Müsahibə
“Potensialımız mövsümü ikinci pillədə bitirməyə yetər”
“Sabah” klubunun müdafiəçisi Rəhman Daşdəmirovun futbolinfo.az saytına müsahibəsi
– Misli Premyer Liqasının 25-ci turunda “Araz-Naxçıvan”a 2:0 hesabı ilə qalib gəldiniz. Rahat qələbə qazandığınızı demək olar?
– Belə deməzdim. Çempionatda heç bir oyun asan keçmir. “Araz-Naxçıvan”la oyunumuzun da asan keçməyəcəyini bilirdik. Gözlədiyimiz kimi oldu, matç çətin alındı. İlk hissədə əldə etdiyimiz fürsətləri dəyərləndirə bilmədik. Fasilədən sonra isə imkanlarımızdan yararlandıq və vacib qələbə qazandıq.
– Bu, “Araz-Naxçıvan” üzərində ilk qələbəniz oldu. Qalibiyyətin 3-cü dövrəyədək gecikməsinin səbəbini nədə görürsünüz?
– Dediyim kimi, çempionatda asan görüş olmur. Hər bir rəqib sona kimi mübarizə aparır. Əvvəlki matçlarda sadəcə, oyunumuz alınmamışdı. Əlbəttə, bunda rəqibin əzmkar oyununun da təsiri olmuşdu.
– Komanda İqor Ponomaryova tapşırılandan sonra daha çox oyun praktikası qazanırsınız. Necə oldu ki, onun inamını qazana bildiniz?
– Mənə etimad göstərildiyinə görə təşəkkür edirəm. Mən futbolçuyam, işim məşqlərdə və şans qazandığım halda, oyunlarda özümü maksimum göstərməkdir. Son matçlarda şans qazandığıma görə şadam. Sadəcə, komandama tam faydalı olmağa çalışıram.
– Növbəti matçda autsayder “Qəbələ” ilə üz-üzə gələcəksiniz. Kaxaber Sxadadzenin gəlişindən sonra rəqibin oyununda inkişaf hiss olunurmu? Bu görüşdə qalib gələ biləcəksiniz?
– Biz rəqiblər haqda yox, ancaq öz oyunlarımız barədə düşünürük. Asan oyun olmayacaq. İstənilən halda, biz hər oyuna qələbə üçün çıxırıq. İnanıram ki, bu matçda da qalib gələrək azarkeşlərimizi sevindirəcəyik.
– Hazırda turnir cədvəlində 6-cı pillədə qərarlaşsanız da, sizi 2-ci pillədən cəmi 3 xal ayırır. “Sabah”ın mövsümü 2-ci pillədə bitirəcəyinə inanırsınız?
– Əlbəttə, inanırıq. Məncə, bizim yaxşı komandamız var. Potensialımız mövsümü ikinci pillədə bitirməyə yetər.
– Yeni baş məşqçi ilə anlaşan “Sabah”ı İqor Ponomaryov müvəqqəti olaraq hazırlaşdırır. Ponomaryovun kənara çəkilməsindən sonra əsas heyətdəki yerinizi itirməkdən ehtiyat edirsiniz?
– Dediyim kimi, futbolçuyam, işim baş məşqçinin kimliyindən asılı olmayaraq, məşqlərdə və oyunlarda bütün bacarığımı ortaya qoymaqdır. Bu, futboldur. Burada əsas heyətdə yerini çox çalışmaqla əldə edə bilərsən.
– Əksəriyyət cari mövsümün daha gərgin və maraqlı keçdiyini düşünür. Bu mövsüm əvvəlkilərdən başqa nəyə görə fərqlənir?
– Cari mövsümün daha maraqlı keçməsi fikri ilə razıyam. Meydanda həmişə gərgin mübarizənin şahidi oluruq. Bütün komandalar sona kimi mübarizə aparır və hər komanda meydana qələbə üçün çıxır. Komandalar arasında xal fərqinin çox az olmasını da buraya əlavə edə bilərəm. Bu da mövsümün daha rəqabətli keçdiyini təsdiqləyir.
FƏRİD
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı