Ölkə futbolu
Bir səhvin fəsadı
Şahruddin Məhəmmədəliyev – yenə baş rol ifaçısı kimi görünür. Görünmür, özüdü ki, var.
“Qarabağ” dünən məhz qapıçısının texniki səhvi üzündən uduzdu. Belə səhvlərin sıralandığını nəzərə alsaq, artıq “Şah”ın psixoloji durumuna şübhə etmək istəyirsən. Eyni adam, oxşar səhvlər… Soyuqqanlı ola bilmirsənsə, deməli, düz-əməlli peşəkar da deyilsən.
İnsaf naminə, Məhəmmədəliyevin hətta təkbaşına “Qarabağ”ı xilas etdiyi matçlar da olub. Elə bu üzdən bəzən belə səhvlərin üzərinə çox dayanılmamasını istəmişəm. Ki, səhv hamıda olur, əvəzində komandanı xilas etdiyi məqamlar daha çoxdu. Dünən də azı 3-4 epizodda “çərçivə”də çox yaxşı qurtarışlar etdi. Amma və lakin… Şahruddin dünənki məğlubiyyətin əsas səbəbkarıdı!
Oyun 0:0 davam edərkən “Qarabağ” “Nant”ın qapısını top atəşinə tutmuşdu. Ardıcıl epizodlar yaradılır, qolun qoxusu gəlirdi. Və bu dəqiqələrdə Fransa təmsilçisinin çempionumuzu məyus etmək üçün heç bir şansı yox idi. Daha çox müdafiə haqda düşünən “bülbüllər”, topa sahib olmaq üçün bütün texnikalı oyunçuları döyüşə atan Qurban Qurbanovun yetirmələrinin zərbələrini dəf etməklə məşğul idi.
Belə məqamda Şahruddinin rəqibə qol hədiyyə etməsi bütün ssenarini pozdu. Oyunu topasahibolma üzərində quran Qurbanov, qələbəyə ehtiyac duyan rəqibin irəli atılmaq məcburiyyətini də hesablamışdı. Belədə fransızların müdafiəsindəki boşluqlar işimizə yarayacaqdı, yarayırdı da. Lakin “Nant” hesabda önə keçən kimi Zubir, Kadi və Ozobiçin hərəkət zonalarını bağladı. Halbuki hesabı ağdamlılar açsaydı, bu rəqiblə Bakıdakı, “Olimpiakos”la Pireydəki oyunların ssenarisi təkrarlanacaqdı.
Düzdü, “Qarabağ” bərabərlik qolunu vurdu, lakin komanda o qədər güc itirdi ki, son dəqiqələrdə fiziki cəhətdən çatdırmadı. Buraxılan erkən qol həm əks-hücumda oynamaq, ciddi üstünlük qazanmaq imkanlarının üstündən xətt çəkdi, həm də aparıcı oyunçuların yorğunluq üzündən əvəz edilməsindən sonra oyun intizamını pozdu. “Nant”ın ehtiyat qüvvəsi daha sanballı olduğundan, matçın sonu təmsilçimiz üçün üzücü alındı.
Matçın bitiminə dəqiqələr qalarkən buraxılan qol olmaya da bilərdi. Amma oldu və bu nəticə bütün taktiki hazırlığı pozan bir səhvlə başladı, onu isə Şahruddin etmişdi.
Reallıq odur ki, bu matçda “Qarabağ”a Avropa Liqasının pley-offuna çıxmaq üçün bir xal lazım idi. Amma indi vəzifəni yerinə yetirmək üçün lider “Fraybirq”u evdə yenməyə məhkumuq. Düzdü, “Nant”ın qalib gəlməməsi halında məğlubiyyət də bizim üçün üzücü olmayacaq. Lakin bütün şanslarını itirən “Olimpiakos”a ümid etmək olmaz, almanlarla evdəki matç final əhəmiyyətli olacaq.
Doğrusu, Avropa Liqasının 1/16 finalında “Barselona”, “Yuventus”, “Ayaks”, “Atletiko”, “Sevilya” kimi komandalarla qarşılaşmaq ehtimalını nəzərə alanda “Qarabağ”ın elə Konfrans Liqasına enməyini daha ideal variant saymaq istəyirsən. Lakin bu komandalarla qarşılaşmaq özü elə böyük hadisədi və ona görə mübarizəyə sona kimi davam etmək yaxşı olardı.
Ən xoş məqam odur ki, “Nant”dan buraxılan son dəqiqə qolunu az qala faciəyə çevirmişik. Liqa 1 təmsilçisi ilə matçın böyük hissəsini, özü də Fransada üstün keçirən “Qarabağ”la fəxr etmək lazımdı. Komanda ləyaqətli futbol sərgilədi, aradakı büdcə, təmsil etdiyi çempionat, usta futbolçuların çoxluğu fərqini hiss etdirmədi, əksinə, daha yaxşı təsir bağışladı. Məhz bu səbəbdən Şahruddinin bağışlanmaz səhvi adama daha çox təsir edir. Belə komandaları maksimum dəqiqlik hesabına yenmək mümkündü, istənilən hədiyyə əlavə problemlər yaradır. Ümid edək ki, Məhəmmədəliyevin üzündən azarkeşlər böyük komandaların Bakıya səfərini izləmək zövqündən məhrum olmayacaq.
VÜSAL MAHMUDOV
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Ölkə futbolu2024-05-04 10:19
“Araz-Naxçıvan”ın baş məşqçisi: “Rəqib tapmaq çətinləşir”
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO