Layihə
Mingəçevirdə yetişən gələcəyin çempionları – VİDEO
Boksun Mingəçevirdə inkişafı ötən əsrin 50-60-cı illərindən başlayıb. Şəhərdə bu idman növünün sevilməsi nəticəsində ənənələri olan məktəb formalaşıb.
Bunun nəticəsidir ki, sonralar Mingəçevir ölkə miqyasında tanınmış idmançıların yetişməsinə töhfə verib. Sidney Olimpiadasının bürünc mükafatçısı Vüqar Ələkbərovun və 1-ci Avropa Oyunlarının qızıl medalçısı Pərviz Bağırovun adını çəkmək kifayətdir. Mingəçevir boks məktəbin yetirmələri indi də milli komandalara cəlb olunur, müxtəlif beynəlxalq yarışlarda uğurlu nəticə qazanır.
İllərdi Mingəçevirdə boks idman növününün yaşamasında, inkişaf etməsində əməkdar məşqçi Rəşid Məmmədovun böyük xidməti var. İndi də onun rəhbərliyi altında hazırlaşan yeniyetmə və gənc dəri əlcək sahibləri yeni uğurlar qazanmaq üçün formalaşır.
Onlardan biri olan 17 yaşlı Nurlan Paşayev gənclərdən ibarət milli komandamızın üzvüdür. O, ötən il 60 kq çəki dərəcəsində Respublika çempionatının bürünc medalına sahib çıxıb. Nurlan daha ciddihazırlaşmaq, təcrübəsini artırmaq və Olimpiya Oyunlarında ölkəmizə qızıl medal gətirmək arzusundadır.
Rəşid Məmmədov tələbələrin hazırlıq prosesindən razıdı. O, Nurlanın və digər yetirmələrinin gələcəkdə milli komandanın dəyişilməz simaları olacağına inanır.
Mingəçevirdən olan boksçuları aprel ayında böyük sınaq gözləyir. Onlar yeniyetmə və gənclər arasında təşkil olunacaq Respublika çempionatında mübarizə aparacaq. Gündəlik məşqlərdə intensiv çalışan idmançılar sözügedən yarışda uğur qazanmaq, özlərini sübut edərək yığma komandalara düşmək istəyirlər.
Sonda onu da qeyd edək ki, Respublika çempionatında uğurlu nəticəyə imza atacaq idmançılar milli komandanın heyətinə cəlb olunacaqlar.
BƏHRUZ MUSAYEV, MİNGƏÇEVİR
Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.
Sahə: Uşaq və gənclərin fiziki və mənəvi inkişafında idmanın rolu
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…