Bir şiş kabablıq idman jurnalistikası

Şənbə günü həm də jurnalistlərin günü idi. Daha dəqiqi, Azərbaycanda milli mətbuatın yaranması günü qeyd edilirdi.

Müstəqillik dönəmində bu gün hər il qeyd edilir. Vaxtilə bu gündə jurnalistlər ev alıb, müxtəlif adlara layiq görülüblər.

Mətbuatın içində idman jurnalistikasının da özünəməxsus yeri var. Hər nə qədər adi mətbuatın işi qabardılsa da, idman jurnalistlərinin işi heç də digərlərindən asan deyil. Hər bir sahəni və kəsi əhatə edən sosial şəbəkə torunda idman jurnalistləri operativliyin ən böyük sürətini nümayiş etdirməlidirlər. Əks halda gördükləri işin, yazdıqları yazının, dedikləri sözün heç bir dəyəri olmayacaq.

Mətbuat günündə bu sahənin işçilərini bir yerdə görmək olar. Onları bir araya gətirənlər isə müxtəlif qurumlardır. Bu, əslində yaxşı addımdır. Amma məsələyə hansı qurumun hansı tərəfdən, daha doğrusu, hansı bucaqdan baxdığı maraqlıdır.

Şənbə günü idman jurnalistləri üçün bir sıra tədbirlər təşkil edildi. Bu mənada Azərbaycan Milli Antidopinq Agentliyinin (AMADA) tədbiri digərlərindən köklü şəkildə fərqlənirdi. Tədbirdə idman jurnalistləri ilə çox maraqlı intellektual yarış təşkil edildi. Püşkatma ilə komandalara bölünən jurnalistlər vaxtlarını çox gözəl və maraqlı keçirdilər. Həm biliklərini yoxladılar, həm də mükafatlandırıldılar. Belə bir ideyanın reallaşması qurumun jurnalislərə hansı prizmadan baxmasından irəli gəlir.

Təəssüf ki, bu yanaşmanı başqa qurumlarda görmək olmadı. Əksər təşkilatlar jurnalistləri bir yerə yığaraq onlara qonaqlıq verməklə məşğul idilər. İdman sahəsində ölkəmizdə ən böyük qurumlar olan Gənclər və İdman Nazirliyi, AFFA məhz bu yolu seçdi. Bir-iki şiş kababla jurnalistin bayramı qeyd edildi. Bir sıra federasiyalarının təbrik məktublarını da qeyd etməliyik. Sözsüz ki, diqqətdən kənarda saxlamadıqlarına görə hər bir federasiyaya təşəkkür etmək lazımdır.

Bəs AMADA kimi başqa qurumların (bura federasiyalar və ümumiyyətlə, idmanla bağlı bütün təşkilatlar daxildir) belə tədbirlər keçirməsinə nə mane olur? Misal üçün basketbol federasiyasını götürək. Keçən il normal çempionat təşkil edən federasiya jurnalistlər arasında bir tədbir keçirib MBA-dakı “All star” gecəsindəki kimi müsabiqələr (3 xallıq atışlar və s.) təşkil edə bilməzdi? Və yaxud da AFFA, jurnalistləri toplayıb bir yoldaşlıq görüşü təşkil edə bilməzdi. Eyni sözləri voleybol federasiyasına və digərlərinə aid etmək olar. Azərbaycan Şahmat Federasiyası tez-tez turnirlər təşkil edir. Jurnalislərin günündə onların arasında turnir təşkil edib mətbuat işçilərinə xoş xatirələr bəxş edə bilməzdi? Azərbaycan Dama Federasiyası, eyni qaydada dama turniri təşkil etsə, qurumun varlığından xəbər tutmaq olar. Eyni şeyləri digər stolüstü federasiyalara da aid etmək mümkündür.

Bir sözlə, Mətbuat Günündə qurumlar jurnalistləri toplayıb kabab yedirtməklə özlərini borcunu yerinə yetirmiş kimi hiss edirlər. Halbuki, heç bir qurum bunu etmək məcburiyyətində deyil. Və vəziyyətin bu həddə gəlib çatmasının da günahkarı təkcə həmin qurumlar deyil.

İLQAR AĞAYEV