqov da mənə dəstək olur, komanda yoldaşlarım da məni dəstəkləyir. Bura mənim evim kimidir. Yaxşı günlərim olub, pis günlərim olub. “Qarabağ”da oynayarkən qızımı itirdim, onlarla Çempionlar Liqasının qrup mərhələsində oynadım. Yəni hər cür anlarım var. Həyatdır və güclü olmalıyıq. Mən Haitidə, Polşada və Azərbaycanda çox oynamışam. Bu 3 ölkə də evim kimidir. “Zirə”də oynamaqdan xoşbəxtəm.
• Uğurlu ola biləcəksən?
• Düşünürəm ki, bəli. Əgər işimə daha çox köklənsəm, uğur qazanacam. Məşqçi də tapşırıqlarını verir və hər şey yaxşı olacaq.
• Çempionatda artıq 10 komanda var…
• Bu yaxşı haldır. Komandaların sayı çoxaldığına görə mübarizə gərginləşib və hər matç böyük əhəmiyyət daşıyır. Bizim məqsədimiz hər oyunda qələbə qazanmaqdır. “Zirə” yaxşı komandadır və biz yüksək yerlərdə olmalıyıq.
• Artıq düşünürsən ki, futbol karyeranı Azərbaycanda yekunlaşdırmalısan?
• Bundan sonra maksimum 5-6 il futbol oynayaram. Yalnız Allah bilir ki, karyeramı Azərbaycanda bitirəcəm, yoxsa yox. Əlbəttə ki, istəyərəm, amma bu, bəlli deyil.
• Növbəti turda “Şamaxı” ilə qarşılaşacaqsız. Onlar da “Sabah”ı udublar…
• “Sabah” üzərində evdə qələbə qazandılar. Matçı izlədim və maraqlı oyun oldu. Rəqib yaxşı və mübariz komandadır. Çalışacağıq ki, meydanda hər şeyimizi qoyub qalib gələk.

CAVAD