Ölkə futbolu
Raufun tragikomediyası – “Kəpəz”in “qatil”inin ssenarisi ilə
Təsəvvür edin ki, dünənki hakimlik Tovuzda və ya Gəncədə olardı. İnanın ki, azarkeşlər meydana axışar, kimsə əsəbinə hakim ola bilməyib bir neçə ilini hədər edərdi. İnsanın əsəbi ilə bu qədər oynamaq həm də onu cinayətə sövq etmək deməkdir.
Rauf Cabarovun adını növbəti dəfə FIFA referisi siyahısına salan cavabdeh şəxslər də utanmalıdır. Bu adamın illərdir bəlli səviyyəsi var, onu aşa, yarım addım irəliləyə bilmir. O zaman nə məcburdur? Bu hakimə bacarıqsızlığı üzündən beynəxalq təyinat da gəlmir, il ərzində 1-2 mənasız oyuna dəvət edirlər. Çünki işi ilə səviyyəsini ortaya qoyur.
AFFA-dakılar kor deyil. Görürlər, sadəcə, səriştəsizdirlər, illəri Frits Stuxlikin hoqqalarına qurban veriblər, Avstriyanın mavi libaslı nümayəndəsi də Azərbaycanda ənənələri olan hakimliyi məhv edərək gedib. Və bu sahə o qədər bərbad vəziyyətdədir ki, iki eşşəyin arpasını bölə bilməyəcək qədər bacarıqsız olan Cabarov FIFA referisidir.
AFFA rəhbərliyinin yerində olsam, dünən baş tutan “Zirə” – “Turan Tovuz” oyunundan sonra Raufa bir daha təyinat verməz, FIFA referiliyindən geri çağırılması üçün də hər şey edərəm. Yunanıstanla əməkdaşlıq çərçivəsində bu ölkənin vacib oyunlarına yalnız Əliyar Ağayev gedirsə, beynəlxalq matçlara başqaları təyinat almırsa, Cabarov “Neftçi” – “Qarabağ” görüşünü idarə edəcək səviyyədə deyilsə, o yerin elə boş qalması daha yaxşı olar.
Cabarovun dünənki idarəçiliyi tragikomediya idi. Onlarla irili-xırdalı epizodlardakı səhvi bir yana, o, konkret 5 kritik epizodda düzgün qərar verə bilmədi.
Əvvəla, “Turan Tovuz”un qapısına təyin edilən, VAR-ın ləğv etdiyi ilk penaltini qeyd etməliyik. Rauf iki metrlik məsafədə, görüş mənzərəsinin tamamilə açıq olduğu məqamda səhv qərar verdi. VAR olmasaydı, az qala oyunçularla yanaşı duran bu adam tribunadan görünən epizodda yanlış addım atacaqdı. Atmışdı da, sonradan ləğv olundu.
İkinci penalti epizodu ümumiyyətlə, biabırçı idi. Cabarov hətta VAR-a baxdıqdan sonra səhv qərarını təsdiqləyib penalti nöqtəsini göstərdi. İnanın, birinci epizod ikincidən daha aşkar qayda pozuntusu idi. Raufsa nisbətən penaltiyə oxşayan epizodda deyil, cəriməylə əlaqəsi olmayan vəziyyətdə 11 metrlik təyin etdi. Qapıçı onun günahını yudu, qol olsaydı, indi “Turan Tovuz”un etirazlarını oxuyurduz.
“Zirə”nin 39-cu dəqiqədə vurduğu qolun sayılmaması Cabarovun briqadasının da, VAR-da oturanların da, AFFA Hakimlər Komitəsinin bütün heyətinin də elə Raufun günündə olduğunu göstərdi. Təmiz qol hətta VAR-da baxıldıqdan sonra da sayılmadı, üstəlik, səhvlərini ört-basdır etmək üçün əyri xətt çəkib yalançı ofsayd epizodu düzəltdilər.
Meydan sahiblərinin qolunun sayılmamasından sonra hakimlər səhvi səhvlə yumaq qərarına gəldilər. Bu dəfə “Turan Tovuz”un halal penaltisi təyin edilmədi. Hakimlər “Zirə”nin qoluna görə özlərini o qədər günahkar hesab edirdilər ki, bu epizoda hətta VAR-da da baxılmadı. Halbuki monitora yaxınlaşsaydılar, 11 metrlik nöqtəni göstərməkdən başqa çarə qalmayacaqdı.
Daha bir biabırçılıq “Turan Tovuz”un qolu hesaba alınmayanda yaşandı. Qonaqlar cərimə zərbəsindən sonra qol vurdu, Cabarov mərkəzi göstərdi və VAR-a baxmadan, 4-cü hakimin istəyi ilə öz qərarını ləğv etdi. Səbəb futbolçunun topu fitdən öncə oyuna daxil etməsiydi. Qayda pozulmuşdusa, niyə mərkəz göstərilirdi; pozulmamışdısa, niyə qol ləğv edilirdi?
Təsəvvür edin, bəlkə də başqa ölkələrdə bütün mövsüm ərzində bi qədər eybəcər qərarlar olmur, Rauf isə bütün bunların hamısını cəmi bir saata sığışdırdı. Və ən gülməlisi AFFA-dakıların da eyni ağılda olması, bütün hakimlik sisteminin fiaskosudur. Səbəbini izah edim:
Bu oyunun VAR hakimi kim idi? Tural Qurbanov!
Hansı Tural Qurbanov? İki gün öncə “Sumqayıt”ın ofsayddan vurduğu qolu hesaba alıb “Kəpəz”in məğlubiyyətinə səbəb olan adam!
Doğrusu, mən hakimlərin kimisə büdrətməyə çalışmasına, qərəzli idarəçiliyinə inanmıram. Sadəcə, bu adamların peşəsindəki səviyyəsi bu qədərdir. “Smaylik” Elxanın və dəstəsinin Stuxliklərin əli ilə məhv etdiyi Azərbaycan futbolu uçurumun dibindədir. Futbolu inkişaf etdirmək bir yana, indiki bacarıqsız rəhbərlərin əməllərininin fəsadlarını aradan qaldırmaq üçün bizə illər lazım olacaq.
“Sabah”ın baş məşqçisi Murad Musayevi haqlı çıxarmaq üçün cəmi iki gün kifayət etdi. Cabarov isbatladı ki, rusiyalı mütəxəssis Azərbaycandakı hakimliyin səviyyəsi ilə bağlı dediklərində yerdən göyə qədər haqlıdır.
ABBAS
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-15 08:00
Hakim kömək etmədi, “Səbail” yenə qələbəsiz qaldı
- Ölkə futbolu2024-04-15 10:17
“Qarabağ” üçün daha iki potensial rəqib
- Ölkə futbolu2024-04-15 10:03
Musanın oynamamasının səbəbi – baş məşqçi açıqladı