“Monqolustana qarşı daim oynamayan futbolçuların çıxış etməsi daha xoş olardı”

“Qəbələ”nin müdafiəçisi İlkin Qırtımovun futbolinfo.az saytına müsahibəsi

– Milli komandamızın Monqolustana (1:0) və Bolqarıstana (1:1) qarşı keçirdiyi oyunları izlədinmi?

– Bəli, oyunları izlədim. Monqolustana qarşı yığmada daim oynamayan futbolçuların çıxış etməsi daha xoş olardı. Onlara şans verilərdi, özlərini sınayardılar. Komandanın oyununda qeyri-adi nəsə görmədim. Baş məşqçinin, Canni de Byazinin olub-olmadığı hiss edilmirdi. Belələrini gətirib baş məşqçi qoyub yığmanı bu vəziyyətə salınca özümüzdə daha yaxşı iş görənlər var.

– Aprelin 2-də AFFA-da seçkilər olacaq. Səncə, bundan sonra milli komandalarda hansısa dəyişikliklər olacaq?

– Əlbəttə ki, dəyişiklik lazımdır. İnkişaf etmək üçün həmişə yeni nəyəsə ehtiyac var. Sadəcə, etdiyimiz səhvləri təkrarlamamaq üçün yollar axtarmaq lazımdır.

– Qayıdaq çempionata, fasilədən necə istifadə etdiniz?

– Fasilədən yaxşı istifadə etdik. Məşqlərimiz yaxşı keçir, zatən son oyunda da pis oynamamışdıq. “Araz-Naxçıvan”la matçda imkanlarımız oldu, amma qol vura bilmədik. Rəqib də 10 nəfərlə qalmışdı. Fərq ondadır ki, biz 10 nəfərlə qalanda rəqiblər 3 qol vurur, amma biz şanslarımızdan istifadə edə bilmirik. Problem tək hücum xəttində deyil, hamıya aiddir.

– Sonuncu pillədən qurtulmaq üçün nə lazımdır? Sizin üçün artıq çempionatın həlledici mərhələsi başlayır…

– Futbol dilində desək, biz sadəcə, “döyüşməliyik”. Başqa şansımız və ya yolumuz yoxdur.

– Əsas rəqibiniz “Kəpəz”in də xal itirməsi vacibdir…

– Əlbəttə ki, onlardan da çox şey asıldıır. Amma biz öncə öz oyunumuza baxmalıyıq, nəticə qazanıb sonra rəqibi izləməliyik.

– Kaxaber Sxadadzenin gəlişi nəticə barədə heç nəyi dəyişməyib. Bəs, ümumilikdə hansı amillərdə dəyişiklik var?

– Oyun üslubumuz dəyişib. Bu da komanda üçün maraqlıdır, yeni taktikadır. Düzdür, mənə yad deyil, bu taktikada oynamışam. Amma komanda olaraq çalışrıq və ümid edirəm ki, bəhrəsini görəcəyik.

– “Qəbələ” liqadan düşsə, bunu qəbul etmək nə qədər çətin olacaq?

– Əlbəttə ki, həm Azərbaycan futbolu üçün böyü zərbədir, həm də bizim üçün çox pis haldır. Bu cür nəticələr tarixdə qalır və sonra komandaya da pis təsir edir.

– Növbəti turda qarşılaşacağınız “Neftçi”ni məğlub etmək mümkün görünür?

– Belə hər bir komanda üzərində qələbə qazanmaq mümkündür. Sadəcə, meydana çıxıb fürsətlərdən yararlanmaq lazımdır.

FƏRİD