Mikels üçün yığma seçimi: “Ürəyim həmişə Konqo ilə olub, amma…”

“Sabah”ın almaniyalı futbolçusu Coy-Lens Mikelsin futbolinfo.az saytına müsahibəsi

– Premyer Liqanın 11-ci turunda prinsipial rəqiblərinizdən biri olan “Neftçi”ni məğlub etdiniz. Oyunu necə dəyərləndirərdiniz?

– Bu oyunu digər matçlarımızla müqayisədə xüsusi fərqləndirməzdim. Çünki bizim üçün hər rəqiblə görüş vacibdir. Bütün matçlar çətin keçir. Bu oyun da istisna olmadı. Güclü rəqibə onun stadionunda qalib gəlmək çox xoşdur.

– Hesab artıq 3:0 olanda hamı fərqin daha da artacağını düşünürdü, çünki rəqib də sonradan azlıqda qaldı. “Neftçi” 10 nəfərlə qaldıqdan sonra çətinlik çəkməyiniz arxayınlıqla bağlı idi, yoxsa başqa amili səbəb kimi göstərmək olar?

– Həmin anlarda nə baş verdiyini mən də anlamaqda çətinlik çəkirəm. Ola bilsin ki, oyuna konsentrasiyanı itirdik. Lakin bu, futboldur. Futbolda belə hallar yaşanır. İnanıram ki, gələcəkdə təkrarlanmayacaq.

– “Neftçi”ni artıq 6 xal qabaqlayırsınız. Əsas rəqiblərdən birini sıradan çıxardığınızı düşünmək olar?

– Hələ çempionatın əvvəlindəyik. Bu barədə fikir bildirmək üçün tezdir. Ancaq onu deməliyəm ki, yaxşı komandamız var, baxımlı futbol sərgiləyirik. Ötən mövsümdən bu komandanın çox şeyə qadir olduğunu, lakin hələ yolun əvvəlində olduğumuzu deyirdim.

– “Sabah”ın futbolçuları “çempionluq” ifadəsi işlətməsə də, futbol ictimaiyyəti “Qarabağ”a əsas rəqib qismində məhz sizi görür. Ümumiyyətlə, komandanızın potensialı nəyə çatır?

– Bu barədə danışmaq üçün tezdir. Futbol ictimaiyyətinin bizim barəmizdə yüksək fikirdə olması xoşdur. Lakin hansısa komandanın əsas rəqibi olmaq üçün gərək əvvəlcə ona qalib gələsən. Nəyə qadir olduğumuzu mövsümün sonunda görəcəyik.

– Bu mövsüm “Sabah”ın hücum xəttində kifayət qədər ciddi rəqabət var. Hazırkı hücum xəttini ötən mövsümdəkindən güclü saymaq olar?

– Bu suala cavab verməkdə çətinlik çəkirəm. Keçən il irəli xətdə texnikalı futbolçulara sahib idik. İndi isə daha çox komanda şəklində oynayırıq. Belə deyim: hazırkı heyətdə olan futbolçular bir-birlərini tamamlayırlar.

– 7 qolla bombardirlər sırasında 3-cü pillədəsiniz. Bir hücumçu kimi mövsümü bombardir qismində bitirmək istərdiniz? Ümumiyyətlə, Ramil Şeydayev və Musa Qurbanlı ilə mübarizədə şansınızı necə görürsünüz?

– Hamı məni hücumçu kimi qeyd edir. Lakin unutmaq olmaz ki, hücumçu deyiləm. Vurduğum hər qol məni çox sevindirir. Ancaq nəzərə almalıyıq ki, bu, mənim əsas işim deyil. Dediyim kimi, qollar vurmaq məni çox sevindirir. Bunu sevirəm və inanıram ki, öz komandama qollarla və assistlərlə kömək olmağa davam edəcəyəm. Mövsümün sonunda hesabımda neçə qol olacaq – görəcəyik. Bombardir olmaq? Mən penalti vurmuram, bəlkə o halda şansım daha çox olardı (gülür).

– Artıq bir ildən çoxdur Azərbaycandasınız. İstər futbolumuz, istərsə də ölkəmiz barədə nələr xüsusi diqqətinizi çəkib?

– Çox şey sadalaya bilərəm. Mən bu ölkədə rahatlıq tapdım. Azərbaycanda özümü çox xoşbəxt hiss edirəm.

– Sizi burada yaxşı və pis mənada ən çox nə təəccübləndirib?

– Mənfi mənada ancaq nəqliyyatı qeyd edərdim. Düzünü deyim, məncə, buradakı sürücülərin çoxu bu cür idarəçiliklə Avropada öz sürücülük vəsiqələrini itirərdilər (gülür).

– Azərbaycanda ən çox hansı müdafiəçiyə qarşı oynamaq sizə çətin olub?

– Çətin sualdır. Mənə qarşı fərdi oynayanda çətinlik çəkirdim. Lakin bu çətinliyi artıq geridə qoymuşam. Belə deyək, artıq tam uyğunlaşmışam.

– Vətəndaşı olduğunuz Almaniyanın dünya çempionatındakı şansını necə dəyərləndirirsiniz?

– Məncə, şanslar o qədər də yüksək deyil. Lakin ən yaxşısına ümid edirəm. Onu da deyim ki, mən Fransa millisinin böyük tərəfdarıyam.

– Əslən konqolusunuz. Necə düşünürsünüz, “Sabah”dakı uğurlu çıxışınızı davam etdirsəniz, bu ölkənin yığmasına çağırılmaq şansınız yaranarmı?

– Görək, dəqiq nəsə demək mümkün deyil. Əlbəttə, doğma ölkəmin – Konqonun millisində çıxış etmək istəyərdim. Öz üzərimdə çalışmağa davam edəcəyəm.

– Ümumiyyətlə, seçim etməli olsanız, Almaniya, yoxsa Konqo yığmasında oynamaq istərdiniz?

– Almaniyada doğulub böyümüşəm, lakin ürəyim həmişə Konqo ilə olub. Çətin seçim olardı. Amma məncə, Konqodan öncə Almaniyaya üstünlük verərdim.

CAVAD