“Bütün əsgərlər kimi mən də qab yudum, qar təmizlədim” – Vəli Qasımov

Azərbaycan milli komandasının keçmiş futbolçusu Vəli Qasımov Rusiya mətbuatına müsahibə verib.

Futbolinfo.az “championat.com”-a istinadən xəbər verir ki, sabiq hücumçu müsahibəsində Moskva “Dinamo”suna keçidi haqda danışıb:

“Neftçi”yə çempionat başlamazdan əvvəl gəlmişdim. O vaxta qədər Xarkovda hərbi məktəbdə oxuyurdum – kursant idim. “Neftçi”də məni normal qəbul etdilər və dedilər: “İşlərimizi həll etmək üçün Moskvaya gedəcəyik, ancaq hərbi formanı da götür. Sonra anidən məni hərbi hissəyə gətirdilər. Orada iki gün qaldım. Bütün əsgərlər kimi mən də qab yudum, qar təmizlədim. O iki gün mənə iki il kimi gəldi. Sonra məni yenə apardılar. Bir avtomobildəydik və mənə dedilər ki, niyə heç soruşmursan ki, hara gedirsən? Dedim ki, Bakıya? Dedilər yox, artıq Moskva “Dinamo”sunun futbolçususan.

Məni hərbçi kimi Mosvkaya göndərmişdilər. Daha sonra məni Novoqorska apardılar, ertəsi gün “Dinamo”nun Eşerdəki təlim-məşq toplanışına qoşuldum. Orada özümü yaxşı göstərdim və hiss edirdim ki, heyətə girməyi bacarmışam. Moskvaya qayıdanda “Neftçi” nümayəndələri gəldi və dərhal Eduard Malofeyevə müraciət etdilər. O da məni çağırıb soruşdu: “Burdan getmək istəyirsən? Sən heyətə düşürsən”. Nə deyəcəyimi bilmirdim. Onda Malofeyev dedi ki, sən get məşğul ol, mən razılaşacağam. Amma danışmaq alınmadı, bir gün sonra “Neftçi”yə qayıtdım”.

Vəli Qasımov 1992-ci ildə “Dinamo”nun heyətində Rusiya çempionatının bombardiri olub. Daha sonra İspaniya “Betis”inə keçən Qasımov, müxtəlif vaxtlarda “Albasete”, “Esixu”, “Vitoriya” və “İmortal” kimi klublarda çıxış edib.

Qasımov 1987-1991-ci illərdə “Neftçi”nin şərəfini qoruyub. Keçmiş hücumçu 14 dəfə də Azərbaycan millisinin formasını geyinib.