“Qazanılan qələbələr heç də asan başa gəlmir”

“Hər dəfə özünüzü rahat hiss etməyə başlayanda uğursuzluq olur”.

Futbolinfo.az xəbər verir ki, bunu “NTD-İndiqo”nun basketbolçusu Qriffin Remmi klubun mətbuat xidmətinə açıqlamasında deyib.

Oyunçu komandasının son qarşılaşmalardakı performansını dəyərləndirib: “Qazanılan qələbələr heç də asan başa gəlmir. Son oyunda “Gəncə”ni məğlub edə bildik. Amma qarşılaşma ağır keçdi. Kubokdakı dinamika adi mövsümdən fərqlidir. Bu, legioner limiti ilə bağlıdır. Matç ərzində əvəzetmələr də fərqli olur. Biz komanda oyunu göstəririk və bunun sayəsində qələbələr qazanırıq. Eyni tərzdə davam etmək lazımdır. Gənc basketbolçularımızı meydançada görəndə çox sevinirəm. Liqa matçlarında daha az oyun vaxtı qazanırlar. Komandadakı bütün basketbolçular məşqlərdə çox çalışırlar və qələbələrə öz töhfələrini verirlər. Kubok görüşlərində nəyə qadir olduqlarını göstərirlər. Ancaq biz hələ heç nəyə nail olmamışıq. Addım-addım irəliləyirik”.

Q.Remmi “Sərhədçi”yə qarşı keçirəcəkləri növbəti oyun barədə fikirlərini açıqlayıb: “Bu matç bizim üçün böyük bir çağırışdır. Hər oyun bizim üçün böyük sınaqdır. Qələbələr asan qazanılmır. Matçlara həmişə çox ciddi hazırlaşırıq. “Sərhədçi” yaxşı komandadır. Onların güclü məşqçisi və yaxşı basketbolçuları var. Biz liqada bir neçə oyunda məğlub olduq. Pley-off oyunları ərəfəsində turnir cədvəlində əlverişli mövqe əldə etmək istəyiriksə, vəziyyəti düzəltmək vacibdir”.

ABŞ-dən olan oyunqurucusu komandasında işlərin qaydasında olduğunu vurğulayıb: “Düşünmürəm ki, problemlərimiz var. Mövsüm kifayət qədər uzundur və bütün komandaların eniş-yoxuşları olur. Mövsüm ərzində daim mükəmməl qalmaq mümkün deyil. Bəlkə də ilk dövrədən sonra özümüzə çox güvənirdik. Ac olmalıyıq. Ancaq xüsusi bir şey əldə edə biləcəyimizə inanmalıyıq. İlk dövrədəki matçlarda tez-tez rəqib oyunçularla təkbətək qalırdım. İndi belə sərbəstlik olmur. Yanımda mütləq rəqibin ikinci oyunçusu da olur. Əslində bu komanda oyununun dəyərini göstərir. Komanda yoldaşlarıma inanıram. Ancaq eyni zamanda, özüm daha aqressiv oynamalıyam”.