Müsahibə
Elvin məşqçi seçiminə qarışmaq istəmir: “Rəhbərlik daha yaxşısını bilər”
“Sabah”ın kapitanı Elvin Camalovun futbolinfo.az saytına müsahibəsi
– Misli Premyer Liqasının XXIII turunda “Kəpəz” üzərində vacib qələbə (3:2) qazandınız. Oyunla bağlı nə deyə bilərsiniz?
– Gözlədiyimiz kimi, çətin matç oldu. Rəqib oyuna fəal başladı və bunun da nəticəsində erkən qol vurdu. Buna baxmayaraq, sonradan toparlana bildik. İlk hissədə hesabı bərabərləşdirdik. İkinci hissədə isə daha yaxşı oyun sərgilədik. Qollarımızı vurub oyundan 3 xalla ayrılmağı bacardıq.
– Hesabı “Kəpəz”in açması komandanızda gərginlik yaratdımı?
– Bu, futboldur, istənilən vəziyyətə hazır olmalısan. Rəqibin hesabı açması bizdə gərginlik yaratmadı. Əksinə, bu qol daha yaxşı köklənməyimizə şərait yaratdı.
– Murad Musayevin gedişindən sonra “Sabah”ın işinin daha çətin olacağı gözlənilirdi. Hələ yeni baş məşqçi təyin edilməməsinə baxmayaraq, komanda baş məşqçi funksiyasını müvəqqəti yerinə yetirən İqor Ponomaryovun rəhbərliyi altında yaxşı təsir bağışlayır. Ponomaryov qısa müddətdə nəyi dəyişməyi bacardı?
– Hər məşqçinin öz yanaşması, özünəməxsus xüsusiyyətləri və üstünlükləri olur. Hər hansı müqayisə aparmaq istəməzdim.
– Sizcə, yeni baş məşqçi gətirməkdənsə, Ponomaryovu bu postda saxlamaq komandanız üçün daha yaxşı olmaz?
– Hər birimiz klubun daha yaxşı nəticə qazanmasını istəyirik. Bunun üçün əlimizdən gələni edirik. Klub üçün nəyin faydalı olduğunu rəhbərlik daha yaxşı bilər. Mənim işim futbol oynamaqdır. Murad Musayevlə çalışmaq mənim üçün xoş idi, İqor Ponomaryovla da həmçinin. Dediyim kimi, hər birimiz daha uğurlu nəticə qazanmaq üçün əlimizdən gələni edirik. İnanıram ki, mövsümün sonunda hədəflərimizə çatacağıq.
– Növbəti turda “Səbail”in qonağı olacaqsınız. Bu görüşdə şansları necə dəyərləndirirsiniz?
– Biz hər matça qələbə üçün çıxırıq. Bu oyun da istisna deyil. Rəqib də avrokuboklar üçün mübarizə aparır. Bizi çətin görüş gözləyir. Əlimizdən gələni edəcəyik ki, bu matçdan qələbə ilə ayrılaq.
– Azərbaycan Kubokunda mübarizəni dayandırmış “Sabah”ın çempionatda cari mövsümü ikinci pillədə başa çatdırmaq şansı var. Bu şansdan istifadə edə biləcəksiniz?
– Biz hər növbəti matçımıza köklənirik. Əlimizdən gələni edirik ki, hər matçdan maksimum nəticə ilə ayrılaq. Mövsüm bitəndə neçənci pillədə qərarlaşacağımızı görəcəyik.
– Millətlər Liqasında yığmamız İsveç, Slovakiya və Estoniya ilə eyni qrupda mübarizə aparacaq. Rəqiblər və qrupdakı şansımız haqda fikriniz necədir?
– Bu gün Avropada asan rəqib yoxdur. Bizi çətin mübarizə gözləyir. Lakin istənilən halda sona kimi mübarizə aparmaq, hər matçda yaxşı nəticə qazanmaq üçün meydanda maksimumu qoymaq lazımdır. İnanıram ki, millimiz uğurlu nəticə ilə azarkeşlərimizi sevindirəcək.
FƏRİD
- Premyer-liqa2024-04-14 20:55
“Qarabağ” “Sabah”a uduzdu
- Premyer-liqa2024-04-14 22:16
“Bir rəqiblə 4 dəfə oynamaq bizim üçün maraqsızdır” – Qurbanov
- Ölkə futbolu2024-04-15 10:17
“Qarabağ” üçün daha iki potensial rəqib
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir