Mirabdulla Abbasov: “Həm liqada qalmaq, həm də kuboku qazanmaq istəyirik”

“Səbail”in hücumçusu Mirabdulla Abbasovun futbolinfo.az saytına müsahibəsi

– Mövsümün geridə qalan 22 turluq periodunu “Səbail” necə dəyərləndirərdiniz?

– Təbii ki, turnir cədvəlində daha yaxşı yerdə olmağı istərdik. Təəssüf ki, nəticələr buna imkan vermədi. Lakin oyunumuzun heç də pis olduğunu düşünmürəm. Artıq hamımız yaxşı çıxışla yanaşı, həm də uğurlu nəticələr qazanmağa köklənmişik. İstəyimiz aşağı pillələrdən bacardığımız qədər uzaqlaşmaqdır.

– Mövsümün əvvəlində yığılan heyətə əsasən çoxları “Səbail”in iddialılar sırasında olacağını proqnozlaşdırırdı. Sizcə, komandanın hazırda autsayderlər zonasında yer almasının səbəbi nədir?

– Bəzən gözləntilər özünü doğrultmur. Mən də bunun fərqindəyəm. Heyətimizdəki futbolçuların hər biri meydanda öz sözünü deməyə qadirdir. Səbəblərin nə olduğunu dəqiqliklə deyə bilmərəm. Ola bilsin ki, yeni yığılmış komanda olduğumuz üçün uyğunlaşma prosesimiz uzun çəkdi. Bəhanələr gətirmək istəmirəm. Amma mövsümün ilk yarısında yaşadığımız bəxtsizliklərin də nəticəyə mənfi təsiri oldu.

– Mövsümün ilk yarısında 18 oyunda 2 qələbə qazanmısınızsa, qış fasiləsindən sonra bunu 4 matçda reallaşdırdınız. Deyəsən, baş məşqçi dəyişikliyi komandaya düşərli olub.

– Hazırda bütün komanda yoldaşlarımla birlikdə var gücümüzlə hər görüşdə maksimum nəticə qazanmağa çalışırıq. Bunun üçün əlimizdən gələnin ən yaxşısını edəcəyik. Qələbə qazandığımız qarşılaşmalar da bunun sübutudur. Komandada əhval-ruhiyyə yüksəkdir.

– Şahin Diniyevin qısa müddətdə etdiyi hansı dəyişikliklər diqqətinizi çəkib?

– Şahin müəllim təcrübəli və öz sözünü demiş məşqçilərimizdəndir. Komandada ab-havanı həmişə yüksək saxlayır. Böyük motivasiya və əzmkarlıqla bizi qarşıdakı matçlara hazırlaşdırır.

– Mövsümün ilk yarısı ilə müqayisədə şəxsi performansınızda nə kimi dəyişikliklər hiss etmisiniz?

– Mənim şəxsi performansımdan daha üstün komandamızın nəticəsinin yaxşı olmasıdır. Təbii ki, hər bir futbolçu kimi, mənim də əsas məqsədim komandamın qazandığı uğurlarda pay sahibi olmaqdır. Bunu komanda yoldaşlarımla birlikdə bacarmaq daha böyük zövq verir. Çünki futbol kollektiv oyunudur. Meydana çıxdınsa, şəxsi maraqlarını kənara qoymalı, komandan üçün vuruşmalısan. Peşəkar oyunçu olmaq bunu tələb edir.

– “Zirə” ilə oyunda fərqlənərək, bu mövsüm Premyer Liqada ilk qolunuzu vurdunuz. Nəhayət, tilsimi qırdığınızı demək olar?

– Cari mövsüm ölkə kubokunda və yoxlama görüşündə qol vurmuşdum. Amma Premyer Liqada bu mövsüm ilk qolumu vurdum. Ümid edirəm ki, bu qolların ardı gələcək və komandama daha çox fayda verərək, uğurlar qazanmasında pay sahibi ola biləcəyəm. Amma yenə deyirəm, əsas məsələ mənim qol vurmağım yox, komandamdır.

– Matçlarda adətən ehtiyatdan meydana daxil olursunuz. Əvvəlki Mirabdullanı izləmək üçün nə qədər vaxt lazımdır?

– Əsas heyətdə və ya əvəzetmədən meydana daxil olmaq baş məşqçinin qərarından asılıdır. Buna istənilən halda hörmətlə yanaşmalıyıq. Onlar hər şeyi analiz edirlər. Mən isə öz üzərimdə daha çox çalışaraq, görmək istədiyiniz Mirabdullanı göstərmək üçün çalışıram.

– Çempionatda sonuncu yeri tutub aşağı liqaya düşmək qorxusu davam edir. Eyni zamanda ölkə kubokunu qazana bilərsiniz. Seçim etmək imkanınız olsa, hansına üstünlük verərdiniz?

– Bu psixologiyanı öz üzərimizdən atmalıyıq. Elitada qalmaq uğrunda əzmkarlıqla mübarizə aparırıq. İnşallah, buna nail olacağıq. Kubok isə başqa cəbhədir. Çempionatdakı nəticələrin və ya neçənci yerdə qərarlaşmağın kubokda rol oynamadığını hamımız gördük. Buna görə də həm elitada qalmaq, həm də kuboku qazanmaq istəyirik.

– Növbəti turda yetirməsi olduğunuz “Neftçi” ilə qarşılaşacaqsınız. Bu matçı özünü təsdiq baxımından sizin üçün prinsipial saymaq olar?

– Mənim üçün rəqibin kimliyinin önəmi yoxdur. Hansısa prinsip də aparmıram. Şans veriləcəyi təqdirdə, bu görüşdə də maksimum gücümlə mübarizə aparmaq istəyirəm.

– “Bakcell Arena”dakı görüşə rəqib kimi hazırlaşmaq necə hissdir?

– “Bakcell Arena” mənə çox doğmadır. Ümumiyyətlə, Azərbaycanda ən çox bəyəndiyim stadiondur. Oradakı qarşılaşmalara başqa həvəslə hazırlaşıram. Məhz “Neftçi”yə qarşı oyun olduğuna görə yox, bu stadionu sevdiyim üçün.

CAVAD