Müsahibə
Lukoviç: “Qələbə qazanmaq üçün daha çox işlər görməliyik”
“Çətin oyun oldu. Birinci hissədə nəzarət bizdə idi. İkinci yarıda isə bir az əsəbi olmağa başladıq. Bu matçda qalib gəlməli idik. Amma futbolda hər şey olur” – bunu futbolinfo.az-a açıqlamasında “Zirə”nin yarımmüdafiəçisi Andriya Lukoviç deyib.
O, Azərbaycan Premyer Liqasının 25-ci turunda “Şamaxı” ilə heç-heçə (2:2) etdikləri matçdan danışıb: “Əgər oyundan əvvəl kimsə soruşsaydı, təbii ki, biz 1 xalla kifayətlənməli olmayacağımızı, qələbə qazanmalı olduğumuzu deyərdim. Amma oyunun bitməsinə 10 dəqiqə qalmış uduzuruqsa və son 10 dəqiqədə bərabərlik qolunu vururuqsa, 1 xal qazandığımıza sevindiyimizi deyə bilərəm. Gələcəkdə belə ev oyunlarında qalib gəlməliyik”.
Serbiyalı futbolçu komandanın son 6 turda 5 xal qazanmasına da toxunub: “Əminəm ki, biz bu oyunları pis oynamamışıq və daha çox xala layiq idik. Lakin indi liqada bütün komandalar mövsümün ilk hissəsindəkindən daha yaxşıdır. 3 xal qazanmaq üçün daha çox işlər görməliyik. Yaxşı oynayırıq, amma bəzən konsentrasiyanı itiririk. Diqqətimizi daha çox cəmləməliyik”.
Lukoviç qarşıdakı turda “Kəpəz”ə qarşı keçirəcəkləri oyundan da söz açıb: “Gəncədə oynamaq asan deyil. Çalışacağıq ki, qalib gələk. Çünki hazırda hər oyun vacibdir. Bunu edə bilərik”.