Ölkə futbolu
Baqaya rəhmət oxutduran Abasov
Qış fasiləsini gözlədiyini təkrarlamaqdan yorulmayan Samir Abasov mövsümün ilk iki dövrəsində qeydə alınacaq nəticələri boynuna götürmək istəmir. O, məğlubiyyətlər sıralandıqca əlinin altında istədiyi heyətin olmadığını bildirir, xeyli futbolçu ilə vidalaşacaqlarının anonsunu verir.
“Sumqayıt”ın baş məşqçisinin açıqlamaları qəribə görünməməlidi. Klubda işlər o qədər bərbad görülüb ki, Riad Rəfiyevin günahlarına kimsə şərik olmaq istəmir. Aleksey Baqanın adından istifadə edib komandanı səviyyəsi şübhə doğuran futbolçularla dolduran menecer-prezident, işlər yolunda getməyincə baş məşqçini dəyişdi. Amma Abasov ayıqdı, Rəfiyevin eyiblərinə şərik olmaq istəmir, bu komandanı özününkü bilmir, qışda öz heyətini qurmaq niyyətindədi.
Buna imkan olacaqmı? Bu sualın cavabın yanvarda alacağıq. Hələlik qışa kimi deməyə söz var, yanvarda yeni bəhanələr kəşf etmək lazım gələcək.
Vəziyyət elədir ki, Riad bəyin də məşqçini qınamağa cəsarəti çatmır. Halbuki bunu etmək olar. Çünki Baqa ilk 4 oyununda 2 xal toplamışdısa, Abasov bu müddətdə cəmi 1 xal əldə edib. Belaruslu oyun başına toplanan xal baxımından da daha yaxşı idi – o, 7 oyuna 3 heç-heçəyə nail olmuşdu, Abasov 4 oyuna 1 xal əldə edib. Yəni yeni gələn gedənə rəhmət oxutdurur.
Amma Rəfiyev Abasovu bu statistikayla divara qısnaya bilmir, çünki komandanı özünün bərbad hala saldığını bilir, transferləri özü edib, faydasız əcnəbiləri komandaya doldurub, bacarıqsız yerli futbolçuları sifarişlə heyətə qatıb.
Lakin əks statistika da var. “Kəpəz”də Yaşar Vahabzadə ilk 4 oyuna xal toplaya bilməmişdi, onun istefasindan sonra əvəzedici olan Xaliq Mərdanov da gəncəlilərin növbəti məğlubiyyətinə şahid oldu. 5 xalsız oyundan sonra komandanı qəbul edən Tərlan Əhmədov 6 matçın yalnız yarısında eyni aqibəti yaşayıb və 5 xal toplaya bilib. Deməli, heyət hər nə qədər bərbad komplektləşdirilsə də, əvvəlki məşqçi hər nə qədər uğursuz olsa da, eyni heyətlə daha yaxşı nəticə göstərmək olur. Əhmədovun bacardığını Abasov edə bilməyibsə, məşqçinin özünə də tənqidi yanaşması vacibdi.
“Zirə”nin layiqli qələbəsindən sonra “Sumqayıt”ın vəziyyəti bir qədər də pisləşdi. Komanda artıq Əhmədovun “Kəpəz”ini də özündən irəli buraxdı. “Kimyaçılar” toparlanmasa, Abasov eyni sözləri təkrarlamaqla rəğbət qazanmayacaq. Əsl məşqçi hər şəraitdə sələfindən daha yaxşısını bacarmalıdı, əks halda…
FƏRİD
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…