Ölkə futbolu
Məmmədovu niyə indi istefaya səsləyirlər? – VİDEO
“Qarabağ” – “Keşlə” oyununun sonlarında başverənlər sıradan olay deyildi. Premyer Liqanın sıradan, amma milliyə görə yaranan fasilədən həmən sonrakı ilk matçında AFFA-nın icraçı vitse-prezidenti Elxan Məmmədovun azarkeşlər tərəfindən istefaya çağırılması hansısa prosesin tərkib hissəsi, bəlkə də başlanğıcıdı.
Məmmədovdan ictimai narazılıq pik həddədi və o, özü də bunun fərqindədi. Millinin uğursuz çıxışları, uşaq futbolunun bərbad durumu, bölgələrin diqqətsiz qalması, komanda sayının azlığı – bütün bunların əsas günahkarı kimi haqlı olaraq Məmmədov göstərilir. 14 ildi ölkə futbolunu birbaşa idarə edən bu şəxs bəlaların baş rolundadı.
Narazılıqların artması hərəkətliliyə səbəb olub. Az qala bütün telekanallarda futbolla bağlı verilişlər açılıb, müzakirələr çoxalıb, hamısında da tənqid hədəfi AFFA, xüsusilə də Elxan bəydi. İcraçı vitse-prezident haqlı tənqid və təzyiqlərin artdığı bir vaxtda 14 illik yuxudan ayılıb və iş görüntüsü yaradır. Rayonları bir-bir gəzmək, uşqalara müxtəlif hədiyyələr paylamaq, könül oxşamağa cəhd etmək təsadüfi deyil. İllərdi atılmayan addımlar indi sıralanıb. Və Məmmədov bunu futbola sevgisindən deyil, təzyiqlər önündə manevr cəhdi naminə edir.
AFFA rəhbərliyinin dünən bir sıra şəhərlərdə stadionların qazonunu dəyişmək barədə qərarı da olayların davamıdı. Rövnəq Abdullayev futbola qayıtdığını, problemlərin həllinə çalışacağını boşuna deməmişdi. AFFA prezidenti kisənin ağzını açıb, real iş görür. Və təbii ki, milyonların xərclənməsi bir nəfərin qərarı ola bilməz, deməli, hamısı razılaşdırılıb. O başqa məsələ ki, illərdi yada düşməyən bölgələr məhz narazılıqların artdığı, yığmanın faciəvi nəticələrinin sıralandığı bir zamanda yada düşüb, bu yolla problemlərin üzərinə pərdə çəkilir.
Bütün bunların fonunda dünənki istefa şüarları qəribə göründü. Kiminsə haqqına girmək istəmirik, sadəcə, işimiz informasiya vermək, gördüyümüzü ictimaiyyətin diqqətinə çatdırmaqdı. Canlı efirdə də eşidilən şüarları eşitməyənlər üçün videogörüntü də hazırlamışıq. Yəni, özümüzdən xəbər uydurmamışıq, olayı ictimailəşdirmişik.
Bu tələb-şüarın 3 səbəbi ola bilər:
…Ya əks-cəbhə də var və onlar azarkeşlər arasında təbliğat aparır, belə aksiyalar təşkil edir. Turun digər oyunlarında nələrin baş verəcəyini izləyib görəcəyik;
…Ya şüarlar narazı azarkeşlərin öz ideyasıdı. Onları da qınamaq olmaz, nələrin baş verdiyini onlar da görür, günahkarı tanıyırlar;
…Ya da bunu təşkil edənlərin məqsədi var. “Qarabağ”ı hədəfə gətirmək, gözdən salmaq üçün bu komandanın oyununda başqaları da belə bir şey təşkil edə bilər.
Bütün bunlar versiyalardı. Dəqiq olan isə “Elxan – istefa” şüarlarıdı və dünən “Azərsun Arena”da olanlar, eləcə də ekran qarşısında matçı izləyənlər nə baş verdiyini gördü.
Prosesi izləyəcəyik.
CAVAD
P.S.: AFFA-nın elan etdiyi tenderin nəticələrinə də diqqət edəcəyik. Belə tenderləri adətən AFFA rəsmilərinin öz adamları, öz şirkətləri udur.
- Premyer-liqa2024-05-25 08:32
Mövsümün son turuna start verilir
- Ölkə futbolu2024-05-26 09:00
Avrokubokdan kənar qalmaq “Neftçi”nin xilası üçün şansdır
- Premyer-liqa2024-05-25 21:02
“Zirə”, “Sabah” və “Sumqayıt” avrokuboklara vəsiqəni təmin etdilər!
- Premyer-liqa2024-05-24 14:14
Premyer Liqanın 3 klubu cərimələndi