Müsahibə
Özünü tovuzlu sayan Oduva: “Ürəyini qoluna taxan futbol pərəstişkarıyam”
“Turan Tovuz”un ingiltərəli hücumçusu Natan Oduvanın futbolinfo.az saytına müsahibəsi
– Premyer Liqanın 23-cü turunda “Sabah” üzərində səfərdə qələbə qazanmağınız (2:0) hər kəsi təəccübləndirdi. Sizin üçün gözlənilməz olmadı?
– Çətin oyun oldu. Amma tamaşaçılar üçün yaxşı mübarizə alındı. Çempionatda böyük komandalara qarşı oynamağa qadir olduğumuzu göstərdik. Bunu inkişaf etdirmək istəyirik.
– “Sabah”ın baş məşqçisi Murad Musayev qazandığınız penaltiyə görə kəskin etiraz etdi, qırmızı vərəqə aldı. Sizcə, həmin anda penalti qərarı doğru deyildi?
– Bəzən penalti verilir, bəzən isə verilmir. Buna görə də bu məsələ barədə hansısa fikrim yoxdur.
– Runi Evanın yoxluğunda bu dəfə rəqib qapısına daha yaxın oynadınız və qol vurdunuz. İkinci hücumçu, yoxsa mərkəz hücumçusu mövqeyində daha rahat oynayırsınız?
– Təbii ki, mən cinah oyunçusuyam. Amma əminəm ki, hər kəs hücumun istənilən yerində rahat oynaya bildiyimi görür. Mənim üçün fərqi yoxdur – pleymeyker, hücumçu və ya vinger. Heç bir problem yoxdur. Universal futbolçuyam.
– Mövsümün əvvəlindən Runi Eva ilə hücumda tandem təşkil edirsiniz. Onun yoxluğunu bu dəfə hiss etdiniz?
– Runi bizim üçün böyük, vacib oyunçudur. O, irəlidə bizim üçün çox şey təklif edir. Evanın yoxluğunda həmişə əskiklik hiss edəcəyik. Pusi Belajdini təbrik etməliyəm – boşluğu doldurmaq asan deyil, “Sabah”la matçı çox yaxşı keçirdi və qələbədə böyük rol oynadı.
– Son 3 oyunda ardıcıl qələbə qazanmısınız. Bu yüksəlişi nəyə borclusunuz? Yeni sponsorun gəlişi və mükafat məbləğinin artırılmasının bunda nə dərəcədə rolu var?
– Düşünmürəm ki, belədir. Əlbəttə ki, ardıcıl qələbə qazandığınız zaman mükafat alacaqsınız. Futbolda çətin dövrün olması normaldır. Əsas odur ki, bu müddətdə stabilliyi qorumalısız və işlər istədiyiniz kimi getməyəndə vəziyyətin zehninizə təsir etməsinə icazə verməməlisiniz. Düşünürəm ki, bunu yaxşı bacardıq.
– 24-cü turda 4-cü pillədə yer alan “Zirə” ilə qarşılaşacaqsınız. Qələbə qazansanız, onlarla xal fərqini 3-ə endirəcəksiniz. Bu baxımdan görüşü sizin üçün həlledici saymaq olar?
– Hər oyun həlledicidir. Bu çempionatda asan görüş yoxdur. Bilirik ki, çətin olacaq. Çünki “Zirə” çox güclü komandadır. Amma hər qarşılaşmada olduğu kimi, “Zirə” ilə görüşdə də mübarizə aparacaq, uğurlu nəticə üçün əlimizdən gələni edəcəyik.
– Tovuzda sizi çox sevirlər və “Turan Tovuz”un ulduzu sayırlar. Ancaq digər tərəfdən istər Azərbaycanda, istərsə də digər ölkələrdə klublar sizinlə maraqlanır. Növbəti mövsümlə bağlı planlarınız nədir?
– İlk növbədə mən ulduz deyiləm. Sadəcə, ürəyini qoluna taxan futbol pərəstişkarıyam. Buna görə də “Turan Tovuz” üçün çox mübarizə aparıram. Çünki azarkeşlər də bu möhtəşəm idman növünü sevirlər. Ən əsası, tovuzlular bu komandanı sevirlər, hətta bütün səfər matçlarında bizə dəstək nümayiş etdirirlər. Onlar bizim 12-ci oyunçumuzdurlar. Bunu daim meydanda hiss edirik. İkincisi, mən indi tovuzluyam, hazırda diqqətimi yalnız bu klubda oynamağa yönəltmişəm.
– Premyer Liqada 4-cü yeri tutaraq Konfrans Liqasına vəsiqə qazanmaq daha asan görünür, yoxsa Azərbaycan Kubokunu qazanaraq?
– Biz bu haqda düşünmürük. Komanda olaraq daxildə müzakirə etdiyimiz hədəflərimiz var və onlara nail olmaq üçün çox çalışacağıq.
CAVAD
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı