I Liqa
Küləkdə sovrulan qazon: Gəncə lövhələri
Ey fələk, eylə külək,
Qaldır onu, bir də görək!
Ağlınız başqa yerlərə getməsin, olmuş hadisəni təsvir etmək üçün daha uyğun giriş tapa bilmədim. Və həmin mənzərəni seyr etmək üçün Almaniyanı ağuşuna alan “Sabina” qasırğasına ehtiyac yoxdu. Heç Bakı küləyinin gücü də lazım deyil. Hətta xəfif Gəncə mehinə dözməyən ot örtüyündən bəhs edəcəyik.
Yeni ot örtüyü cəmi 2 il öncə təhvil verilən Gəncə stadionu başqa bir dərddi. Bu tur “Kəpəz”in ev oyunundan fotoları izləməklə meydançanın necə saraldığına əyani şahid olacaqsız. Bakıda yamyaşıl meydanlarda futbol oynanılarkən, Gəncədə hələ də bunun çarəsini tapmayıblar.
Meydançaya qulluq edən və qarşılığında hətta “Kəpəz”in görmədiyi büdcəyə sahib çıxan cavabdeh şirkət buna mane olmalıydı. Olmayıblar və bəlkə də azacıq bəhanə üçün əsasları var – təbiətdən gileylənə bilərlər. Lakin ehtiyat meydançanı quraşdıranların belə bir şansı yoxdu. Çünki süni örtüklü meydançanın qazonunun rəngindən yox, dalğalanmasından bəhs edirik.
“Dalğa Arena”dan sökülərək Gəncəyə aparılan, 3 il stadionun ərazisində yağışın, günəşin altında qaldıqdan sonra, nəhayət, ötən ilin sonunda döşənən süni ot örtüyü indi gəncəliləri əyləndirməkdədi. Qazon başdansovdu döşənib, yapışdırıcısına cib doldurmaq məqsədi ilə qənaət edilib. Sanki betonun üstünə xalça-palaz səriblər.
Ötən həftə Gəncədə keçirilən oyun zamanı səhlənkarlığın, saxtakarlığın üstü açılıb. Küləkli hava şəraitində baş tutan oyunda qazonun altına dolan hava kütləsi örtüyü dalğalandırmaqla həm futbolçulara mane olub, həm də azarkeşləri əyləndirib. Açıq havada bu riski edənlər yəqin ki, havaların günəşli keçəcəyinə arxayın imiş.
Külək, niyə belə əsirsən, külək,
Niyə ümidimi kəsirsən, külək?
AĞA
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı