İnamlı və çətin qələbələr, gözlənilən məğlubiyyət

“Sabah” debüt etdiyi avrokubok mövsümündə qələbələri sıralayır. Əvvəlki mərhələdəki qələbələr nisbətən gözlənlən idisə, dünən Murad Musayevin yetirmələri həqiqətən sürprizə imza atdı. Kifayət qədər təcrübəli olan “Partizan”la matçda əldə edilən inamlı qələbə sıradan uğur sayıla bilməz.

“Bayquşlar” nəticəni layiqli oyunla təmin etdi. Matç boyunca serblərdən daha üstün olan təmsilçimiz penltini qaçırmasına, çoxsaylı şansları qaçırmasına baxmayaraq, lazım olan qolları vurdu. Komandadan ayrılmağa qərar verən Coy-Lens Mikelsin oynamaqdan imtina etməsinə baxmayaraq, yoldaşları onsuz da uğur qazana bildiklərini isbatladı.

Təbii ki, hələ pley-offa adlamaqdan danışmaq tezdir. Amma 2:0 hesablı üstünlüyü Serbiyada qorumaq mümkündür. Komanda arxayınlaşmamalı, eyni zamanda təzyiqə hazır olmalıdır. Erkən qol buraxılmasa, futbolçular soyuqqanlılığını qorusa, “Partizan”ın böhranlı durumundan faydalanmaq mümkündür. Həmişə Bakıdan uğurlu nəticə ilə dönən Belqrad təmsilçisinin ilk məğlubiyyətə necə reaksiya verəcəyini Musayev hesablamalıdır.

Konfrans Liqasındakı digər təmsilçimiz “Neftçi” üçün mövsümü bitmiş saymaqolar. Evdə “Beşiktaş”a 1:3 hesablı məğlubiyyətin revanşını İstanbulda almaq mümkünsüzdür. Bakılıların fasilədən sonra yaxşı görünməsi kimsəni aldatmamalıdır. Erkən qollarla vəzifənin öhdəsindən gələn qonaqlar qalan vaxtda özünə əziyyət vermədi. Əksinə, “Neftçi”yə oynamaq şansı yaratdılar və bunun sayəsində bir neçə təhlükəli epizod yarandı.

Komandanın buraxdığı qollar göstərdi ki, “Neftçi”də görülməli olan xeyli iş var. Yeni transfer edilən müdafiəçilər rəqibin vurduğu qollar zamanı inanılmaz səhvlər etdi. Yarımmüdafiə xətti ilə bütünləşmə mümkün olmadı və uşaq səhvləri reallaşdı. Oyun dəst-xəttinin düzəlməsi, komandanın komlektləşməsi üçün Adrian Mutu xeyli əziyyət çəkməli olacaq.

Rumın çalışdırıcının seçdiyi start heyətini tənqid etməyə də əsas var. Son oyunlarda əla oyun sərgiləyən Filip Ozobiçin ehtiyata atılması, cinahlardakı seçimlər müzakirə mövzusudur. “Beşiktaş”ın oynamağa imkan verməsi öz yerində, məhz ilk dəqiqələrdən meydanda olmalı oyunçulara şans veriləndən sonra komandanın özünə gəlməsi bunu sübut edir.

“Qarabağ”ın qələbəsi inamlı alınmasa da, komandanın oyunu yaxşı idi. HJK hər iki matçda məğlub ediləcək səviyyədə bir rəqibdir. Ağdamlılar daha cəsarətli olsaydı, oyunun taleyi hətta Bakıda həll oluna bilərdi. Amma “Qarabağ” çoxsaylı şansarı əldən verincə cəsarətlənən finlərin azsaylı hücumlarından biri qolla yekunlaşdı. Qurban Qurbanovun yetirmələrinin qısa müddət sonra yenidən önə çıxması da rəqibin gücsüzlüyündən xəbər verir.

“Qarabağ” qələbə qazandı, lakin cavab matçında daha diqqətli olmaq lazımdır. Rəqibin qol vurmağa məcbur olması faktı təmsilçimizin şansını artırır. Qapanan rəqiblərlə görüşlərdə əziyyət çəkən “Qarabağ”ın Helsinkidə işi asan olmalıdır. Komandanın səviyyəsi buna imkan verir. Sadəcə, arxayınlaşmaq olmaz, qarşıdakı həftədə qruplara düşmək problemini birdəfəlik həll etmək lazımdır.

Nəticələrə baxanda “Sabah”ın pley-offa yüksəlmək şansı daha real görünür. Lakin rəqibi gücünü, komandanın öz səviyyəsini və təcrübəsini nəzərə alaraq Avropa Liqasındakı təmsilçimiz olan “Qarabağ”ı bir addım öndə görməliyik. İki komandamız bunu bacarsa, həm reytinq xalına görə xeyli irəli düşərik, həm də ölkə futbolunun imici baxımından əla nəticə olar.

FƏRİD