Müsahibə
“Onlar olmadan istədiyim oyunu sərgiləyə bilməzdim”
“Sabah”ın hücumçusu Coy-Lens Mikelsin futbolinfo.az saytına müsahibəsi:
- “Neftçi” ilə oyunda qalib gəldiniz. Bu matç haqqında fikirlərin necədir?
- “Neftçi” oyuna fəal başladı və matçın əvvəlində topa daha çox sahib idilər. İlk hissədə öz oyunumuzu tapa bilmədik. Çoxlu səhvə yol verdik ki, bunun da nəticəsində ilk hissəni geridə başa vurduq. Fasilədən sonra bəzi dəyişikliklər etdik və bunun da nəticəsində oyunda üstünlüyü ələ aldıq. Bunun da nəticəsində oyunda iki qol vuraraq önə keçdik və yekunda layiq olduğumuz qələbəni qazandıq.
- İki qol vurdun…
- Əsas komandamın qələbəsidir. Qolu kimin vurmasının elə də önəmi yoxdur. Ancaq əlbəttə, 2 qol vurmağım mənim üçün ikiqat sevindiricidir. Lakin bunda komanda yoldaşlarımın əməyini xüsusi vurğulamalıyam. Onlar olmadan meydanda istədiyim oyunu sərgiləyə, dubl edə bilməzdim.
- Sanki komanda “qara zolaq”dan çıxıb…
- Hər matçdan sonra növbəti oyuna köklənməli, hər görüşə xüsusi hazırlaşmalıyıq. Belə olsa, öz uğurlu oyunlar seriyamızı davam etdirərik.
- Yeni məşçi barədə fikirlərin necədir?
- Murad Musayev əsl peşəkardır. Onun rəhbərliyi altında oynamaq mənim üçün çox xoşdur. Hər məşqçinin özünəməxsus oyun tərzi, metodu olur. Yeni baş məşqçimizin üstünlük verdiyi 4-3-3 taktiki sxemi mənim oyun tərzimə tam uyğun gəlir.
- Komanda qış fasiləsinə qədər hansı pillədə olacaq?
- Gələcək barədə danışmağı sevmirəm. Qış fasiləsinə kimi neçə xal toplayacağımızı da proqnozlaşdırmaq istəməzdim. Futbol gündəlik işdir. Bayaq da qeyd etdiyim kimi, ancaq növbəti oyun barədə düşünmək, qarşıdakı matça köklənməliyik. Sonda hansı nəticəyə imza atacağımızı mövsümün sonunda görəcəyik.
- Qarşıda “Keşlə” ilə matç var…
- Bir halda ki, bütün komanda növbəti qələbələrə acdır, niyə də olmasın? Qalib gəlmək üçün əlimizdən gələni edəcəyik.
CAVAD