Elxan Məmmədovun özünüxilas planı

Elxan Məmmədov yeni plan qurur. Futbol təsərrüfatındakı əlaltılarına, klub rəhbərlərinə gizli vədlər verir, özü üçün xal toplayır.

AFFA-nın icraçı vitse-prezidenti qışda bütün klublara 2-3 milyon manatlıq əlavə yardım ediləcəyini deyib. O, eyni zamanda yayda Premyer Liqada komanda sayının artırılacağını, bütün komandaların maliyyə baxımından tam təmin olunacağını bildirib.

Məmmədov AFFA-da gözlənilən, hətta vaxtı çoxdan çatan, amma yubanan islahatlardan sağ çıxmaq niyyətindədi. Bunun üçün bütün əlaqələrini işə salan ikivəzifəli baş katib günahı başqalarının üzərinə atır, guya ki, ona işləməyə imkan verilmədiyini hər yerdə bəyan edir. Halbuki futbol təsərrüfatında faktiki yeganə söz sahibidi, hətta bütün uğursuz klubların da idarəçisidi.

AFFA-dakı islahatların taleyi həm də AVRO-2020-nin taleyindən asılıdı. Bu yarışın bəzi oyunları Bakıda keçiriləcəyindən islahatlar qitə birinciliyinin final mərhələsindən sonraya planlanır. 2020-nin yayından bir il sonraya ertələnən yarış AFFA-dakıların ömrünü də bir il uzatdı. Amma koronavirus pandemiyası üzündən Avro-2020-nin bir və ya bir neçə ölkədə təşkil edilməsi, Bakının ofsayda düşməsi mümkündü. Hazırda yeni qərar gözlənilir, belə olduğu halda ölkə futbolundakı təmizləmə elə bu qış reallaşacaq.

Təsadüfi deyil, AFFA Hakimlər və Hakim-İnspektorlar Komitəsinin sədri Frits Stuxlikin taleyi də buna görə müəmmalı qalıb. Anlaşması bitən avstriyalı nə yola salınır, nə də onunla yeni müqavilə bağlanır. Hər şeyə dekabrda aydınlıq gələcək. Gələn ay ya AFFA-da rəhbərlik dəyişəcək, ya da yayda reallaşacaq islahatların ilkin konturları müəyyənləşəcək.

Məmmədov üçbaşlı oyun oynayır.

Birincisi, o, uğursuzların əsas səbəbkarı kimi Rövnəq Abdullayevin göstərilməsinə çalışır, SOCAR-ın əsas sponsor kimi qalması ilə boşaldılacaq prezident postunda özü əyləşmək istəyir.

İkinci variant yeni AFFA rəhbərinin komandasında yer almaq cəhdidi. Bunun üçün də iş aparır, son zamanlar əsas namizəd sayılan şəxsin adamlarının kampaniyalarına qatılır, onların ətrafında fırlanır.

Üçüncü planı da düşünüb. Xalq, azarkeşlər onun xislətinə bələddi və hamı bilir ki, futboldakı bütün uğursuzluqların əsas səbəbkarı məhz Elxan bəydi. Bu səbəbdən o islahatlar zamanı karyerası baxımından birdəfəlik “vurulmaması üçün” çalışır, AFFA-dan ayrılsa da, başqa sahədə vəzifə tutmaq niyyətindədi.

Beləliklə, Məmmədov klublara, futbol adamlarına vəd verməklə islahatlardan maksimum qazanclı çıxmaq niyyətindədi. Himayədarları sayəsində planlaşdırılan dəyişikliklərdən maksimum xəbərdardı, addımlarını ona uyğun atır. Lakin unutduğu bir məqam var: imici tar-mar olub, “uğursuz idarəçi” imici ona perspektiv vəd etmir. Ölkədə aparılan mütərəqqi kadr islahatlarından sonra Məmmədov kimilərə növbəti şans verilməyəcək.

CAVAD

P.S.: Dövlətin xarici siyasətini illərdi iflic edən, işindəki nöqsanlara görə vəzifəsindən azad edilən Elmar Məmmədyarov hələ də AFFA İcraiyyə Komitəsinin üzvüdü.