“Lənkəranda mütləq böyük futbol olmalıdır”

Azərbaycan yığmasının sabiq futbolçusu, hazırda II Liqada çıxış edən “Şahdağ Qusar”ın formasını geyinən Rahid Əmirquliyevin futbolinfo.az saytına müsahibəsi

– “Şahdağ Qusar” II Liqanın ikinci dövrəsinə lider “Baku Sportinq” ilə oyunla (1:1) başladı və meydandan xalla ayrıldı. Bu nəticəni özünüz üçün yaxşı hesab edirsiniz, yoxsa hesabdan narazı qaldınız?

– Çempionatın lideri ilə oynayırdıq. Buna baxmayaraq, qələbə qazanmaq və liderlə aradakı xal fərqini azaltmaq istəyirdik. Təəssüflər olsun ki, qalib gələ bilmədik. Əslində, sərgilədiyimiz oyuna görə 3 xala layiq idik. “Baku Sportinq” də güclü rəqibdir. Çempionatın birinci dövrəsindəki nəticələri ilə bunu sübut edib. Liderlə heç-heçə mövsümün ikinci yarısına pis başlanğıc deyil. Sadəcə, biz meydana 3 xal üçün çıxmışdıq.

– Qol vuranda hansı hissləri keçirdiniz? Belə məqamlarda heç öz-özünüzə deyirsiniz ki, hələ də oynamaq gücünüz var?

– Əlbəttə, qol vurmaq yaxşı hissdir. Meydana çıxan hər futbolçunun məqsədi qol vurmaq olur. Amma qol vurandan sonra elə hiss gəlməyib ki, gücüm var, hələ oynaya bilərəm. Düzdür, gücüm var. Ancaq Premyer Liqaya qayıtmaqdan söhbət getmir. Əsas odur ki, qol vuraraq, komandama kömək edim. Heyf ki, vurduğum qol qələbə üçün yetərli olmadı.

– Hazırda turnir cədvəlində 4-cü pillədəsiniz. Mövsümü neçənci yerdə bitirəcəyinizə inanırsınız?

– Son turdakı nəticələrdən sonra 2-ci yerdən 4-cü pilləyə düşdük. Ancaq hələ qarşıda çox oyun var. “Şahdağ Qusar” yaxşı komandadır, məqsədimiz çempionluqdur. Birinci yerdən 7 xal geri qalsaq da, digərləri ilə arada az xal fərqi var. Çempionluq məqsədimizdən əl çəkməyəcəyik. Bundan sonrakı bütün oyunlarımıza da qələbə üçün çıxacağıq. Bu komanda ilə çempionluq yaşaya biləcəyimizə dair məndə ümid var.

– Növbəti turda sizi daha bir çətin oyun gözləyir. “Cəbrayıl” ilə görüşdə şansları necə dəyərləndirirsiniz?

– Ardıcıl 2-ci oyunda güclü rəqiblə üz-üzə gələcəyik. Hazırda “Cəbrayıl”la oyuna hazırlaşırıq. “Cəbrayıl” da çempionluğa oynayan komandalardandır. Cavid Hüseynov yaxşı kollektiv formalaşdırıb. Ancaq biz də zəif deyilik. Düşünürəm ki, maraqlı və ağır oyun olacaq. Hər iki komandanın yaxşı nəticə qazanmaq şansı var. Çalışacağıq ki, meydanı qələbə ilə tərk edək.

– Sabiq komandanız “Qarabağ” bu gün Avropa Liqasında “Bayer” ilə üz-üzə gələcək. Sizcə, komandamızın bu görüşdə sensasiya etməyə gücü çatacaq?

– Bütün Azərbaycan səbirsizliklə “Qarabağ”ın oyununu gözləyir. “Braqa” səddini keçəndən sonra ölkəmizdə futbola maraq daha da artıb. Bu, bilet satışından da görünür. Stadionda anşlaq olacaq. Təbii ki, cütün favoriti “Bayer”dir. Rəqib çox güclüdür, bunu həm Avropa Liqasında, həm də Bundesliqada sübut edir. “Bayer” uzun müddətdir ki, məğlubiyyətin nə olduğunu bilmir. “Qarabağ”ı çox ağır oyun gözləyir. “Braqa” ilə görüşdə də rəqib favorit sayılırdı. Amma “Qarabağ” öz oyunu ilə sübut etdi ki, istənilən komandaya qarşı oynaya bilər. İnanırıq ki, komandamız yenə layiqli çıxış göstərəcək.

– Digər keçmiş komandanız “Xəzər Lənkəran”ın fəaliyyətini bərpa edəcəyi haqda xəbərlər yayılıb. Bu barədə nə deyə bilərsiniz?

– Bu xəbəri eşidəndə sevindim. Deyilənə görə, Lənkəran stadionunu artıq təmirə bağlayıblar. Bu xəbər həm mənim, həm də “Xəzər Lənkəran”ın azarkeşləri üçün çox sevindiricidir. Lənkəranda mütləq böyük futbol olmalıdır. O cür azarkeşlər böyük futbola layiqdirlər. “Xəzər Lənkəran”ın Premyer Liqaya qayıdacağı anı səbirsizliklə gözləyirəm.

FƏRİD