“Qarabağ”ın rəqibi – həm dünya, həm qitə rekordçusu

Ötən mövsüm Çempionlar Liqasının təsnifat mərhələlərində mümkün rəqiblər arasında ən güclüləri ilə üz-üzə gələn «Qarabağ” sınaqdan üzüağ çıxmağı bacardı. Doğrudur, Qurban Qurbanovun komandası sonda qrup mərhələsinə vəsiqə qazana bilmədi. Amma Ağdam təmsilçisi pley-off mərhələsində “Viktoriya Plzen”i də keçməyə yaxın idi.

Bütün bunları gözümüz önündə asanlıqla canlandırmaqla bir il öncəyə qayıtmaq fikrində deyilik. Xatırladırıq ki, “Lex”, “Sürix” və “Ferentsvaroş” “köhlən atları” əməlli-başlı tərlətməyi bacardı. Amma bu il bəxtimiz bir qədər gətirib. Hər halda, ilk mərhələdə “Qarabağ” yenə də Polşa çempionu ilə qarşılaşa bilərdi. İş elə gətirdi ki, çempionumuz “Rakuv”dan yayındı. Hər halda, Cəbəllütariq çempionu “Linkoln Red İmps”lə qarşılaşmaq göydəndüşmə oldu. Doğrudur, ikinci mərhələdə “Rakuv”la qarşılaşmaq perspektivi var. O zamana kimi isə həm ağdamlılar formaya düşəcək, həm də rəqibi daha yaxından tanımaq imkanımız olacaq.

Hər halda mərhələ keçilsə və Polşa klubu da bunu bacarsa, “Rakuv”un baş məşqçisi Marek Papşunun klubdan ayrılması “Qarabağ”ın işinə yaraya bilər. Təbii ki, arxa tullanmamış “hop” demək fikrində deyilik. “Qarabağ” hələ “Linkoln”u keçməlidir. Elə bu münasibətlə də biz Cəbəllütariq klubunu təhlil etməliyik.

“Linkoln Red İmps” 1976-cı ildə yaradılmış və ilk vaxtlarında “Mavi dəyənəklər” (“Blue Batons”) adlandırılmışdı. Komanda həmin vaxt polisin gənclərdən ibarət kollektivinin üzvləri, həmçinin “Qlasis Yunayted” və “Sent Yaqo” komandalarına lazım olmayan futbolçularından təşkil olunmuşdu.

İlk dönəmlərində Cəbəllütariqin 4-cü Divizionunda çıxış edirdi. Bir qədər sonra isə İngiltərənin “Linkoln Siti” klubunun şərəfinə belə adlandırıldı. Buna səbəb komandanın sponsorunun “Dumanlı Albion”un həmin şəhərində yaşaması olmuşdu. Elə “qırmızı iblislər” ləqəbi də birbaşa Linkolnla bağlı idi: şəhərin rəmzi məhz iblis sayılır.

“Linkoln Red İmps” bir qədər möhkəmlənəndən sonra federasiya 1981-ci ildə komandanı Üçüncü Diviziona keçirmək qərarına gəlmişdi. Cəmi bir il sonra bu liqanın qalibi olan “qırmızı iblislər” İkinci Diviziona yüksəlmişdilər. Nəhayət, 1984-cü ildə isə elitaya vəsiqə qazanmağı bacarmışdılar.

İnkişafını davam etdirən “Linkoln” yüksək divizionda ilk mövsümündəcə çempion olmuşdu. Ancaq bu yerdə bir məsələni vurğulamaq lazımdır. “Qlasis Yunayted” də eyni nəticələrini göstərdiyinə görə, sonda hər iki komanda çempion elan edilmişdi. Bu, 1895-ci ildən keçirilmiş Cəbəllütariq çempionatında ilk və son belə hal olmuşdu.

Ümumilikdə “Linkoln” elitaya vəsiqə qazandıqdan sonra ciddi fərq ortaya qoymağı bacarmışdı. “Qırmızı iblislər” 1985-1994-cü illər aralığında 7 dəfə qızıl medallar qazanmışdı.

“Linkoln”un ən parlaq dövrü isə XXI əsrə təsadüf edib. Komanda 2003-16-cı illərdə ardıcıl 14 dəfə çempion olmuşdu! “Qırmızı iblislər” təkcə ölkə daxilində “Qlasis Yunayted”in ötən əsrin 60-cı illərindəki nəticəsini (ardıcıl 9 çempionluq) yaxşılaşdırmadı, hətta dünya rekorduna çox yaxınlaşmışdı! 2016/17 mövsümündə sondan əvvəlki turda xal itirən “Linkoln” titulu əldən verdi. Bununla da Vanuatunun “Tafea” klubuna məxsus dünya rekordu (ardıcıl 15 çempionluq) toxunulmaz qaldı.

“Linkoln” XXI əsrdə 6 dəfə (2004, 2005, 2006, 2007, 2008 və 2011-ci illərdə) ölkə daxilində “trebl”ə imza atıb. “Qırmızı iblislər” ümumilikdə 12 mövsümdə bunu bacarmaqla dünya rekordçusudur. Daha bir fantastik göstərici isə komandanın məğlubiyyətsiz seriyası ilə bağlıdır. Belə ki, “Linkoln” 2009-cu ilin mayından 2014-cü ilin sentyabrına qədər çempionatda heç kimə uduzmamışdı. 88 matç və 1959 günü əhatə edən bu seriya Avropada rekord sayılır.

“Linkoln” 2014-cü ildə Çempionlar Liqasının təsnifat mərhələsində Cəbəllütariqi təmsil edən ilk komanda oldu. 2021-ci ildə isə “cırtdan” ölkə üçün inanılmaz uğur qazanıldı: Konfrans Liqasının pley-offunda “Riqa”nı keçməklə qrup mərhələsinə vəsiqə əldə etdilər. Hərçənd F qrupunda mübarizə aparan “cırtdan ölkə”nin komandası “Kopenhagen”, PAOK və Slovakiya “Slovan”ına qarşı keçirdiyi bütün oyunlarda məğlubiyyət acısı yaşadı. Komanda bu oyunlarda 2 qol vurdu və qapısında 17 top gördü.

Ötən mövsüm isə Çempionlar Liqasının ilk mərhələsində səfərdə Şimali Makedoniyanın “Skupi” komandasına 0:3 hesabıyla məğlub olan “Linkoln” evdə az qala möcüzəyə imza atacaqdı. Amma 69-cu dəqiqədə hesabı 2:0-a çatdıran cəbəllütariqlilər daha bir qol vura bilmədi.  Oradan Konfrans Liqasına yuvarlanan bu komanda hər iki oyunda Qazaxıstan “Tobol”una uduzdu – 0:1, 0:2.

Avrokuboklarda mübarizəni dayandıran “ibilslər” bütün diqqətini ölkə çempionatına yönəltməli oldu. Nəticədə 20 oyuna 17 qələbə, 1 heç-heçə və 2 məğlubiyyətlə yadda qalan ispaniyalı mütəxəssis Xavi Munyosun yetirmələri ən yaxın izləyicisi “Avropa” klubunu 9 xal fərqilə qabaqlayaraq tarixində 27-ci dəfə Cəbəllütariq çempionu oldu.

“Linkoln”un heyətini taktiki planda çox incələməyə ehtiyac da yoxdur. Hər halda, səviyyə fərqi aşağı olduğundan hansısa bir təhlükədən danışmağa dəyməz. Bu komandanın heyətində 13 yerli oyunçu varsa, 8 ispaniyalının da onların uğuru üçün tər tökməsi diqqət çəkir. Bunu da normal qarşılamaq lazimdir, Cəbəllütariq tarixi İspaniya torpağıdır. Sadəcə, İngiltərənin hərbi koloniyasına çevrilməsi ingilislərin bura axınını şərtləndirdi. Elə “Linkoln”un yerli oyunçularının bəziləri də İngiltərədə böyüyüb boya-başa çatıb.

Bu komandada Filippin, Qana və Nigeriyadan da oyunçular top qovur. Qanadan söz düşmüşkən, bu ölkənin məşhur futbolçusu Abedi Pelenin oğlu İbrahim Ayyu da “Linkoln”un üzvüdür.  Bəli, o, yaxşı tanıdığımız Andre və Cordan Ayyuların qardaşıdır.

Komandanın əsas simalarından biri Cəbəllütariq futbolunun simvollarından olan 40 yaşlı müdafiəçi Roy Çipolinadır. O, həmçinin “iblislər”in kapitanıdır.  41 yaşlı polis Li Kasyaro da ölkənin futbol tarixinin əfsanələrindən biridir. Məhz 2015-ci ildə onun Andorranın “Santa Xuliya” komandasının qapısından keçirdiyi qol sayəsində “Linkoln” Cəbəllütariq tarixində Çempionlar Liqasında mərhələ adlayan ilk klub oldu.

Bu komandanın heyətində 38 yaşlı ispaniyalı sol cinah oyuncusu Nanonun da adını xüsusi çəkməliyik. Əsl adı Mariano Qonsales Maroto olan futbolçu öz ölkəsində “Kadis”, “Ovyedo”, “Almeriya” və “Rekreativo” kimi komandalarda çıxış etməklə yanaşı, 2013-16-cı illərdə “Panatinaikos”un şərəfini qoruyub.

İstənilən halda, rəqibi qiymətləndirməmək olmaz. Əslində, bu mənada Qurban Qurbanov sarıdan bəxtimiz gətirib.  Rəqibin adı heç vaxt onu arxayınlaşdırmayıb. “Qarabağ”ın uğurunun sirri də məhz budur. Ümid edək ki, “Linkoln” “köhlən atlar”ın ayaqlarına dolaşmayacaq…

ABBAS