“Qəbələ”ylə “Zirə” dövrəni şərik bitirdi

Premyer Liqada ilk dövrənin son turu qollu başladı. Milli komandaların oyunlarına görə yaranan fasilə bitincə 7-ci turun iki oyunu reallaşdı və meydan sahibləri qələbəyə həsrət qaldı.

Özünə gəlməkdə olan “Keşlə” “Səbail”lə matçda çətin qələbə qazandı. Süni örtüklü meydanda oynamağa adət etmiş komandaların Bayıldakı dueli də süni keçdi. Meydanda mübarizə olsa da, rəqiblərin parlaq futbol sərgilədiyini deyə bilmərik. Amma imkanları daha düzgün dəyərləndirən qonaqlar turnir vəziyyətini xeyli yaxşılaşdıran nəticə qazandı. Mövsümün startından ən zəif kollektivi təsiri bağışlayan “Səbail” isə yavaş-yavaş layiq olduğu pilləyə yuvarlanır.

Qəbələdəki matç daha dinamik alındı. Hər hissədə komandalardan biri üstün futbol sərgilədi, hesab da buna uyğun oldu.

“Qəbələ” əbəs yerə liderlər qrupunda olmadığını məhz bu turda isbatlamalıydı. Ötən tur “Qarabağ”dan alınan ilk məğlubiyyət gözlənilən olsa da, mövcud heyət digər rəqiblərlə başabaş mübarizə aparmağa imkan verməliydi. Amma Elmar Baxşıyevin yetirmələri fasiləyə kimi bunu bacarmadı. Öndə pressinq edən “Zirə” ağıllı taktika sayəsində həm rəqibə öz futbolunu sərgiləməyə imkan vermədi, həm də əlinə düşən fürsəti dəyərləndirdi.

Baxmayaraq ki, hesab hansısa düşünülmüş kombinasiyadan sonra yox, künc zərbəsinin ardından açıldı. Baş məşqçi Rəşad Sadıqovun kapitanlıq sarğısını etibar etdiyi 18 yaşlı müdafiəçi Cəlal Hüseynov stopperlərə yaraşan tərzdə dəqiq baş zərbəsi endirdi. Və bəlkə də “qartallar”ın bu oyunda əsas qazancı bir xal yox, məhz belə gənclərin etimadı doğrultmasıdı.

Fasilədən sonra isə oyunun ssenarisi dəyişdi. “Qəbələ”ni dayandırmaq üçün pressinq tətbiq edib böyük güc itirən “Zirə”nin yorulacağı gözlənilən idi. Üstəlik, Baxşıyev Stefan Vukçeviçi Ülvi İsgəndərovla əvəzləməklə hücumda fəallığı artırdı. Nəticədə həmlələrini çoxaldan “Qəbələ” layiq olduğu bərabərlik qolunu vurdu. Qonaqlarda edilən oyunçu dəyişiklikləri komandanı gücləndirməyincə xal itkisi qaçılmaz oldu.

Matçda xoşagəlməz hadisələr də yaşandı. Oyun bitincə Ehtiram Şahverdiyevlə Dmitrios Çantakiasın dalaşması, rəqibinə kəllə atan birincinin qırmızı vərəqə alması oyunun gərgn ab-havasının nəticəsi idi. Nə bu olaylar, nə də “Qəbələ” nin kapitanı Asif Məmmədovun əvəzlənərkən kapitan sarğısını yerə atması örnək göstəriləsi hərəkətlər deyildi. Ümid edirik, klublar futbolçuları barədə lazımi ölçünü götürəcək.

Turun bu gün baş tutacaq oyunlarının nəticələrindən asılı olmayaraq, “Qəbələ”ylə “Zirə”nin dövrəni 3-cü pilləyə şərik olaraq bitirəcəyi dəqiqdi. Bu bərabərlik onlara əsas izləyicilərlə aradakı məsafəni qorumağa imkan verəcək.

AĞA