Naxçıvanın cütloqolu “Keşlə”si: “Samaya” da gəlsin, tam olsun

“Keşlə” yaşayır. Adı başqa olsa da, başqa bölgəni təmsil etsə də, Premyer Liqadadır.

Söhbət “Şamaxı”ya çevrilən komandadan getmir. Zaur Axundov “Keşlə” – “Şamaxı” addəyişməsinin əvəzini Naxçıvanı Bakıya köçürməklə, muxtar respublikanın klubunda öz idarəetmə üsulunu tətbiq etməklə çıxır.

Son təyinatlardan sonra anladıq ki, I Divizionun qalibi kimi Premyer Liqaya gələn “Araz-Naxçıvan”ın yalnız adı var. Komanda Bakıda məskunlaşacaq, ən azı 6 ay burada oynayacaq və onu “Keşlə”nin sabiq rəhbərliyi idarə edəcək. “Keşlə” “Şamaxı”ya çevrilərkən komandanın prezidenti postunu tərk edən Zaur Axundov indi də “Araz-Naxçıvan”d söz sahibi olacaq.

Ötən həftə Naxçıvan klubunun rəhbərliyi müəyyənləşdi, Ramin Axundov prezident təyin olundu. AFFA İcraiyyə Komitəsinin üzvü, Futzal Federasiyasının prezidenti Zaur bəy qardaşını posta oturtmaqla klubda idarəçiliyi ələ keçirdi və beləcə klub futboluna qayıtdı.

Sponsorların, müxtar respublikada idmana cavabdeh şəxslərin addımını qınamırıq, özləri bilər, yəqin daha layiqli başqa namizəd tapmadıqları üçün belə qərar verilib. Məsələ “Araz-Naxçıvan”ın “Keşlə” kimi idarə olunmasındadır. Sözügedən klubla bağlı tarixdə o qədər xoşagəlməz xatirə var ki, saymaqla qurtarmaz.

Eyni taktika yenə qüvvədədir. Təsəvvür edin, “Araz-Naxçıvan”ın əsas rəhbərliyi, Rail Məlikovdan Əfran İsmayılova kimi məşqçi heyəti, hətta əvəzedici komandasının məşqçiləri də “Keşlə”dən gedənlərdir. Naxçıvan klubunun Divizionda oynayarkən əziyyətini çəkən şəxslər kənara atılıb və yenilər hazıra nazil olublar. Həm də sanki stadionun təmiri ilə bağlı məsələlər süni şəkildə yubadılıb ki, komandanı Bakıya rahat köçürə bilsinlər.

Maraqlıdı ki, dünyada analoqu olmayan addım da atılıb. Klubun loqosu iki rəngdə hazırlanıb – sanki qırmızısı “Keşlə”ni, göyü “Araz-Naxçıvan”ı xatırladır. Komandanın formalarının önünə “Samaya”nın reklamı da vurulsa, “Keşlə”nin zühuruna şahid olacağıq. Əminik ki, Axundov titul sponsoru kimi məhz öz şirkətinin adını formalara yapışdıracaq – çox keçməz səsi çıxar.

Mərdəkanda oynayacaq Naxçıvan “Keşlə”sinə dair daha bir formallığı Adil Şükürov ifşa edib. Muxtar respublikaya bu bölgədə uşaq futbolunu dirçəltmək, komandalar formalaşdırmaq üçün gedən və xeyli iş görən, Futbol Akademiyasının koordinatoru Şükürov indi kənara atılıb. Komanda paytaxta köçürülüncə onun zəhmətinin üstündən xətt çəkilib, az-çox qurulan iş dayandırılıb, komanda Diviziondan Premyer Liqaya yüksəlincə yeni sahiblər ortaya çıxıb və Adil bəy də “lazımsızlar” siyahısına düşüb.

Adil bəyin dünən sportal.az saytına açıqlamasına diqqət edək: “Naxçıvanda birlikdə işlədiyim hər kəsə təşəkkür edirəm. Uzun müddət idi ki, bu bölgədə futbol yox idi. Çalışdıq ki, Naxçıvan futboluna faydamız olsun. İnanıram ki, belə də oldu. Çempionatların keçirilməsi, məşqçilərin maarifləndirilməsi ilə bağlı məsələlərdə nəyəsə nail ola bildik. Orada çalışanlara, bundan sonra da işləyəcəklərə uğurlar arzulayıram. İstəyərdim ki, əməkdaşlığımız, münasibətlərimiz davam etsin. Oradan getdiksə, o demək deyil ki, bütün münasibətlər, əlaqələr kəsilməlidir. Davam etməlidir. Şəxsən Vüqar Abbasova, Tural Hüseynəliyevə, Hümbət Qəhrəmanova minnətdarlığımı bildirmək istəyirəm. Fəxr edirəm ki, belə insanlarla tanış oldum və birlikdə işlədim. Hər birinə təşəkkür edirəm. Bu insanlarla işləmək qüruruverici idi. Onlar “Araz Naxçıvan”ın inkişafı üçün nələrsə etməyə çalışırdılar. Klubdan ayrılmağımın əsas səbəbinə gəlincə, bütün danışıqlarımız, bütün razılaşmalarımız Vüqar müəllimlə olmuşdu. Fikirləşdim ki, Vüqar Abbasovla bərabər mən də ayrılsam, yaxşı olar”.

Son cümləyə diqqət: Vüqar Abbasov klubdan ayrılıbsa, o zaman Müşahidə Şuasının sədri təyin edilən Vüqar Abbasov kimdir? Deməli, bu təyinat da formallıq üçün edilib. Axundovun ağa olduğu klubda kim nəyi müşahidə edə bilər ki? Bu şəxs “Keşlə”də həm Müşahidə Şurasının sədri, həm prezident idi, “Araz-Naxçıvan”da isə qardaşı prezidentdir, Müşahidə Şurası isə formallıq. “Nəzarətə nəzarət” elə Zaur bəyin əlindədir.

İnsaf naminə, Axundov kluba özü də pul xərcləyir, yalnız dövlətin ayırdığı yardımla kifayətlənmir. Amma və lakin Zaur bəyin xərclədiyi onun üçün yaradılan şərait sayəsində qazandıqlarının neçə faizidir?!

FƏRİD