Ölkə futbolu
“Qəbələ” tez arxayınlaşdı, tez ayıldı
Doğrudur, cüzi üstünlükdür, amma səfər oyunlarında vurulan qol sayının nəzərə alınmadığını nəzərə alsaq, “Qəbələ” qələbə sayəsində bir addım önə keçdi. Elmar Baxşıyevin yetirmələri zatən favorit idi, amma rəqibə qeyri-ciddi münasibət üzündən öz işlərini çətinləşdirdilər.
Azərbaycan kubokunun yarımfinal mərhələsinin ilk oyununda “Qəbələ” “Səbail”i məğlub etməyi bacardı. 0:2 hesabıyla geri düşən bölgə təmsilçisinin geridönüş etməsi alqışlanmalıdır. Amma o da var ki, meydan sahibləri səfərə uduzmaq üçün çıxmış komanda ilə görüşdə bunu çətinliklə bacardı.
“Səbail” 8 əsas oyunçusuna istirahət verməklə kuboka bir o qədər önəm vermədiyini, əsas məqsədin Premyer Liqada yerini təmin etmək olduğunu nümayiş etdirdi. Baş məşqçi Şahin Dinyevi qınamaq olmur, heyət məhdud, qrafik sıxdır. Bu üzdən Diviziona yuvarlanmaq təhlükəsinin hər keçən gün artdığı bir zamanda ölkə kuboku barədə düşünmək bəlkə də yersiz olardı.
Lakin rəqibin oyuna münasibəti ilk növbədə “Qəbələ”ni aldatdı. Erkən arxayınlaşan bölgə klubu bunun cəzasını çəkdi. 21-ci dəqiqədə qonaqlar artıq 2:0 hesabı ilə öndə idi. İlkin Muradovun zərbəsi özünün də gözləmədiyi qədər dəqiq alındı, ardınca Emil Martınov rəqib müdafiəçilərin hədiyyəsini dəyərləndirdi.
“Qəbələ” tez ayıldı. Fasiləyədək fərqin azalması komandada qələbəyə inamı artırdı, fasilədən sonra geridönüşü reallaşdırmaq alındı. Rafael Utziq “Səbail”in müdafiəsini eninə-uzununa yaranda isə artıq oyunçuların ustalıq səviyyəsi arasındakı fərq üzə çıxdı. Cavab matçı ərəfəsində hər nə qədər şanslar bərabər sayılsa da, “qırmızı qaralar” finala çıxmaq üçün ələ düşən şansı boşa verməyəcək. Növbəti matçadək “dənizçilər”in çempionatdakı durumuna bir qədər də aydınlıq gələcək və Diniyev yəqin ki, yenə kuboku qurban verməyi lazım biləcək.
Dünənki matç “Səbail”in psixoloji təzyiqdən qurtulması üçün şans idi. Qələbə hesabını qorumaq mümkün olsaydı, komanda özünə gələr, üstəlik, finala vəsiqəyə daha çox ümid edərdi. İndi isə ilk oyundan dərsini almış “Qəbələ” cavab matçında daha diqqətli olacaq.
FƏRİD
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 08:00
Andersonun dediyi kimi…