Ölkə futbolu
“Hünər”li tovuzlular “Qarabağ”ı da rahatlaşdırdı
“Qarabağ” yenə fərqi artırdı. Çempionluq mübarizəsində favorit olan ağdamlılar, onlara problem yarada biləcək yeganə komanda olan “Sabah”ın qeyri-sabit çıxışı nəticəsində yoluna rahat davam edir.
23-cü tura yekun vurulan oyunda “Qarabağ” “Zirə”ni məğlub edib zirvədə möhkəmləndi. Bunun üçün çempiona “Turan Tovuz” da yardım etdi. Qurban Qurbanovun yetirmələri əsas rəqibin büdrəməsindən sonra daha arxayın çıxdığı matçda qələbə qazandı. Ağdamlılar bu mövsümdə heç kimdən, “qartallar”la duellərdə sə tarix boyunca məğlubiyyət görməyib.
Doğrudur, “Zirə” ağdamlılara kifayət qədər problem yaratdı. Qəsəbə təmsilçisi lideri dayandırmaq üçün mümkün olan hər şeyi etdi, taktiki cəhətdən doğru oynadı. Lakin bircə fərdi səhv meydan sahiblərini layiq olduğu bir xaldan məhrum etdi.
“Qarabağ”ın avrokubok qarşılaşması üzündən əsas oyunçularına istirahət verməsi aldadıcı faktdır. Dünən meydana çıxanları ikinci heyət saymaq olmur. Yeni transferlər özlərini doğrultmaq üçün maksimum çalışdı və artıq start heyətin qapısını döyməyə hazır olduqlarını göstərdilər. Qurbanovun gedənlərin yerini doldurduğunu demək olar. Tezliklə heç kim Kadi Borgesi hətta xatırlamayacaq da…
Günün ilk matçında isə sürpriz qeydə alındı. “Turan Tovuz” rəqibi dayandırmağın yolunu tapmışdı və futbolçular məşqçi tapşırıqlarını mükəmməl yerinə yetirməklə vacib qələbə qazandı. Oyundan öncə heç-heçəyə həvəslə razı olacaq qonaqlar, əks-hücumlardan dəqiq istifadə edincə paytaxtdan 3 xalla dönməyi bacardı.
Natan Oduvanın qolundan sonra da epizodlar yaradan qərblilər, penaltini boşa versə də, ruhdan düşmədi. 11 metrlik cərimə zərbəsini qapıya istiqamətləndirə bilməyən Ayxan Hüseynov antiqəhrəman olmadı – o, ilk qolun ötürməsini verdiyi kimi, matçda son nöqtəni qoymağı da bacardı.
Təbii ki, matçın favoriti “Sabah” idi. Komanda usta futbolçularının çoxluğundan faydalanaraq xeyli təhlükəli epizod yaratdı, oyuna diqtə etdi. Lakin bakılıların oyunu rəqib tərəfindən düzgün analiz edildiyi üçün onları dayandırmaq mümkün oldu.
Ümumiyyətlə, Murad Musayevin demək olar ki, B planı yoxdur. Onları dayandırmaq çətindir, oyun alındısa, qolları sıralayırlar, amma rəqib düzgün, intizamlı oynayanda rusiyalı mütəxəssis fərqli bir şey tətbiq edə bilmir. Dünən “Turan Tovuz”la matçda məhz bunu gördük. Bu komandaların ikinci dövrədəki oyununda da eyni ssenari yaşanmışdı. Sadəcə, Tovuzdakı matçda meydan sahiblərinin bir fərdi səhvi, Aleksey Kaşukun ustalıq səviyyəsini göstərməsi həlledici olmuşdu. Dünən tovuzlular minimal səhvlərə də yol verməyincə “Sabah” təslim oldu.
Günün qalibləri əsas izləyiciləri ilə 8 xallıq fərq yaratdı. “Qarabağ” çempionluq şanslarını yaxşılaşdırdığından Konfrans Liqasındakı cavab matçına rahat hazırlaşa bilər, “Turan Tovuz” isə bundan sonra təzyiqsiz oynayacaq. Yeni sponsorun gəlişi ilə daha “Hünər”li olan komanda top buraxmadan qazandığı ardıcıl 3 qələbə ilə 5-ci pilləyə yaxınlaşıb. Növbəti turda evdə “Zirə”ni yenmək mümkün olsa, qəsəbə təmsilçisi və “Qəbələ” ilə “ortabab üçlüy”ü təşkil edəcəklər. 26-cı turda da qəbələlilərlə ev oyunu var…
Beləliklə, meydan sahiblərinin 3 qələbəsi ilə başayan tur 2 qonağın sevinməsi ilə bitdi. Bir-birindən 2 xallıq fərqlə aralı olan autsayderlər, lider “Qarabağ”, 2-3-cü yerlər üçün döyüşən bakılılar – turnir cədvəlindəki hazırkı durum belədir. Qarşıdakı 13 turda ciddi sürprizlər gözlənmir, yalnız son pillənin sahibinin müəyyənləşməsi baxımından dəqiq proqnoz vermək olmur.
FƏRİD
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Müsahibə2024-04-10 11:44
Subaşiç “Neftçi” və “Qəbələ”yə görə məyusdur: “Rəhbərlik heyət və məşqçi ilə bağlı qərar verməlidir”
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…