Müsahibə
“Bəziləri bizi hesabdan siliblər”
“Qəbələ” klubunun qanalı hücumçusu Samuel Tettehin futbolinfo.az saytına müsahibəsi
– Çempionatın ilk yarısını sonuncu pillədə tamamladınız. Bu nəticəni gözləyirdiniz? Komandanızın qışaqədərki çıxışını necə dəyərləndirirsiniz?
– Komandanın performansı haqqında onu deyə bilərəm ki, bizim üçün qənaətbəxş nəticə olmadı. Aradan qaldırmalı olduğumuz çatışmazlıqlar, düzəldiləsi məqamlar var. Biz futbolçular üzərimizdə daha çox məsuliyyət hiss etməliyik.
– Fasilədən əvvəlki son turda evdə “Sabah”ı məğlubiyyətə uğrada bildiniz. Bu qələbə sizi çempionatın ikinci yarısına uğurlu başlamaq üçün motivasiya edəcəkmi?
– Bəli. Bəzi oyunlarda yaxşı çıxış edə bilirdik, bəzən isə bəxtimiz gətirmirdi. Şübhəsiz ki, “Sabah” üzərindəki həmin qələbə növbəti oyunlara çıxmaq üçün inamımızı artıra bilər. Bu mənada “Sabah”la oyundakı qalibiyyətin böyük önəmi var.
– “Qəbələ” çempionatın cari mövsümündə ən çox qol buraxan komanda olmaqla yanaşı, ən az qol vuran iki komandadan biridir. Bir hücumçu olaraq, bunun səbəbini nədə görürsünüz?
– Meydanda daha artığını etməliyik. Qol şanslarımızdan lazımınca yararlanmalıyıq. Çoxlu qol epizodları yaradırıq, amma son nöqtəni qoya bilmirik. Son zərbə çatışmır. Komandanın bir hücumçusu olaraq, mən də özümü ələ almalı və mövsümün ikinci yarısında konsentrasiyamı itirməməliyəm. Bunu edə bilsək, qolların özü gələcək. Özümüzə daha çox inanmalıyıq.
– Misli Premyer Liqasının səviyyəsi sizi qane edirmi? Çempionatımıza tam uyğunlaşa bilmisiniz?
– Düzü, çempionatın səviyyəsi yaxşıdır. Burada çoxlu istedadlı futbolçu çıxış edir. Liqada yaxşı komandaların sayı çoxdur. Çempionata uyğunlaşdığımı söyləyə bilərəm. Sadəcə, məşqlərdə dayanmadan çalışmalı, üzərimdə daha çox işləməliyəm.
– Qəbələdə keçirdiyiniz ev oyunlarınızı az sayda azarkeşin izləməsi bir futbolçu olaraq, sizə necə təsir edir?
– Təbii ki, azarkeşlərimizin stadionu tam doldurmasını istərdik. Amma gəlməməklərini başa düşmək olar, çünki mövsümün ilk yarısında yaxşı iş görə bilmədik, nəticələrimiz ürəkaçan olmadı. Daha çox insanın stadiona gəlməsi üçün qalib gəlməyə başlamalıyıq və əminəm ki, bunu edəndən sonra azarkeşlərimizin, bizə dəstək olan insanların sayı artacaq.
– Qış fasiləsindən sonra çempionatda ilk oyununuzu “Sumqayıt”a qarşı keçirəcəksiniz. Mövsümün ikinci yarısına qələbə ilə başlamaq mümkün olacaq?
– Futbolda hər şey mümkündür. Yaxşı komandamız var, sadəcə üzərimizdə daha çox məsuliyyət hiss etməli və meydanda daha çox qaçmalıyıq ki, baş məşqçimizin tapşırıqlarını yerinə yetirə bilək. Rəqibə hörmətimiz var, “Sumqayıt” yaxşı komandadır. Bununla belə, məşqçilərin dediklərini meydanda edə bilsək və özümüzə inansaq, onları məğlubiyyətə uğrada bilərik.
– Necə düşünürsünüz, “Qəbələ” Premyer Liqadakı yerini qoruya biləcək?
– Təbii ki, Premyer Liqadakı yerimizi saxlaya bilərik. Bəlkə də bəziləri bizi hesabdan siliblər. Amma hələ çempionat bitməyib. “Sumqayıt”la oyundan başlayaraq hər şey dəyişəcək.
ABBAS