Brkiç “Neftçi”də qalmasına peşman deyil: “Bəzi klublar maraqlanırdı, amma…”

“Mənim zədə ilə bağlı ciddi problemim yoxdur. Zədələnərkən tez sağalacağımı düşünürdüm. Amma elə olmadı. İndi özümü çox yaxşı hiss edirəm və hazıram”. Bunu futbolinfo.az-a açıqlamasında “Neftçi”nin qapıçısı İvan Brkiç deyib.

Uzun müddətdir oynamaq şansı qazanmayan xorvat “çərçivə” qoruyucusu zədədən sonrakı durumundan danışıb: “Təbii ki, zədədən qayıdandan sonra şans qazanmaq bir az çətin olur. Bu, normal haldır. Rza Cəfərov hazırda oynayır və onun haqqında çox yaxşı düşünürəm. Bir-birimizi dəstəkləyirik və kömək oluruq. Sağaldığım və məşq etdiyim üçün şükür edirəm. Əsas heyətə qayıtmaq üçün səy göstərəcəm və mübarizə aparacağam”.

29 yaşlı qapıçı qış “transfer pəncərəsi” zamanı klubdan getmədiyinə görə peşman olmadığını bildirib: “İki ildir ki, burada hər oyunda meydana çıxmışam. Mənim vəziyyətim elədir ki, özümü pis hiss edə bilmərəm. Əsas heyətdəki yerimi zədəyə görə itirdim və bu, fərqli durumdur. İndi isə hər şey qaydasındadır. Düşünürəm ki, bu, mənim üçün yaxşı haldır. Düzdür, bəzi klublar maraqlanırdı, amma “Neftçi” ilə müqaviləm var. Özümü Bakı klubunda çox yaxşı hiss edirəm. “Neftçi”də olmaqdan zövq alıram. Bilirəm ki, komandaya daha çox şey verə bilərəm”.

Brkiç komanda yoldaşı Rza Cəfərovun gələcəyindən də danışıb: “Onun gələcəyi haqqında heç kəs proqnoz verə bilməz. Hər şey özündən asılı olacaq”.