Okan Buruka “6 futbolçu” şərti

Milli komandamızın baş məşqçi postuna əsas namizəd olan Okan Burukla danışıqlar davam edir. Gənc mütəxəssislə bir sıra detallar dəqiqləşdirilir, onun razılıq verməsinə cəhd edilir.

Samet Aybaba və başqalarıyla bağlı xəbərlər ciddi deyil, onlar sadəcə, geniş siyahıya salınmış adlardı. Ola bilsin, müxtəlif menecerlər vasitəsi ilə ikinci dərəcəli belə məşqçilərin də fikirləri öyrənilir. Milli komandanı Nikola Yurçeviç kimi sıradan adama tapşırmış AFFA-nın hətta Aybabanı baş məşqçi postuna gətirməsi də sensasiya sayılmamalıdı, amma hazırda əsas namizəd məhz Okan Burukdu.

Sabiq yarımmüdafiəçi millimizdən təklif alması ilə bağlı nə təsdiq, nə də təkzib açıqlaması verib. Bizdə olan bilgiyə görə, o, danışıqlar bitənə kimi susmağı lazım bilir. Okan Burukun ölkəmizə gəlmək istəməməsinin əsas səbəbi ailəsiylə, övladının sağlamlıq durumuyla bağlıdı. Lakin bizimkilər Türkiyədə daha çox vaxt keçirməsinə razılıq versə, təyinat reallaşa bilər.

Maliyyə məsələləri öz yerində, Okanın tərəddüdünün digər səbəbi qarşısına qoyulan qəribə şərtdi. Belə ki, AFFA adından Burukla danışıq aparan şəxs 6 futbolçunun daim milliyə çağırılmasını tələb edib. Adını dəqiqləşdirə bilmədiyimiz həmin oyunçular formasından, durumundan asılı olmayaraq, yığmanın düşərgəsində olmalıdı. Böyük ehtimalla həmin oyunçular milyonlar xərclənərək millimizə gətirilən Renat Dadaşov, Filip Ozobiç və başqa milliləşənlərdi. Ola bilsin, “Sumqayıt”ın menecer-prezidenti Riad Rəfiyev başqa bəhanə ilə müştərisi olan bəzi futbolçularla da bağlı şərt qoyub.

İstənilən halda, Okan Burukla danışıqlar davam edir. Millinin yeni baş məşqçisinin Türkiyədən olacağı dəqiqdi, “yuxarı”dan belə tapşırıq verilib. AFFA hələlik siması daha cəlbedici olan şəxslə danışıq aparır, alınmasa, digər variantlara nəzər yetiriləcək. Buruk millimizin Lüksemburqla oyununa da dəvət olunub. Bu gün onun Lüksemburqla matçı tribunadan izləməsi mümkündü.