Milli komanda
Klublara futbolçu paylayan AFFA işçisi: İK üzvü olan dayısı da yardım edir
İlqar Qurbanov futbolçu karyerasını bitirərkən tez-tez müsahibə verir, AFFA rəhbərliyini tənqid edirdi. Dedikləri arasında həqiqət çox idi, amma vəzifə alan kimi susdu.
Milli komandalara seleksiyaçı təyin olunan İlqar ilk vaxtlar müəyyən fəallıq göstərdi. Onun işi ölkə xaricində olan azərbaycanlı futbolçuları izləmək, milli komandaların məşqçilərinə təklif etmək idi. Nə etdiyini bilmirik – danışmağı yaxşı idi, hansı real işi gördüyünü isə bilmirik, bir gün fəaliyyətinin nəticələrindən bəhs etsə, məmnuniyyətlə qulaq asarıq.
Amma Qurbanov boş dayanmır, milli komandalara xeyri olmasa da, öz vəziyyətini düzəltmək üçün xeyli iş görüb. Fəaliyyət dairəsi, tapşırıqları, vəzifəsi tamam fərqli olan bir AFFA işçisinin klublara futbolçu gətirdiyini eşitmək maraqlıdır. AFFA-dan susmaq haqqı olan havayı maaşı alır, özü isə “çak-çuk”undadır.
“Səbail”in yeni transferi Matiya Lyuyiçin gəlişində məhz Qurbanovun imzası var. Düzdü, serbi komandaya başqa menecer təklif edib. Lakin klubun keçiddən imtina etməsindən sonra İlqar vasitəçi olaraq araya girib, AFFA-nın vitse-prezidenti Elxan Məmmədova zəng vurub və onun tapşırığı ilə keçid tamamlanıb.
Bu, Qurbanovun “gördüyü işlərdən” yalnız biridir. “Kəpəz”in hücumçusu Salif Sissenin meneceri də milli komandaların seleksiyaçısıdır. 13 illik karyerası ərzində cəmi 13 qol vurmağı bacaran fransalı hücumçunun Gəncədə görünməsinin səbəbkarı məhz İlqardır. Məşqçilərin bəyənmədiyi, oynadığı matçlarda qapıya yaxınlaşa bilməyən, son turlarda isə ayağını qucaqlayıb oturan Salifin transferi birbaşa tapşırıqla həll olunub.
Belə ki, Qurbanov keçidinə görə yüksək komisyon haqqı aldığı oyunçunu “Kəpəz”ə yerləşdirmək üçün dayısından istifadə edib. AFFA İcraiyyə Komitəsinin üzvü və Regional Futbol Federasiyasının prezidenti İsgəndər Cavadovun bir zəngi komanda üçün lazımsız bilinən Sissenin heyətə qatılması üçün kifayət edib.
Cavadovun həm də “Kəpəz”in kuratoru olduğunu yadınıza salmaqda fayda var. Komandanın hazırda son pillədə qərarlaşmasının səbəbi elə bu cür əməliyyatlardır. Gəncə klubunda faydalı işlər görmək əvəzinə, “Kəpəz”dən şəxsi məqsədlər üçün istifadə edirlər. Dövlətin ayırdığı büdcəni məhz bu cür cibə ötürür, güzəranlarını qururlar.
İlqar Qurbanov menecerlik etməyində olsun, milli komandalar braziliyalı, xorvat, rus, ukraynalı, tüurkiyəli futbolçularla zənginləşir. Aşağı yaş qruplarına isə millilənləri komandaların inzibatçıları gətirir. Hamı alverlə məşğuldur, ölkə futbolunun inkişafını düşünmək yalnız jurnalistlərə qalıb.
CAVAD
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…
- Digər idman növləri2024-04-12 00:29
“Anadolu Efes” növbəti mərhələdə