Ölkə futbolu
Dumanlı oyunun aydın yekunu: “Qarabağ” itirə-itirə… fərqi artırır
“Qarabağ” xal itirə-itirə xal fərqini artırır. Və “Neftçi” indiki durumda da ağdamlıları məğlub edə bilmirsə, Qurban Qurbanovun yetirmələrinin mövsümü məğlubiyyətsiz başa vuracağına şübhə yoxdur.
Qatı duman üzündən rahat izləyə bilmədiyimiz matç barədə əsasən nəticəyə, heyətlərə və statistik göstəricilərə əsaslanaraq fikir yürüdə bilərik. Elə bu da kifayətdir. “Neftçi” ardıcıl 6 məğlubiyyətdən sonra “Qarabağ”dan xal qopara bildisə, rəqibin gərgin qrafikinə və avrokuboklardakı məğlubiyyətin gətirdiyi psixoloji duruma minnətdar olmalıdır.
Yorğunluq, zədələr, xəstəlik “Qarabağ”ı o qədər çətin duruma salmışdı ki, komananın sağ cinahında mərkəz müdafiəçisi oynayırdı. Uzun müddət oynamayan, formada olmayan Filip Ozobiçin start heyətində görünməsi də ansamblın pozulmasına gətirib çıxarmışdı. “Neftçi” bu üzdən orta sahədə ciddi üstünlük qazanıb rəqibi məğlub edə bilərdi.
İnsaf naminə Laurentsiu Regekampf meydan sahiblərinin boşluqlarından məharətlə istifadə etməyi bacarmışdı. Xüsusilə ilk hissədə qonaqlar daha yaxşı oynayırdı. Hesabın açılması öz yerində, “Qarabağ”ın rotasiyaya uğramış heyəti heç nə ilə yadda qalmırdı. Lakin hətta xoşagəlməz fiziki-psixoloji durumda da “Qarabağ” ayağa qalxmağı bacardı. Faslədən sonra rəqibi üzərində aşkar üstünlük quran ağdamlılar məğlubiyyətdən qaça bildi.
Düzdü, nəticəyə təsir edən amillər oldu. Qurbanov fasilədən sonra yorğun olmalarına rəğmən, 5 əsas heyət oyunçusunu döyüşə atdı. Ən önəmlisi “Neftçi”nin eyni qarşılığı verə bilməməsi oldu. Bakılıların qışda gətirdiyi yeni oyunçular komandaya güc qatsa da, heyət yetərsizliyi özünü göstərdi. Regekampf əvəzləmələrə başlayanda, yorulanları dəyişməyə start verəndə məlum oldu ki, ehtiyat qüvvə bərbaddır.
Bəlkə hələ bu vəziyyətdə də qələbə hesabını qorumaq mümkün olacaqdı. 80-ci dəqiqədə Ataa Caberin zədələnməsi ilə bütün planlar alt-üst oldu. Meydanın mərkəzində böyük həcmdə iş görən israilli legionerin sürüşmə fəndi yerinə yetirərkən ayağını sındırması “Qarabağ”ın yarımmüdafiədə təşəbbüsü ələ almasına səbəb oldu. Nəticədə cinah ötürməsindən sonra bərabərlik qolu vuruldu. Bakılılar üstün olduğu dəqiqələrdə fərqi artırsaydı, yəqin ki, indi rəqibinin mövsümdəki ilk məğlubiyyətindən bəhs edirdik.
“Qarabağ”ın mövsümdə düşdüyü ən çətin vəziyyətdən faydalanmağı bacarmayan “Neftçi”nin böyük iddialarından danışmaq yersizdi. Komanda ciddi şəkildə güclənməli, keyfiyyətli oyunçu ehtiyatını artırmalıdır. Və bütün bunlar üçün pul xərclənməlidir. Klub rəhbərliyi simicliyin daşını atmalı, amma maliyyəni havaya da sovurmamalıdır – lazımi mövqelərə nöqtə transferlər reallaşdırılmalıdır. Ağdamlılar başverənlərdən dərs çıxaracaq, bir də özünü bu qədər çətin vəziyyətə salmayacaq. Hər şeyi qaydasında olan “Qarabağ”ı üstələmək üçünsə ekstra işlər görmək lazımdır.
Bir neçə gündür “Qarabağ”ın “Gent”i keçə bilməməsindən yazırıq. Təbii ki, komandada müəyyən çatışmazlıqlar oldu. Amma səbəblərdən biri də elə dünənki oyunda idi. “Qarabağ”ın yarımcan heyətini yenə bilməyən “Neftçi” rəqabət yaratmayınca, ağdamlılar da inkişaf edə bilməyəcək. Halbuki “atlılar”a ölkə daxilində problem yaradan 2-3 klub olsa, komanda qitə yarışları üçün daha hazırlıqlı olardı.
“Qarabağ” “Sabah”dan 9, “Neftçi”dən 13 xal öndədir. Komandanın yayadək çempionatdan başqa mübarizə aparacağı başqa yarış olmadığını nəzərə alsaq, ağdamlılar növbəti 12 turda qızıl medalları heç kimə güzəştə getməyəcək, əksinə, fərqi daha da artıracaq. Digər medalları bölüşdürəcək paytaxt klubları ümidini yeni mövsümə saxlamalıdır. Amma onun üçün də ciddi işlər görülməlidir. Xüsusilə “Neftçi”, nəhayət, toparlanmalıdır.
FƏRİD
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Premyer-liqa2024-04-19 18:26
“Turan Tovuz” “Sumqayıt”a böyük hesabla məğlub oldu
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq