Hesabı bərabərləşdirənlər də oldu, fərqi artıranlar da

MBA-da bu gecə play-off seriyası 3 oyunla davam edib.

Futbolinfo.az xəbər verir ki, “Finiks” basketbolçuları ilk oyunda evdə aldıqları məğlubiyyətin əvəzini çıxaraq seriyada hesabı bərabərləşdiriblər – 123:109. Meydan sahiblərinin lideri Buker oyunun qəhrəmanı olub. 38 xal toplayan ulduz basketbolçu liderlik statusunu Kevin Düranta vermək fikrində olmadığını nümayiş etdirib. Dürant qarşılaşmanı 25 xalla tamamlayıb. Bundan əlavə o, 5 dəfə top itkisinə yol verib.

Qonaqların heyətində yoldaşlarından seçilən basketbolçu olmayıb. Əsas heyətin hamısı sabit oyun nümayiş etdirib. Lakin bu sabitlik məğlubiyyətdən yaxa qurtarmağa imkan verməyib. İlk oyunun qəhrəmanı Kavay Leonard 31, Rassel Vestbruk isə 28 xalla yadda qalıb. “Klippers”in heyətində ehtiyat basketbolçuları qeyd etmək olar. Lakin onların payı da nəticəyə bir o qədər təsir göstərməyib. 4-cü periodda inamlı oyunu sayəsində “Finiks” rəqibin müqavimətini qırmağı bacarıb. Seriyada növbəti oyun “Los-Anceles Klippers”in meydançasında keçiriləcək.

Ümumi hesabın bərabərləşdiyi digər məkan Klivlend olub. İlk oyunda məğlubiyyətlə üzləşən “Kavalers” Nyu-York basketbolçuları üzərində inamlı qələbə qazanıb.

Görüşün taleyi final sirenasına xeyli qalmış həll edilib. Son periodun formallığa çevrildiyi qarşılaşmada yekun hesab 107:90 olub.

Türkiyəli basketbolçu Cedi Osman qələbəyə 5 xalla töhfə verib. Mitçell və Mobli isə dabl-dablla protokollara düşüblər. Ən çox xal toplayan bu dəfə Qarlend (32) olub. Start heyətə düşməyən Levertin 24 xalını da qeyd etmək lazımdır. Qonaqlarda isə Rendl komanda yoldaşlarına nisbətən fərqlənib (22 xal + 8 ribaund). Seriyada növbəti oyun “Nyu-York Niks”in meydançasında keçiriləcək.

Digər 2 oyunla müqayisədə Bostonda baş tutan qarşılaşmadan sonra seriyada hesab artıb. Onsuz da “Seltiks”in seriyanı rahatlıqla bitirəcəyi ehtimal edilirdi. 2 oyundan sonra ehtimallar özünü doğruldur. Çempionluğun əsas favoritlərdən olan Dok Riversin yetirmələri bu dəfə də “Atlanta Houks” üzərində qələbə qazanıblar – 119:106.

Ceyson Teytum oyunu 29 xal, 10 ribaund və 6 assistlə tamamlayıb. Boston komandasının heyətində Broqdonu da qeyd etmək lazımdır. Ehtiyatdan meydançaya çıxan basketbolçunun oynamaq üçün çox vaxtı olmasa da görüşü 13 xal, 7 ribaund və 8 assistlə tamamlayıb. Qonaqların heyətində Mürrey (29 xal) və Yanq (26 xal) qeyd edilməlidir. Həmçinin , Boqdanoviç də yaxşı oyun nümayiş etdirib. Ehtiyat oyunçu görüşü 18 xalla başa vurub. Seriyanın növbəti oyunu Atlantada keçiriləcək.