İcazə verilmədi: Gəncə stadionuna azarkeş buraxılmayacaq?

“Kəpəz” üçün çətin günlər hələ qabaqdadı. Premyer Liqaya qayıdan klubun infrastrukturla bağlı ciddi problemi var. Belə ki, ev oyunlarının keçiriləcəyi Gəncə şəhər stadionu qəzalı vəziyyətdədi, paltardəyişmə otaqları hələ də hazır deyil.

Doğrusu, AFFA-nın “Kəpəz”ə bu vəziyyəti ilə Premyer Liqada iştirak üçün lisenziyanı necə verməsi maraq doğurur. Stadion hazır deyil, bir sıra başqa çatışmazlıq var, üstəlik, maliyyə problemləri də həllini tapmayıb. Lisenziyalaşdırma Qrupunun bank zəmanətiylə bağlı tələbə hansı cavabı alması da açıqlansa, pis olmaz.

Xüsusilə stadionla bağlı vəziyyət ciddidi. Klub rəhbərliyi qışa kimi oyunlarını Bakıda keçirməyi və ya rəqiblərlə danışaraq ev oyunları ilə səfər görüşlərinin yerini dəyişdirməyi düşünür. Xüsusilə ikinci variant mümkünsüzdü. Təklifə müsbət cavab verilsə, “Kəpəz” ilk iki dövrədə yalnız Gəncədən kənarda, növbəti iki dövrədə isə evdə oynamalı olacaq. Bu variant qəbuledilməzdi. Komandanın qışa kimi Bakıda oynaması da doğru olmaz. O zaman Premyer Liqada bölgə təmsilçilərinin artırılması təşəbbüsü yalnız kağız üzərində reallaşacaq.

Yeni mövsümün startına bir həftə qalarkən “Kəpəz”ə növbəti bəd xəbər Fövqəladə Hallar Nazirliyindən gəlib. Gəncə stadionuna baxış keçirən nazirlik əməkdaşları təhlükəsizlik tədbirlərini əsas götürərək müsbət rəy verməyiblər. Tribunalar qəzalı vəziyyətdə olduğundan, ora azarkeşlərin buraxılmasına qadağa qoyulub. PFL bunu hələlik rəsmi açıqlamır, danışıqlar, müzakirələr gedir. Qısa müddətdə təmir-tikinti işləri aparmaq real deyil, istisna kimi yalnız azarkeşlərin nisbətən yararlı tribunalara buraxılması mümkün ola bilər.