Ölkə futbolu
Hədəfdəki “Sabah”: silsilə hakim səhvləri
Yenə maraqlı hadisələr baş verir. İllərdi “Sabah”la “Zirə”ni hədəfə alan, bu komandaların uğursuzluğu üçün mümkün olan hər şeyi edənlər növbəti dəfə özünü göstərməyə başlayıb.
“Zirə”nin durumu bəllidir. Komandanın yüksək yerlərə iddiası yoxdur, avrokuboka yollanmaq təkcə özündən asılı deyil. Zamanı çatanda – kubok mübarizəsinin ssenarisinə görə bu komandanı yenə “yada salacaqlar”. Hələlik hədəf seçilməli olan “Sabah” var. Və Masazır təmsilçisinin büdrədilməsi üçün mümkün olan hər şeyi edirlər.
Niyə məhz bu komandalar? İmkanları çatsa, “Qarabağ”ı daha pis vəziyyətə salarlar. Ağdam klubu kifayət qədər güclü olduğundan niyyətlərini reallaşdıra bilmirlər, əvəzində başqalarına vurduqları badalaqları məhz çempionla görüşə salmaqla “atlılar”ın da imicini korlamağa çalışırlar. Necə ki, “Qarabağ” – “Sabah” oyununda aşkar penaltini təyin etmədilər. Ağdamlıların hakim köməyinə ehtiyacı yoxdur, lakin Elçin Məsiyevin vasitəsi ilə şou düzəldib fikir yayındırmağa cəhd etdilər.
Qismətdən təyin olunmayan penaltidən az sonra “Sabah” zatən hesabı bərabərləşdirdi. Hakimlər “Qarabağ”a kömək etmək istəsəydi, son dəqiqələrdə qonaqların qapısına real penaltini təyin edərdilər. Bu matç üçün tapşırıq hər iki komandanın xal itirməsi, eyni zamanda “Qarabağ”a hakimlərin guya kömək etdiyini göstərmək, iki klubu üz-üzə qoymaq idi. Yaxşı ki, bu klublara rəhbərlik edənlər ağıllı adamlardır, illərdi belə tələləri çox görüblər və matçdan sonra hansısa qarşılıqlı ittiham, qalmaqal cəhdi olmadı.
Bu planları quranlar Parisdən idarə olunanlardır. Artıq getmiş karvanın yenə geri qayıdacağına ümid edərək, gizli plan qurur, ara qarışdırırlar. “Elxan Məmmədov gedib, problemlər yaranıb” görüntüsü yaratmağa cəhd edənlərə sakitlik lazım deyil, indiki idarəçilərin bacarıqsız olduğunu göstərməyə çalışırlar.
Hədəfə götürülən klublar təsadüfən seçilməyib. AFFA-da mümkün dəyişikliklər qaçılmazdır və futbol idarəçiliyinə gəlməsi gözlənilən insanlar da bəllidir. Söhbət konkret adlardan getmir, bu klublara himayədarlıq edənlər birlikdə mütərəqqi islahatları istəyir, daha sağlam sistem qurulmasının, futbolun kompleks inkişaf etdirilməsini arzulayırlar. Gördükləri işlərlə, qazandıqları nəticələrlə AFFA-dan maliyyələşən klublarla fərqi ortaya qoya biliblər. Onların nəticə qazanması illərdir Məmmədovun taktikasıyla reallaşan bərbad idarəetmənin ifşası deməkdir. Ona görə də bu klublar məqsədli şəkildə, hiylələrlə uğursuzluğa sürüklənir.
Təbii ki, heç bir klubda işlər ideal qurulmayıb, səhvlər var. Lakin belə vəziyyətdə kiçicik kənar müdaxilə hər şeyi daha da pisləşdirir. Qərəzli səhvlər sıralananda, silsilə halını alanda vəziyyət dramatikləşir.
Yazının əvvəlində “Sabah”ın hədəfdə olduğunu təsadüfən qeyd etmədik. Son 4 turda bu komandanın başına gətirilənləri sadalasaq, mənzərə aydınlaşır. Təqdim etdiyimiz VİDEOya diqqət etməklə mənzərəni tam anlaya bilərsiz. Məmmədovun əlaltıları şou yaratmaqda o qədər qətiyyətlidir ki, hətta VAR-ı da vecə almır, israrla bir komandanı baltalayırlar.
Sabah – Səbail
Matçın 68-ci dəqiqəsində meydan sahiblərinin oyunçusu Con İrasabala göstərilən qırmızı vərəqə təsadüf deyildi. Meydanın mərkəzində qaydanı pozan futbolçuya qırmızı vərəqə verildi. Son ümid folundan söhbət belə gedə bilməzdi. Sadəcə, növbəti turda “Qarabağ”a qarşı oyun var idi və sonrakı oyunda qurulan planı yerinə yetirmək üçün əsas futbolçulardan birinin sıradan çıxarılması gərəkirdi.
Qarabağ – Sabah
56-cı dəqiqədə top cərimə meydançası daxilində ağdamlıların yarımmüdafiəçisi Romaonun əlinə dəysə də, hakim oyunu davam etdirdi. Adətən hakim VAR-a baxdıqdan sonra qərarını verməlidir. Lakin Elçin Məsiyev monitora nəzər saldıqdan sonra da qulaqlıq vasitəsi ilə bir neçə dəqiqə “kimlərləsə” məsləhətləşdi və hamını narazı salan qərarı açıqladı. Yekunda hər iki komanda xal itirdi, lakin “Qarabağ” ictimai qınağa hədəf edildi, “Sabah”ın isə haqqı yeyildi.
Sabah – Turan Tovuz
Oyunun 25-ci dəqiqəsində “Turan Tovuz”ın futbolçusu Piruzi Marekvelidze “Sabah”ın müdafiəçisi Bəxtiyar Həsənalızadənin ayağına zərbə endirsə də, baş hakim bu hərəkəti sarı vərəqə kimi dəyərləndirdi. Halbuki gürcü legionerin oyundan qovulması gərəkirdi. Daha sonra “Sabah”ın qapısına təyin olunan penalti əsəbləri gərdi, baş məşqçi Murad Musayevin cəzalanması ilə nəticələndi. Bəli, həmin epizodda penalti qərarı doğru idi, lakin bir tur öncə eyni epizodda “Sabah”ın lehinə penalti təyn edilməmişdi, bu dəfə isə analoji qayda pozuntusuna görə masazırlılar cəzalandırıldı. Penalti qola çevrilmədi, bu səbəbdən epizoddan öncə “Sabah”ın futbolçusuna qarşı qayda pozuntusu ciddi müzakirə edilmədi. Halbuki 34-cü dəqiqədə Natan Oduva topu Amin Seydiyevdən qaydalar çərçivəsindən kənar almışdı. Hücumun başlanğıc fazası olan qayda pozuntusu nəzərə alınmalıydı. O zaman Musayev də qırmızı vərəqə almazdı.
Şamaxı – Sabah
İkinci hissə başlayan kimi “Sabah”ın hücumçusu Namik Ələskərova qarşı cərimə meydançası daxilində kobudluq edildi, hakim “davam” işarəsi verdi. VAR-da əyləşən hakimlər baş hakimi epizodun təkrarına baxmağa çağırmadı. Halbuki həmin vaxt hesab açılmamışdı və ədalətli qərarla bakılılar önə çıxmaq imkanı qazanacaqdı.
Təqdim etdiyimiz bütün epizodlara yazının sonundakı VİDEOda baxa bilərsiz. O zaman əmin olacaqsız ki, “Sabah”ın son 3 turda mümkün 9 xaldan 8-ni itirməsində kənar qüvvələrin ciddi rolu var.
FƏRİD