Maltada baltalananlar – Məmmədovun əlində əsir qalan futbolumuz

Özümüzü aldatmayaq – Qara Qarayev meydandan qovulmasaydı və ya “qəhrəmanlığından”  az öncə tirə dəyən zərbəsi toru silkələsəydi, nə olacaqdı ki? Heç-heçə və ya təsadüfi qələbə miskin görünən milli komandamızın üstündən tənqidləri yox edəcəkdi?

Hətta bəxt də üz döndərib və bu, inanın ki, xeyrimizədi. Unutqan olduğumuzu özümüzdən başqa hamı bilir, bərbad gündə olan rəqiblərlə matçda qələbə qazana bilmirik, sanki ayılmağımızı gözəgörünməz qüvvələr də istəyir. Bizim “gözügörənlərimiz” əlini gözünə tutub olanlara seyrçi qaldığı bir vaxtda…

Latviya hazırda Avropanın ən bərbad yığmalarındandı, Elxan Məmmədovun həvəskar düşüncəsinə uyğun, Region Liqasında oynayacaq səviyyədə bir komandadı. Ən güclü vaxtlarında uduzmadığımız, Qurban Qurbanovun vaxtında səfərdə yendiyimiz bu yığmaya indi Maltada uduzuruq. Həm də Canni de Byazinin bəhanələrini gözünə soxacaq bir vəziyyətdə – çünki həmişə rəqiblərin daha yüksək reytinqli olmasından şikayətlənən italiyalı, ardıcıl 2 matçda özümüzdən zəif olana baş əydi.

De Byazinin oyunsonrası sərsəmləmələrini şərh etmək belə mənasızdı, hiyləgər qoca nə danışdığını özü də bilmir, ya da bilir, sadəlövh bizləri aldatmağa davam edir. Bəlkə də onun eynəyindən meydan fərqli görünür, bu üzdən komandadan razı qalıb.

Hələ müqaviləsinin bitməsinə bir neçə ay qalıb, Millətlər Liqasında daha bir rüsvayçılığa imza atandan sonra rədd olacaq. Onun gördüyü işlə yaxşı nəyəsə ümid etmək mənasızdı. De Byazinin taktiki gedişləri, oyun anlayışı, futbolçu seçimləri faciəvidi. Gah gəncləşdirmədən, gah veteranlara güvənməyin vacibliyindən danışır – açıq-aşkar kələfin ucunu itirib, müqaviləsinin sonuna kimi qalmaq, imkan daxilində çox pul qazanmaq istəyir.

Bütün bunlar bizə bəlli olan, analizlərə əsasən aylardı yazdıqlarımızdı, sadəcə, təkrarlayırıq. Və indi italiyalını söyməyin mənası yoxdu, o, özü üçün yaxşı olana çalışır, pulunu qazanır. Əsas günah ona bu şansı yaradanlarda, bitmiş müqaviləsini yeniləyənlərdədi. AFFA İcraiyyə Komitəsinin üzvləri, mütəşəkkil dəstənin başçısı, ssenari müəllifi, icraçı vitse-prezident Elxan Məmmədov məşhər ayağına çəkilməlidi. Və hətta dünən Latviyanı yensəydik də, belə olmalıydı. Millimiz futbol oynamır, ölkənin imicini ayaq altına atmaqla məşğuldu.

Fərdləri qınamaq asandı, məşqçi, futbolçular hər cür tənqidə layiqdi. Lakin əgər illərdi eyni durum davam edirsə, artıq “başları”, futbol idarəetmə sistemini, ən əsası, baxışımızı dəyişməliyik. Bundan daha aşağası yoxdu, uçurumun dibindəyik. Ciddi islahatlar aparılmalı, futbol sistemini kökündən yeniləməliyik. Bu, Elxan Məmmədovla, onun marketoloq dəstəsi ilə mümkün deyil. 15 ildi davam edən səriştəsiz fəaliyyətin bir sonu olmalıdı.

Bu nəticə bir neçə günlük tənqid dalğası ilə unudulmamalıdı. Məmmədov və dəstəsi sabahdan başlayaraq fotosessiyalar edəcək, klubların geri qaytardığı yararsız topları hansısa bölgənin uşaqlarına paylamaqla gündəmi dəyişməyə çalışacaq. Gündəm dəyişməklə nəticələr dəyişmir, sistemi, səriştəsiz idarəçiləri dəyişmək lazımdı. Həm də təkcə Elxanı yox, bütün İcraiyyə Komitəsi üzvlərini, Maltaya turist kimi gedib-qayıdan Vaqif Sadıqovu, İsgəndər Cavadovu və başqa işbilməzləri.

FƏRİD