“Azarkeşləri sevindirmək istəyirik” – Adrian Mutu

“Neftçi”nin baş məşqçisi Adrian Mutu Konfrans Liqasının 3-cü təsnifat mərhələsində “Beşiktaş”la keçiriləcək ilk oyunla bağlı fikirlərini bildirib.

Futbolinfo.az xəbər verir ki, rumıniyalı mütəxəssis qarşılaşmanın oynanılacağı “Neftçi Arena”da təşkil olunan mətbuat konfransında onları çətin mübarizə gözlədiyini bildirib:

“Türkiyənin ən güclü komandalarından birinə qarşı bizi çətin oyun gözləyir. Azarkeşlərimiz əmin ola bilərlər ki, bu matçda yüz faiz gücümüzü ortaya qoymağa hazırıq. Üç gündən bir uğurlu çıxış etmək üçün komanda geniş heyətə malik olmalıdır. “Kəpəz”lə çempionat matçında yüz faiz gücümüzü ortaya qoymağa çalışdıq. Yorğunluq olsa belə, qələbə qazanmalı idik. Yəni bu səbəbin arxasında gizlənə bilmərik. “Beşiktaş”ın necə komanda olduğunu bilirik. Hər iki komanda öz ölkəsinin böyük komandasıdır. Avropa arenasında bu cür görüşlərdə hər şey baş verə bilər”.

Mutu yeni transferlər üzərində çalışmaların davam etdiyini açıqlayıb: “Müdafiənin sağ cinahı üçün Koffini transfer etmişdik. Təəssüf ki, ilk görüşdə gözlənilmədən zədələndi. Hazırda başqa bir neçə oyunçu ilə də danışıq aparırıq. Komandaya yeni futbolçular cəlb etməyə çalışırıq. Hər mövqedə rəqabətin artması üçün yeni transferlər lazımdır. Öncədən proqnozlaşdırılan komanda kimi görünmək istəmirik. Yerli çempionatda isə limit var, mütləq şəkildə 4 yerli çıxış etməlidir. Bunları da nəzərə alırıq”.

Rumın məşqçi hücum xəttini gücləndirəcəklərini əlavə edib: “Hücumçu transferində gecikirik. Bir neçə maraqlı oyunçu ilə danışıq aparırıq. Müəyyən çətinliklər var. Ancaq hücum xəttinə də yaxşı futbolçular cəlb edəcəyik”.

O, azarkeşlərdən səbirli olmağı istəyib: “Neftçi” kimi böyük klubda hər məğlubiyyət komanda üzərində təzyiq yaradır. Fanatlar da başa düşməlidirlər ki, güclü komanda qurmaq istəyirik. Transferlərdə gecikmələrlə yanaşı, bəxtsizliklərlə də üzləşdik. Ömər Buludov, Eddi İsrafilov zədələndilər. Qarşıdakı görüşü buraxmalı olacaqlar. Azarkeşlər səbirli olsunlar, getdikcə daha güclü “Neftçi” olacağıq. Hazırkı “Neftçi” istədiyim komandanın 60 faizi deyil. Azarkeşlərimizin bizdən gözləntisinin çox olduğunu bilirəm. Amma vəziyyətə real baxmalıyıq. “Beşiktaş”la görüşdə də qələbə qazanmaq üçün əlimizdən gələni edəcəyik. Reallığa baxsaq, “Neftçi” hazırda qurulmaq dönəmində olan komandadır. Biz də hər oyunda qələbə ilə azarkeşlərimizi sevindirmək istəyirik”.

Mutu təkcə Rumıniyada futbolçu axtarışında olmadıqlarını söyləyib: “Rumıniya çempionatından iki oyunçu gətirmişik. Hazırda yalnız Rumıniya bazarına köklənməmişəm. Mənim üçün ən önəmlisi odur ki, “Neftçi”yə faydalı futbolçular gətirək”.

Baş məşqçi avrokuboklarda uğurlu çıxış üçün çempionat görüşlərinin təxirə salınmasının onlar üçün vacib olduğunu sözlərinə əlavə edib: “Sabahkı üç oyun Azərbaycana ölkə olaraq vacibdir ki, avrokuboklarda yaxşı nəticələr qazanılsın. Fürsətdən istifadə edib çempionatı təşkil edən qurumdan da anlayışlı olmağı istəyirəm ki, avrokubok oyunlarına daha enerjili hazırlaşa bilək. Avrokuboklarda uğurlu olmaq istəyiriksə, dincəlməyə də vaxt ayırmaq lazımdır”.