Ölkə futbolu
Qara, “Qarabağ”, “ağ-qara”…
Bu transfer Luiş Fiqunun “Barselona”nı “Real”a dəyişməsi qədər olaylı hadisə deyil. “Neftçi” – “Qarabağ” oyunlarında azarkeşlər Qara Qarayevə nə donuz kəlləsi atacaq, nə qarasınca danışacaq, nə də onu xain sayacaq. Əvvəla, rəqabətin səviyyəsi, düşmənçiliyin miqyası müqayisəyəgəlməz dərəcədə azdır. Eyni zamanda Qara davranışı, hərəkəti, duruşu ilə bütün futbolsevərlər arasında hörmət qazanmış biridir.
Əzəli rəqiblər arasında belə keçidlər çox az olsa da, var və onlardan növbətisinə Qarayev imza atdı. Təbii ki, onu qınayanlar da var, addımına haqq qazandıranlar da, olaya sıradan bir transfer hadisəsi kimi yanaşanlar da. Qara “Qarabağ”ın yetirməsidir, karyerasını bu kluba həsr edib və yalnız 31 yaşında “ağ-qaralar”ın düşərgəsinə yollanmaq qərarı verməsi bir qədər qəribə görünür.
Öncə Filip Ozobiç, indi Qara Qarayev… Hələ Toral Bayramovun da “Neftçi”yə yollanması variantı var. Sanki bakılılar ağdamlıların uğur formulunu “oğurlamaq” istəyir – bunu onların oyunçularını bir-bir qaralayıb düşərgəsinə gətirməklə edir.
İstər-istəməz yada 15 il əvvəl düşür. O zaman “Neftçi”ni tərk edən bir qrup məşqçi və futbolçu “Qarabağ”a keçmiş və bugünün yenilməz komandasının təməlini qoymuşdu. Fərq ondadır ki, o zaman hamının qanını qaraldan baş məşqçi Hans-Yurgen Gedenin dağıtdığı “Neftçi”nin qaymaqlarını “Qarabağ” dəstə şəklində düşərgəsinə yığmışdısa, indi “Qarabağ”ın ciddi ehtiyac duymadığı futbolçular əks-marşrutla hərəkət edir.
Ağa ağ, qaraya qara demək lazımdır. Ozobiçlə Qarayev ağdamlılara lazım olsaydı, indi “Neftçi” forması geyməzdilər, Toral kimi komandayla Polşaya yollanardılar.
Qaranı qınamaq çətindir… Heyətə düşməkdə çətinlik çəkdiyi komandanı ikiqat artıq maaş təklif edən “ağ-qaralar”a dəyişdi. Ramil Şeydayev də “Buriram Yunayted”ə daha yaxşı qazanmaq üçün yollanıb, Emin Mahmudov da “Neftçi” ilə bu amilə görə “siçan-pişik” oynayırdı.
“Qarabağ”ı qınamaq çətindir… Heyətdə daha çox fayda verən futbolçuları saxlayır. Vaxtilə Qaraya görə başqalarından imtina olunmuşdu, indi də Julio Romao, Marko Yankoviç, Patrik Andrade, Riçard Almeyda ilə müqayisədə o faydasız sayılır.
“Neftçi”ni qınamaq çətindir… Komandanın yerli oyunçu potensialı zəifdir, illərlə komandanın yetirmələri didərgin salınıb, gələcəyə yönəlik heyət qurulmayıb. Və indi boşluq səviyyəsini sübut etmiş azsaylı futbolçularla doldurulur. Həmin oyunçunu əzəli rəqibdən götürə bilirsənsə, onu zəiflətmək baxımından daha yaxşıdır.
Sual: Bəs kimi qınamalı?
Cavab: Niyə kimisə qınamaq məcburiyyətimiz olsun ki?
Bütün tərəflər özləri üçün ən sərfəli variantı seçiblər. Qara bəlkə də klubun siması, simvolu sayıla biləcək oyunçudur, amma “Neftçi”nin rəmzi sayıla biləcək Zaur Tağızadə, atası kimi özünün də illərini “Neftçi”yə verdiyi Elçin Rəhmanov, klubun bombardirlərindən olan Qurban Qurbanov indi “Qarabağ”dadırsa, doğma klub anlayışı əhəmiyyətini itirir. Müasir futbolun tələbləri başqadır.
Qaraguruhun izinə düşüb sürünməyə dəyməz, futbolçunu, klubu qaralamaq, cızmaqara etmək yox, bütün tərəflərin seçiminə hörmət etmək lazımdır. Bu, sıradan bir transfer hadisəsi idi, dünən “Qarabağ” üçün rəqiblərin qanını qaraldan Qara indi “ağ-qaralar”ın heyətində oynayacaq, meydanda funksiyasına uyğun olan “qara iş”i görəcək. Bunu “Qarabağ”dakı qədər yaxşı bacaracağının qarantiyası yoxdur, amma çalışacaq.
Bu keçiddə “Qarabağ”ı qınamalı yeganə məqam Qarayevlə layiq olduğu şəkildə vidalaşmamaları idi. 18 ilini kluba vermiş biri daha yaxşı yola salınmalı, bunu sıradan paylaşımla etməməliydilər. Lakin bu, sırf Qaraya görə deyildi. “Qarabağ” media-marketinq sahəsində “Neftçi”yə böyük hesabla uduzur, klubun hətta mətbuat xidməti başsızdır, bu işləri təşkil etməli olan kadrlara önəm verilmir, vacib sahəyə barmaqarası yanaşılır.
Qarayev hər nə qədər duyğusal status yazaraq vida etsə də, onun incik ayrıldığı dəqiqdir. Bəlkə də bugünkü imkanlarını dəyərləndirmir, “Qarabağ”ın ona əsas heyətdə daim yer verməli olduğunu, oynamasa belə, yüksək maaş alması gərəkdiyini düşünür. Özü bilər, bəlkə də haqlıdır. Lakin onun klub rəhbərliyi ilə, məşqçilərlə, futbolçularla deyil, klub işçiləri ilə fotosessiyasını paylaşaraq vidalaşması bir mesajdır. Çünki onun rəhbərliklə də belə şəkillər çəkdirdiyini daha sonra gördük.
Səbəbi qara qutuda qalmayacaq, gec-tez açılacaq. “Qarabağ”ın bir illik müqaviləsi qalan futbolçunu təzminatsız buraxması ona olan son vəfa borcu idi.
O dəqiqdir ki, daha “Qarabağ”ın çempionluq tədbirlərində Qara Qarayevin ifasında “Can Qarabağ”ı eşitməyəcəyik. Əvəzində azarkeşlər tribunalarda “Qara məni basınca…” zarafatını edəcək…
CAVAD
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…
- Digər idman növləri2024-04-12 00:29
“Anadolu Efes” növbəti mərhələdə