“Jenis”in azərbaycanlı futbolçusu: “Mənə AFFA-dan rəsmi təklif gəlməyib”

Qazaxıstanın “Jenis” klubunun azərbaycanlı futbolçusu Rauf Allahverdiyevin futbolinfo.az saytına müsahibəsi

– Çıxış etdiyin “Jenis” klubunun rəsmi səhifəsində Azərbaycan millisindən gələn təklifi qəbul etmədiyiniz barədə açıqlama var idi. Təklifi niyə qəbul etmədiniz?

– Mən Qazaxıstanda böyümüşəm, burada inkişaf edib milli komandaya qədər yüksəlmək istəyirəm. Mən deməmişəm ki, Azərbaycan yığmasında oynamağı xoşlayıram, ya xoşlamıram. Sadəcə, fikrim odur ki, burada qalım, yüksəlim və daha yaxşı yerlərə gəlim. Düşüncəm bu cürdür.

– Azərbaycandan sizinlə kim əlaqə saxlamışdı?

– Bir dəfə bir agent əlaqə saxlamışdı. Onlar mənim Azərbaycan pasportu almaq istəyib-istəmədiyimi soruşdular. Başqa heç nə olmamışdı. Federasiyadan mənimlə heç kim əlaqə saxlamayıb. Rəsmi olaraq da bir təklif gəlməyib.

– Bizim çempionatı izləyirsiniz?

– Bir neçə komandanı tanıyıram. Yalnız avrokuboklarda çıxış edəndə izləyə bilirəm. Yox, çempionata heç baxmamışam. Milli komandanı isə izləmişəm. Xüsusən Qazaxıstana qarşı keçirdikləri oyunlardan sonra daha yaxından izlədim.

– Hazırda çıxış etdiyin “Jenis” necə komandadır?

– Bu, mənim ailə hesab etdiyim ilk peşəkar klubumdur. Mənə peşəkar futbolda yol verən klub… Ona görə də bu komandaya tam hörmətim var. Bu mövsüm üçün düşünürəm ki, əsas hədəf bəlli olacaq. Büdcə ilə bağlı geniş danışa bilmərəm.

– “Qarabağ” klubu ilə bağlı məlumatın var? Yaxınlarda Avropa Liqasında tarix yazaraq 1/8 finala adladılar…

– Əlbəttə ki, məlumatım var və oyunlarını görmüşəm. Dediyim kimi, Azərbaycan klublarını Avropa meydanlarında izləyirəm. Çünki mən azərbaycanlıyam. “Qarabağ” əla komandadır və onlar növbəti mərhələləri də haqq edirlər, layiqdirlər.

FƏRİD